തന്റെ അണ്ഡം ശീതീകരിച്ച് സൂക്ഷിച്ചിട്ടുണ്ടെന്നും അതിനെ കുറിച്ച് അധികം ആര്‍ക്കും അറിയില്ലെന്നും ടെന്നീസ് താരം സാനിയ മിര്‍സ. തന്റെ യുട്യൂബ് പോഡ്കാസ്റ്റായ ‘സെര്‍വിങ് ഇറ്റ് അപ് വിത്ത് സാനിയ’ എന്ന ഷോയില്‍ സംസാരിക്കുകയായിരുന്നു അവര്‍. ബോളിവുഡ് സംവിധായികയും കൊറിയോഗ്രാഫറുമായ ഫറാ ഖാനായിരുന്നു ഷോയിലെ അതിഥി.
അണ്ഡം ശീതികരിച്ച് സൂക്ഷിക്കാന്‍ തീരുമാനമെടുത്തപ്പോള്‍ അക്കാര്യം അടുത്ത സുഹൃത്തായ ഫറാ ഖാനെ അറിയിച്ചുവന്നും അവരാണ് തനിക്ക് ഡോക്ടറെ പരിചയപ്പെടുത്തി തന്നതെന്നും സാനിയ പറയുന്നു. ‘എനിക്ക് എന്റെ അണ്ഡം ശീതീകരിച്ച് സൂക്ഷിക്കണമായിരുന്നു. ഞാന്‍ നിങ്ങളെ സമീപിക്കുകയും നിങ്ങള്‍ എന്നെ നിങ്ങളുടെ ഡോക്ടറായ ഡോ. ഫിറൂസ പരീഖുമായി ബന്ധപ്പെടുത്തുകയും ചെയ്തു’- ഫറാ ഖാനുമായുള്ള സംഭാഷണത്തിനിടെ സാനിയ പറഞ്ഞു.
‘ഇക്കാര്യം അധികം ആര്‍ക്കും അറിയില്ല. നമ്മുടെ പ്രായം മുന്നോട്ട് പോയിക്കൊണ്ടിരിക്കുന്നതിനാല്‍ ഞാന്‍ ഇത് എല്ലാവര്‍ക്കും ശുപാര്‍ശ ചെയ്യുന്നു. നിങ്ങള്‍ക്ക് മറ്റൊരു കുട്ടി വേണമെന്നുണ്ടെങ്കില്‍ ഇത് സഹായകരമാകും. മകന്‍ ഇസ്ഹാന്‍ ജനിച്ചതിനുശേഷമാണ്ഞാന്‍ എന്റെ അണ്ഡം ശീതീകരിച്ച് സൂക്ഷിച്ചത്.’-സാനിയ വ്യക്തമാക്കി.
