ഇന്ത്യൻ പ്രീമിയർ ലീഗ് (IPL 2026) പ്ലേ ഓഫ് ഘട്ടത്തിലേക്ക് കടക്കാനുള്ള ചെന്നൈ സൂപ്പർ കിംഗ്സിന്റെ (CSK) ശ്രമങ്ങൾക്ക് കനത്ത തിരിച്ചടി. വെള്ളിയാഴ്ച (മെയ് 15) ഏകാന സ്റ്റേഡിയത്തിൽ നടന്ന മത്സരത്തിൽ, ടൂർണമെന്റിൽ നിന്ന് നേരത്തെ തന്നെ പുറത്തായ ലഖ്നൗ സൂപ്പർ ജയന്റ്സ് (LSG) ചെന്നൈയെ ഏഴ് വിക്കറ്റിന് പരാജയപ്പെടുത്തി.
മത്സരത്തിൽ വെറും 38 പന്തിൽ നിന്ന് 90 റൺസ് അടിച്ചുകൂട്ടിയ മിച്ചൽ മാർഷിന്റെ തകർപ്പൻ പ്രകടനത്തിന്റെ കരുത്തിലാണ് ലഖ്നൗ ചെന്നൈ ഉയർത്തിയ 188 റൺസ് വിജയലക്ഷ്യം 16.4 ഓവറിൽ മറികടന്നത്. ഈ തോൽവിയോടെ 12 മത്സരങ്ങളിൽ നിന്ന് 12 പോയിന്റുമായി ചെന്നൈ സൂപ്പർ കിംഗ്സ് പോയിന്റ് പട്ടികയിൽ ആറാം സ്ഥാനത്ത് തുടരുകയാണ്. ഇനി സൺറൈസേഴ്സ് ഹൈദരാബാദ്, ഗുജറാത്ത് ടൈറ്റൻസ് എന്നീ ടീമുകൾക്കെതിരെയാണ് ചെന്നൈയുടെ അവശേഷിക്കുന്ന രണ്ട് മത്സരങ്ങൾ. പ്ലേ ഓഫ് റേസിൽ ശക്തമായി നിലകൊള്ളുന്ന ടീമുകളാണിവർ.
ഈ തോൽവിയോടെ ചെന്നൈ പ്ലേ ഓഫ് കാണാതെ പുറത്തായോ എന്ന ചോദ്യമാണ് ഇപ്പോൾ ആരാധകർ ഉയർത്തുന്നത്. കാര്യങ്ങൾ ലളിതമായി പറഞ്ഞാൽ, ചെന്നൈയുടെ പ്ലേ ഓഫ് സമവാക്യങ്ങൾ ഇപ്പോൾ കൂടുതൽ സങ്കീർണ്ണമായിരിക്കുകയാണ്. ആദ്യ നാലിൽ ഇടംപിടിക്കാൻ അവശേഷിക്കുന്ന രണ്ട് മത്സരങ്ങളിലും ചെന്നൈക്ക് ഇനി വിജയം അനിവാര്യമാണ്. ഒരൊറ്റ മത്സരം കൂടി പരാജയപ്പെട്ടാൽ ചെന്നൈക്ക് യോഗ്യത നേടാനാകുമോ? നിലവിലെ സാഹചര്യങ്ങൾ പരിശോധിക്കാം.
