ന്യൂഡൽഹി: അമിതാഭ് ബച്ചൻ അവതാരകനായ കോൻ ബനേഗാ ക്രോർപതിയുടെ ‘സ്വാതന്ത്ര്യദിന പ്രത്യേക എപ്പിസോഡ്’ ഏറെ ചർച്ച ചെയ്യപ്പെട്ടത് അതിഥികളായ കേണൽ സോഫിയ ഖുറേഷി, വിങ് കമാൻഡർ വ്യോമിക സിങ്, കമാൻഡർ പ്രേരണ എന്നിവരുടെ സാന്നിധ്യം കൊണ്ടായിരുന്നു. തങ്ങളുടെ നിലപാടുകളും ഔദ്യോഗിക ഉത്തരവാദിത്തങ്ങളും പങ്കുവെച്ച ആ ധീരവനിതകൾ ‘ഓപ്പറേഷൻ സിന്ദൂറി’നെക്കുറിച്ച് വിശദമായി സംസാരിച്ചിരുന്നു.

ഇന്ത്യൻ സൈനികശക്തിയെക്കുറിച്ചും ദേശസ്നേഹത്തെക്കുറിച്ചുമൊക്കെ കൗതുകപരമായ ചോദ്യങ്ങൾ ഉയർത്തിയ അമിതാഭ് ബച്ചൻ കേണൽ സോഫിയ ഖുറേഷിയോട് ചോദിച്ച ചോദ്യമാണ് ഇപ്പോൾ വൈറലായിരിക്കുന്നത്. 

1 ലക്ഷത്തിന്റെ ചോദ്യത്തിലാണ് അവതാരകൻ ഇന്ത്യയുടെ ധീരവനിതകളുടെ വായനാശേഷിയെ അളന്നുകൊണ്ട് ചോദ്യമെറിഞ്ഞത്- ‘ജയിംസ് ക്ലെയർ എഴുതിയ ഏത് ബെസ്റ്റ് സെല്ലർ പുസ്തകത്തിന്റെ ഉപശീർഷകമാണ് ‘ചെറിയ മാറ്റങ്ങൾ, ശ്രദ്ധേയമായ ഫലങ്ങൾ’ (Tiny Changes, Remarkable Results)?’

അവതാരകൻ കൊടുത്ത ഓപ്ഷനുകൾ ഇതൊക്കെയായിരുന്നു; 

A. ഫ്രീക്കണോമിക്സ്
B. തിങ്കിംഗ് ഫാസ്റ്റ് ആൻഡ് സ്ലോ
C. ആറ്റോമിക് ഹാബിറ്റ്സ്
D. നഡ്ജ്

ചോദ്യത്തിന് ഉത്തരമായി ഓപ്ഷൻ C- ആറ്റോമിക് ഹാബിറ്റ്സ് ആണ് സോഫിയ ഖുറേഷി തിരഞ്ഞെടുത്തത്. താൻ ഈ പുസ്തകം വായിക്കുക മാത്രമല്ല, ജീവിതത്തിൽ പകർത്തുകയും ചെയ്തിട്ടുണ്ടെന്ന് കേണൽ സോഫിയ ഖുറേഷി പറഞ്ഞു. ഈ പുസ്തകം വായിക്കാൻ അവർ യുവാക്കളെ ഉപദേശിക്കുകയും ചെയ്തു.