‘ഉയരം കൂടുന്തോറും സംഗീതം കൂടുതൽ ഹൃദ്യമാകുമെന്നു’ തെളിയിച്ചിരിക്കുകയാണ് സെല്ലോ വാദ്യോപകരണത്തിൽ പ്രശസ്തനായ ഫ്രഞ്ച് സംഗീതജ്ഞൻ ഗൗട്ടിയർ കപ്യൂസോൺ. സെല്ലോ വായനയിലൂടെ ആസ്വാദകരെ സംഗീതത്തിന്റെ മാന്ത്രികലോകത്ത് എത്തിച്ചിട്ടുള്ള കപ്യൂസോൺ സോഷ്യൽ മീഡിയയിൽ ഏറെ പ്രശസ്തനായ വ്യക്തിയാണ്. തന്റെ പുതിയ ക്ലാസിക് ആൽബമായ ‘ഗായ’യിൽ അദ്ദേഹം നടത്തിയ പുതിയ പരീക്ഷണം സംഗീതത്തെ ആകാശത്തോളം ഉയർത്തുന്നു.
ഫ്രാൻസിലെ പർവതനിരകളുടെ ഉയരങ്ങളിൽ എല്ലാം മറന്നുള്ള അദ്ദേഹത്തിന്റെ സെല്ലോ വായന ആസ്വാദകരെ ഏറെ ഞെട്ടിച്ചിരിക്കുകയാണ്. പർവതനിരകളിൽ ഒരു സിപ്‌ലൈനിൽ തൂങ്ങിക്കിടന്നുമുള്ള സെല്ലോ വായന അത്രയും മനോഹരമാണ്. ഇദ്ദേഹത്തിന്റെ യൂട്യൂബ് ചാനലിലൂടെ പുറത്തുവന്ന വീഡിയോയിൽ, മഞ്ഞുമൂടിയ പർവതനിരകളിൽ വളരെ സുരക്ഷിതമായി നിന്ന് ആസ്വദിച്ച് സെല്ലോ വായിക്കുന്നതായി കാണിക്കുന്നു.
“വംശനാശം സംഭവിച്ചുകൊണ്ടിരിക്കുന്ന ഈ സൗന്ദര്യത്തിനായുള്ള ഒരു ഗാനം, ഭാവിതലമുറകൾക്കുള്ള ഒരു പ്രാർഥന” എന്നാണ് കപ്യൂസോൺ തന്റെ ഈ സംഗീതത്തെ വിശേഷിപ്പിച്ചത്. പ്രകൃതിയുമായുള്ള മനുഷ്യരാശിയുടെ ബന്ധം പര്യവേഷണം ചെയ്യാനുള്ള ശ്രമമാണിത്. “ഓരോ ട്രാക്കും സെല്ലോയ്ക്ക് അതിന്റേതായ ശബ്ദം നൽകുന്നു. പ്രകൃതിയുടെയും ജീവന്റെയും ഉറവിടമായ ഭൂമിയുടെ ശക്തിയിലും ആഴത്തിലും നാം മുഴുകുന്നു” – കപ്യൂസോൺ പറയുന്നു.
“ഇതിലെ ഓരോ സംഗീതത്തിലും ഭൂമിയാണ് സ്വയം പ്രകടമാകുന്നത്. ചിലപ്പോൾ ദുർബലവും ചിലപ്പോൾ ഗാംഭീര്യവും എല്ലായ്‌പ്പോഴും അത്യാവശ്യവുമാണ്. ഈ ആൽബം ഒരു മുന്നറിയിപ്പിന്റെ ഗാനം കൂടിയാണ്. ഭാവിതലമുറകൾക്കുള്ള പ്രാർഥന” – അദ്ദേഹം പറഞ്ഞു.
സംഗീതത്തെ ഭൂമിയോട് ചേർത്തുകൊണ്ടുള്ള ഈ കലാസൃഷ്ടിയുടെ ചിത്രീകരണം വലിയ വെല്ലുവിളി നിറഞ്ഞതായിരുന്നു എന്ന് വീഡിയോയിൽ വ്യക്തമാണ്. എങ്കിലും തണുത്തുറഞ്ഞ പശ്ചാത്തലത്തിൽ ശ്രുതി പിഴയ്ക്കാതെയുള്ള ഈ കലാകാരന്റെ സൃഷ്ടിയ്ക്ക് വലിയ അഭിനന്ദനമാണ് ലഭിക്കുന്നത്. ഒപ്പം, ഇത് കാണുന്ന ഓരോ ആസ്വാദകർക്കും കലയോടുള്ള സ്നേഹവും ബഹുമാനവും വർധിപ്പിക്കുന്നു.
