യു.എസ്-ഇസ്രായേൽ ആക്രമണത്തിന് പിന്നാലെ ഇറാൻ നടത്തിയ മിസൈൽ പ്രത്യാക്രമണങ്ങളുടെ ആഘാതം വ്യക്തമാക്കുന്ന പുതിയ ഉപഗ്രഹ ചിത്രങ്ങൾ പുറത്ത്. ആഗോള വാണിജ്യ നഗരമായ ദുബായിലെ ചില ഭാഗങ്ങളിൽ നിന്ന് കറുത്ത പുക ഉയരുന്നത് ഈ ചിത്രങ്ങളിൽ ദൃശ്യമാണ്.
മാർച്ച് ഒന്നിന് പകർത്തിയ ചിത്രങ്ങളിൽ, ജബൽ അലി തുറമുഖം, പാം ജുമൈറ തുടങ്ങിയ പ്രധാന തീരദേശ-നഗര മേഖലകൾക്ക് സമീപം പുകപടലങ്ങൾ കാണാം. അമേരിക്കൻ കേന്ദ്രങ്ങളെയും പ്രാദേശിക സഖ്യകക്ഷികളെയും ലക്ഷ്യമിട്ട് ഇറാൻ നടത്തിയ വൻതോതിലുള്ള ഡ്രോൺ-മിസൈൽ ആക്രമണങ്ങളെ തുടർന്നാണിത്.
യു.എ.ഇ അധികൃതർ പറയുന്നത് പ്രകാരം, നൂറുകണക്കിന് ഡ്രോണുകളും മിസൈലുകളും രാജ്യത്തിന് നേരെ പ്രയോഗിച്ചതായും അവയിൽ ഭൂരിഭാഗവും വ്യോമ പ്രതിരോധ സംവിധാനങ്ങൾ ഉപയോഗിച്ച് തടഞ്ഞതായും അറിയിച്ചു. എന്നാൽ, തകർക്കപ്പെട്ട മിസൈലുകളുടെ അവശിഷ്ടങ്ങൾ പതിച്ച് ദുബായിലെ ചില ഭാഗങ്ങളിൽ തീപിടുത്തമുണ്ടാവുകയും നാശനഷ്ടങ്ങൾ സംഭവിക്കുകയും ചെയ്തിട്ടുണ്ട്. തുറമുഖവുമായി ബന്ധപ്പെട്ട അടിസ്ഥാന സൗകര്യങ്ങൾക്കും സമീപത്തെ വാണിജ്യ മേഖലകൾക്കും കേടുപാടുകൾ പറ്റിയിട്ടുണ്ട്.
