ഡോ. ജോര്‍ജ് എം. കാക്കനാട്
ഹൂസ്റ്റണ്‍: യുഎസ് പൗരത്വമെന്നത് അമേരിക്കയില്‍ എത്തുന്ന ഏവരുടെയും സ്വപ്‌നമാണ്. എന്നാല്‍ ഇത് സ്വപ്‌നമായി തന്നെ അവശേഷിക്കാനുള്ള എല്ലാ സാധ്യതകളുമാണ് ഇപ്പോള്‍ കാണുന്നത്. നാച്ചുറലൈസേഷന്‍ ടെസ്റ്റ് എന്നറിയപ്പെടുന്ന യുഎസ് പൗരത്വ പരീക്ഷ കൂടുതല്‍ കടുപ്പമാക്കുന്നതിനുള്ള നീക്കത്തിലാണ് പ്രസിഡന്റ് ഡൊണാള്‍ഡ് ട്രംപും കൂട്ടരും എന്നാണ് ഇപ്പോള്‍ ലഭിക്കുന്ന സൂചനകള്‍.
ഒരു അപേക്ഷകന്‍ സ്വാഭാവിക അമേരിക്കന്‍ പൗരനാകാന്‍ എടുക്കേണ്ട ഒരു പരീക്ഷയാണ് നാച്ചുറലൈസേഷന്‍ ടെസ്റ്റ്. പൗരത്വത്തിന് അപേക്ഷിക്കാത്ത ഗീന്‍ കാര്‍ഡ് ഉടമകള്‍ക്ക് ഈ പരീക്ഷ പാസാകേണ്ടതില്ല. നിലവിലുള്ള പരീക്ഷ വളരെ എളുപ്പമാണെന്നും ഉത്തരങ്ങള്‍ മനഃപാഠമാക്കാമെന്നും യുണൈറ്റഡ് സ്റ്റേറ്റ്‌സ് സിറ്റിസണ്‍ഷിപ്പ് ആന്‍ഡ് ഇമിഗ്രേഷന്‍ സര്‍വീസിന്റെ പുതിയ ഡയറക്ടര്‍ പറഞ്ഞതോടെയാണ് ഇതുസംബന്ധിച്ച മാറ്റങ്ങള്‍ക്ക് തുടക്കമാവുകയാണ് എന്ന തരത്തില്‍ ചര്‍ച്ചകള്‍ ഉടലെടുത്തത്.
2020 ലെ പരീക്ഷയുടെ പതിപ്പ് തിരികെ കൊണ്ടുവരാന്‍ ഡൊണാള്‍ഡ് ട്രംപ് ഭരണകൂടം പദ്ധതിയിടുന്നു എന്നാണ് റിപ്പോര്‍ട്ടുകള്‍ പറയുന്നത്. പൗരത്വത്തിനായി അപേക്ഷിക്കുന്നവര്‍ ആദ്യം, നാച്ചുറലൈസേഷന്‍ തേടുന്ന ഫോം എന്‍ 400 സമര്‍പ്പിക്കണം. തുടര്‍ന്ന് അവര്‍ പശ്ചാത്തല പരിശോധനയില്‍ വിജയിക്കുകയും റെസിഡന്‍സിയും മറ്റ് ആവശ്യകതകളും പാലിക്കുകയും വേണം. അതിനുശേഷം അഭിമുഖത്തില്‍ പങ്കെടുക്കണം, അവിടെ അവര്‍ രണ്ട് പരീക്ഷകള്‍ നേരിടണം- ഇംഗ്ലീഷ് ടെസ്റ്റും സിവിക് ടെസ്റ്റും.
സിവിക് ടെസ്റ്റില്‍, 100 ചോദ്യങ്ങളുണ്ട്; ഓഫീസര്‍ അപേക്ഷകനോട് 10 എണ്ണം ചോദിക്കുന്നു, അപേക്ഷകന്‍ കുറഞ്ഞത് ആറ് എണ്ണം ശരിയായി ഉത്തരം നല്‍കണം. ഡൊണാള്‍ഡ് ട്രംപിന്റെ ആദ്യ ടേമില്‍, 128 ചോദ്യങ്ങളുള്ള ഒരു പുതിയ നിയമം ഉണ്ടായിരുന്നു. അപേക്ഷകരോട് 20 ചേദ്യങ്ങള്‍ ചോദിക്കും. അവര്‍ക്ക് കുറഞ്ഞത് 12 എണ്ണം ശരിയാകണമായിരുന്നു. എന്നാല്‍ ഈ പരിഷ്‌കാരം വളരെ കുറഞ്ഞ സമയത്തേക്ക് മാത്രമാണ് ഉണ്ടായിരുന്നത്. പിന്നീട് ഇത് ഒഴിവാക്കുകയായിരുന്നു.
ഈ തരത്തിലുള്ള പരീക്ഷയുടെ ചില പതിപ്പുകള്‍ തിരികെ കൊണ്ടുവരാന്‍ യുഎസ്സിഐഎസ് പദ്ധതിയിടുന്നു. 2008 ന് മുമ്പ്, പരീക്ഷ ക്രമരഹിതമായിരുന്നു, എന്നാല്‍ ബുഷ് ഭരണകൂടം 10 ല്‍ 6 ചോദ്യങ്ങളുടെ ബെഞ്ച്മാര്‍ക്ക് അവതരിപ്പിച്ചു. ഇപ്പോഴത്തെ പതിപ്പ് ‘നിയമത്തിന്റെ ഉദേശ്യശുദ്ധിക്ക് ചേര്‍ന്നതല്ല’ എന്ന് യുഎസ്സിഐഎസ് ഡയറക്ടര്‍ പറഞ്ഞു.
യുഎസ് കമ്പനികള്‍ക്ക് വിദേശ തൊഴിലാളികളെ നിയമിക്കാന്‍ അനുവദിക്കുന്ന എച്ച്-1ബി വിസ പ്രോഗ്രാമില്‍ ആഭ്യന്തര സുരക്ഷാ വകുപ്പ് വലിയ മാറ്റങ്ങള്‍ നിര്‍ദ്ദേശിച്ചതോടെയാണ് യുഎസ് പൗരത്വ പരിശോധനയെക്കുറിച്ചുള്ള പുതിയ സംഭവ വികാസങ്ങള്‍. നിര്‍ദ്ദിഷ്ട മാറ്റങ്ങള്‍ അനുസരിച്ച്, എച്ച്-1ബി എന്‍ട്രി ലെവല്‍ തൊഴിലാളികള്‍ക്കുള്ളതല്ല. ഉയര്‍ന്ന ശമ്പളം ലഭിക്കുന്ന ഉയര്‍ന്ന വൈദഗ്ധ്യമുള്ള ജോലികള്‍ക്ക് മാത്രമായിരിക്കും ഇനി ഇത്. നടപ്പിലാക്കിയാല്‍, യുഎസ് ബിരുദധാരികള്‍ക്ക് എന്‍ട്രി ലെവലില്‍ ജോലികള്‍ നഷ്ടപ്പെടില്ല എന്നതാണ് വാദം. കൂടാതെ ടെക് കമ്പനികള്‍ക്ക് കുറഞ്ഞ വേതനത്തില്‍ വിദേശ തൊഴിലാളികളെ നിയമിക്കാന്‍ കഴിയില്ല എന്നതും ഇതിന്റെ പ്രത്യേകതയാണ്.
