കര്‍ണാടക ഉപമുഖ്യമന്ത്രി ഡി.കെ. ശിവകുമാറിൻ്റെയും സഹോദരൻ മുൻ എം.പി. ഡി.കെ. സുരേഷിൻ്റെയും സഹോദരിയായി വേഷമിട്ട യുവതിയുടെ വീട്ടിൽ എൻഫോഴ്സ്മെൻ്റ് ഡയറക്ടറേറ്റ് (ഇ.ഡി.) നടത്തിയ റെയ്ഡിൽ കണക്കിൽപ്പെടാത്ത 2.25 കോടി രൂപ പിടിച്ചെടുത്തു. സംഭവവുമായി ബന്ധപ്പെട്ട് എ. ഐശ്വര്യ ഗൗഡയെ (33) അറസ്റ്റ് ചെയ്തതായി ഇ.ഡി. വാർത്താക്കുറിപ്പിൽ അറിയിച്ചു. 2002-ലെ കള്ളപ്പണം വെളുപ്പിക്കൽ നിരോധന നിയമത്തിലെ (പി.എം.എൽ.എ.) സെക്ഷൻ 19 പ്രകാരമാണ് അറസ്റ്റ്.
പ്രത്യേക പി.എം.എൽ.എ. കോടതിയിൽ ഹാജരാക്കിയ യുവതിയെ 14 ദിവസത്തേക്ക് ഇ.ഡി. കസ്റ്റഡിയിൽ വിട്ടു. കഴിഞ്ഞ രണ്ടു ദിവസങ്ങളിൽ ഗൗഡയുമായും കൂട്ടാളികളുമായും ബന്ധപ്പെട്ട 14 സ്ഥലങ്ങളിൽ ഇ.ഡി.യുടെ ബംഗളൂരു സോണൽ ഓഫീസ് നടത്തിയ റെയ്ഡിൽ കള്ളപ്പണം വെളുപ്പിക്കൽ പ്രവർത്തനങ്ങളുമായി ബന്ധപ്പെട്ട നിരവധി കുറ്റകരമായ രേഖകളും ഡിജിറ്റൽ ഉപകരണങ്ങളും പിടിച്ചെടുത്തു.
ഗൗഡയ്ക്കും ഭർത്താവ് കെ.എൻ. ഹരീഷിനും മറ്റുള്ളവർക്കുമെതിരെ കർണാടകയിലെ വിവിധ പോലീസ് സ്റ്റേഷനുകളിൽ നിരവധി എഫ്.ഐ.ആറുകൾ രജിസ്റ്റർ ചെയ്തതിനെ തുടർന്നാണ് സാമ്പത്തിക അന്വേഷണ ഏജൻസി അന്വേഷണം ആരംഭിച്ചത്.
ഉയർന്ന റിട്ടേണുകൾ വാഗ്ദാനം ചെയ്യുന്നതിനായി പണം, സ്വർണം, ബാങ്ക് കൈമാറ്റം എന്നിവയുമായി ബന്ധപ്പെട്ട ക്രിമിനൽ ഗൂഢാലോചന, വഞ്ചന, കൊള്ളയടിക്കൽ എന്നീ കുറ്റങ്ങളാണ് എഫ്.ഐ.ആറുകളിൽ ആരോപിക്കുന്നത്. വാഗ്ദാനം ചെയ്ത റിട്ടേണുകളൊന്നും ലഭിച്ചില്ലെന്നും, റീഫണ്ട് ആവശ്യപ്പെട്ടപ്പോൾ ഇരകളെ ഭീഷണിപ്പെടുത്തിയതായും ആരോപിക്കപ്പെടുന്നു. നിക്ഷേപകരെ ഭയപ്പെടുത്താൻ ഗൗഡ തൻ്റെ വ്യാജ രാഷ്ട്രീയ ബന്ധങ്ങൾ ഉപയോഗിച്ചതായി ഇ.ഡി. കണ്ടെത്തി.
ചോദ്യം ചെയ്യൽ തുടരുകയാണെന്നും കൂടുതൽ അന്വേഷണം നടന്നുവരികയാണെന്നും ഇ.ഡി. അറിയിച്ചു. ഡി.കെ. സുരേഷിൻ്റെ സഹോദരിയാണെന്ന് അവകാശപ്പെട്ട് ബംഗളൂരു ആസ്ഥാനമായുള്ള ഒരു ജ്വല്ലറിയിൽ നിന്ന് 9.82 കോടി രൂപയുടെ സ്വർണം വഞ്ചിച്ചെന്നാണ് ഗൗഡയ്ക്കെതിരെയുള്ള പ്രധാന ആരോപണം.
വ്യാഴാഴ്ച കോൺഗ്രസ് എം.എൽ.എ. വിനയ് കുൽക്കർണിയുടെയും, കേസിൽ പരാതിക്കാരിയായ ഭാര്യ ഉൾപ്പെടെയുള്ള മറ്റൊരു കോൺഗ്രസ് നേതാവായ ടിബ്ബെഗൗഡയുടെയും വീടുകളിലും ഇ.ഡി. റെയ്ഡ് നടത്തി. തൻ്റെ കുടുംബവും ഐശ്വര്യ ഗൗഡയും തമ്മിൽ യാതൊരു ബന്ധവുമില്ലെന്ന് മുൻ എം.പി. ഡി.കെ. സുരേഷ് പരസ്യമായി നിഷേധിച്ചു.
