ഇന്ത്യയ്ക്ക് ഒരു പ്രധാന നയതന്ത്ര വിജയമായി, കുപ്രസിദ്ധ ഗുണ്ടാത്തലവൻ ലോറൻസ് ബിഷ്‌ണോയിയുടെ സഹോദരനും മുൻ മന്ത്രി ബാബാ സിദ്ദിഖി വധക്കേസിലെ മുഖ്യപ്രതിയുമായ അൻമോൾ ബിഷ്‌ണോയിയെ അമേരിക്ക ഇന്ത്യയ്ക്ക് കൈമാറി. വിവിധ ക്രിമിനൽ കേസുകളിൽ ഇന്ത്യ തിരയുന്ന അൻമോൾ ബിഷ്‌ണോയിയെ യുഎസ് നാടുകടത്തി. ബുധനാഴ്ചയോടെ ഇയാളെ ഇന്ത്യയിൽ എത്തിക്കുമെന്നാണ് അധികൃതർ നൽകുന്ന വിവരം. ബോളിവുഡ് നടൻ സൽമാൻ ഖാന്റെ വസതിക്ക് പുറത്ത് നടന്ന വെടിവയ്പ്പ് കേസ് ഉൾപ്പെടെയുള്ള നിരവധി കേസുകളിൽ പ്രതിയാണ് ഇയാൾ. ഇന്ത്യയിലെ അന്വേഷണ ഏജൻസികളുടെയും മുംബൈ പോലീസിന്റെയും നിരന്തരമായ നയതന്ത്ര ശ്രമങ്ങൾക്കൊടുവിലാണ് യുഎസ്സിന്റെ ഈ നിർണായക നടപടി.
അമേരിക്കൻ അധികൃതർ നൽകിയ വിവരത്തെത്തുടർന്ന് മുംബൈ പോലീസ് ഇയാളെ ഇന്ത്യയിലെത്തിക്കാനുള്ള കൈമാറ്റ നടപടികൾ ഒരു വർഷം മുൻപ് ആരംഭിച്ചിരുന്നു. മഹാരാഷ്ട്ര കൺട്രോൾ ഓഫ് ഓർഗനൈസ്ഡ് ക്രൈം ആക്‌ട് (MCOCA) കോടതി അൻമോൾ ബിഷ്ണോയിക്കെതിരെ ജാമ്യമില്ലാ വാറന്റ് പുറപ്പെടുവിക്കുകയും, ഇന്റർപോൾ റെഡ് കോർണർ നോട്ടീസ് നൽകുകയും ചെയ്തിരുന്നു. കഴിഞ്ഞ വർഷം ഒക്ടോബറിൽ എൻസിപി നേതാവും മുൻമന്ത്രിയുമായിരുന്ന ബാബാ സിദ്ദിഖിയെ വെടിവെച്ചുകൊന്ന കേസിലെ പ്രധാന സൂത്രധാരൻ അൻമോൾ ബിഷ്ണോയിയാണെന്ന് മുംബൈ പോലീസ് കണ്ടെത്തിയിരുന്നു. കൂടാതെ, പഞ്ചാബി ഗായകൻ സിദ്ദു മൂസാവാലയുടെ കൊലപാതകവുമായി ബന്ധപ്പെട്ട കേസുകളിലും ഇയാൾക്ക് പങ്കുണ്ടെന്ന് ദേശീയ അന്വേഷണ ഏജൻസി (NIA) അറിയിച്ചിരുന്നു.
യുഎസിൽ പിടിയിലായ ശേഷം അൻമോൾ ബിഷ്‌ണോയി അഭിഭാഷകൻ വഴി രാജ്യത്ത് രാഷ്ട്രീയ അഭയം തേടാൻ ശ്രമിച്ചിരുന്നുവെങ്കിലും ആ നീക്കം വിജയിച്ചില്ല. അഭയം തേടാനുള്ള അപേക്ഷ യുഎസ് തള്ളിയതിനെ തുടർന്നാണ് ഇയാളെ നാടുകടത്താൻ തീരുമാനിച്ചത്. ഇന്ത്യയിലെ വിവിധ ഏജൻസികളിലായി അൻമോൾ ബിഷ്ണോയിക്കെതിരെ കേസുകൾ നിലനിൽക്കുന്നതിനാൽ, ഇയാളെ ആദ്യം ഏത് ഏജൻസിക്ക് കൈമാറണം എന്നതിനെക്കുറിച്ച് കേന്ദ്രസർക്കാരാണ് അന്തിമ തീരുമാനം എടുക്കുക. കാനഡയിൽ വെച്ച് അറസ്റ്റിലായ ഇയാൾ വ്യാജ റഷ്യൻ പാസ്‌പോർട്ട് ഉപയോഗിച്ചാണ് യുഎസിൽ പ്രവേശിച്ചത്.
