വാഷിങ്ടണ്‍: ആണവായുധങ്ങള്‍ സജീവമായി പരീക്ഷിക്കുന്ന രാജ്യമാണ് പാകിസ്താനെന്ന് യുഎസ് പ്രസിഡന്റ് ഡൊണാള്‍ഡ് ട്രംപ്. എവിടെയാണ് പരീക്ഷിക്കുന്നതെന്ന് അറിയില്ല. പക്ഷേ, പരീക്ഷണം നടക്കുന്നുണ്ട്. ഭൂമിക്കടിയിലാണ് പരീക്ഷണമെന്നും ട്രംപ് പറഞ്ഞു. റഷ്യ, ചൈന, പാകിസ്താന്‍ പോലുള്ള രാജ്യങ്ങള്‍ ആണവ പരീക്ഷണം നടത്തുന്നതിനാല്‍ യുഎസിനും പരീക്ഷണം നടത്തുന്നത് അത്യാവശ്യമാണെന്നും അദ്ദേഹം പറഞ്ഞു. യുഎസ് ആണവായുധ പരീക്ഷണം പുനരാരംഭിക്കുന്നു എന്ന അഭ്യൂഹങ്ങള്‍ക്കിടയിലാണ് ട്രംപിന്‍റെ ഈ പരാമര്‍ശം.
റഷ്യ, ചൈന, ഉത്തരകൊറിയ പാകിസ്താന്‍ തുടങ്ങി നിരവധി രാജ്യങ്ങള്‍ ആണവ പരീക്ഷണം നടത്തുന്നുണ്ടെന്ന് അദ്ദേഹം അവകാശപ്പെട്ടു. പക്ഷേ, അവരൊന്നും അതേക്കുറിച്ച് സംസാരിക്കുന്നില്ല. യുഎസ് ഒരു തുറന്ന പുസ്തകമാണ്. രാജ്യം അതിനെക്കുറിച്ച് സംസാരിക്കുന്നു. സംസാരിച്ചില്ലെങ്കില്‍ മാധ്യമങ്ങള്‍ അത് റിപ്പോര്‍ട്ട് ചെയ്യും. പക്ഷേ, മറ്റു രാജ്യങ്ങളിലൊന്നും ആണവ പരീക്ഷണത്തെക്കുറിച്ചെഴുതാന്‍ റിപ്പോര്‍ട്ടര്‍മാരില്ലെന്നും ട്രംപ് പറഞ്ഞു.
ഈ രാജ്യങ്ങളൊന്നും പരീക്ഷണം നടത്തുന്നത് എവിടെയാണെന്നറിയില്ലെന്നും ട്രംപ് അവകാശപ്പെടുന്നു. പക്ഷേ, പരീക്ഷണം നടക്കുന്നുണ്ടെന്നത് ഉറപ്പാണ്. അവര്‍ ഭൂമിക്കടിയിലാണ് പരീക്ഷണം നടത്തുന്നത്. അവിടെ സംഭവിക്കുന്നതെന്താണെന്ന് ആളുകള്‍ക്ക് കൃത്യമായി അറിയില്ല. ചെറിയൊരു പ്രകമ്പനം അനുഭവപ്പെടും. യുഎസും ആണവായുധം പരീക്ഷിക്കണം. ഉത്തരകൊറിയ നിരന്തരം പരീക്ഷിക്കുന്നു. പരീക്ഷിക്കാത്ത ഒരേയൊരു രാജ്യം യുഎസാണെന്നും അദ്ദേഹം അഭിപ്രായപ്പെട്ടു.
