കോൺഗ്രസ് പാർട്ടിയുടെ ചരിത്രത്തിൽ ഒരു പുതിയ അദ്ധ്യായം കുറിച്ചുകൊണ്ട്, പാർട്ടിയുടെ ആസ്ഥാനം 24 അക്ബർ റോഡിൽ നിന്ന് 9-എ കോട്ല റോഡിലേക്ക് മാറ്റി. പുതിയ ആസ്ഥാന മന്ദിരത്തിന് ‘ഇന്ദിരാ ഭവൻ’ എന്ന് പേര് നൽകിയിരിക്കുന്നു. പാർട്ടി അദ്ധ്യക്ഷ സോണിയ ഗാന്ധി ബുധനാഴ്ച പുതിയ കെട്ടിടം ഉദ്ഘാടനം ചെയ്തു. പതിറ്റാണ്ടുകളായി കോൺഗ്രസിന്റെ പ്രതീകമായിരുന്ന 24 അക്ബർ റോഡ് ഇനി ഓർമ്മകളിൽ മാത്രം.
സോണിയ ഗാന്ധി റിബൺ മുറിച്ച് ഇന്ദിരാ ഭവന്റെ ഉദ്ഘാടനം നിർവഹിച്ചു. കോൺഗ്രസ് അദ്ധ്യക്ഷൻ മല്ലികാർജുൻ ഖാർഗെയും മറ്റ് പ്രമുഖ നേതാക്കളും ചടങ്ങിൽ പങ്കെടുത്തു. ഉദ്ഘാടനത്തിന് മുന്നോടിയായി പാർട്ടി ആസ്ഥാനത്ത് പതാക ഉയർത്തുകയും ദേശീയ ഗാനം ആലപിക്കുകയും ചെയ്തു. രാഹുൽ ഗാന്ധി, പ്രിയങ്ക ഗാന്ധി, കെ.സി. വേണുഗോപാൽ, കോൺഗ്രസ് വർക്കിംഗ് കമ്മിറ്റി അംഗങ്ങൾ, പാർലമെന്ററി പാർട്ടി അംഗങ്ങൾ, സംസ്ഥാന കോൺഗ്രസ് കമ്മിറ്റി മേധാവികൾ, എംപിമാർ, മുൻ മുഖ്യമന്ത്രിമാർ, മുൻ കേന്ദ്ര മന്ത്രിമാർ തുടങ്ങി നിരവധി പ്രമുഖ വ്യക്തിത്വങ്ങൾ ചടങ്ങിൽ പങ്കെടുത്തു.
ജനാധിപത്യം, ദേശീയത, മതേതരത്വം, സാമൂഹിക നീതി എന്നീ മൂല്യങ്ങളിൽ ഊന്നൽ നൽകിയാണ് ഇന്ദിരാ ഭവൻ രൂപകൽപ്പന ചെയ്തിരിക്കുന്നത്. പാർട്ടിയുടെയും നേതാക്കളുടെയും വർദ്ധിച്ചുവരുന്ന ആവശ്യങ്ങൾ പരിഗണിച്ച് ഭരണപരവും സംഘടനാപരവും തന്ത്രപരവുമായ പ്രവർത്തനങ്ങൾക്ക് പിന്തുണ നൽകുന്ന ആധുനിക സൗകര്യങ്ങൾ ഇവിടെ ഒരുക്കിയിട്ടുണ്ട്. കോൺഗ്രസിന്റെ 140 വർഷത്തെ ചരിത്രത്തെ അനുസ്മരിപ്പിക്കുന്ന രൂപകൽപ്പനയാണ് കെട്ടിടത്തിന് നൽകിയിരിക്കുന്നത്. സത്യം, അഹിംസ, ത്യാഗം, പോരാട്ടം, ദേശസ്നേഹം എന്നിവയുടെ ഇതിഹാസം ഇന്ദിരാ ഭവന്റെ ചുവരുകളിൽ പ്രതിധ്വനിക്കുന്നു.
2009-ല് സോണിയ ഗാന്ധി കോണ്ഗ്രസ് അദ്ധ്യക്ഷയായിരുന്ന കാലത്താണ് പുതിയ ആസ്ഥാന മന്ദിരത്തിന് തറക്കല്ലിട്ടത്. എന്നാല് നിര്മ്മാണം പൂര്ത്തിയാകാന് 15 വര്ഷമെടുത്തു. പണത്തിന്റെ കുറവുമൂലമാണ് നിര്മ്മാണം വൈകിയതെന്ന് പറയുന്നു. ഭാരതീയ ജനതാ പാര്ട്ടിയുടെ ആസ്ഥാനം സ്ഥിതി ചെയ്യുന്ന ദീന്ദയാല് മാര്ഗിലാണ് ഇന്ദിരാ ഭവനും സ്ഥിതി ചെയ്യുന്നത്. എങ്കിലും കോട്ല മാര്ഗിലൂടെയാണ് പ്രധാന പ്രവേശന കവാടം.
1978 ജനുവരിയിൽ ഇന്ദിരാഗാന്ധിയാണ് പാർട്ടി ആസ്ഥാനം 24 അക്ബർ റോഡിലേക്ക് മാറ്റിയത്. കഴിഞ്ഞ 47 വർഷമായി കോൺഗ്രസിന്റെ എല്ലാ പ്രധാന തീരുമാനങ്ങൾക്കും ഈ കെട്ടിടം സാക്ഷ്യം വഹിച്ചു. ഇനിമുതൽ കോൺഗ്രസിന്റെ പുതിയ പ്രവർത്തന കേന്ദ്രം ഇന്ദിരാ ഭവനായിരിക്കും. ആറ് നിലകളുള്ള ഈ പുതിയ കെട്ടിടം കോർപ്പറേറ്റ് ശൈലിയിലാണ് നിർമ്മിച്ചിരിക്കുന്നത്. എല്ലാ ആധുനിക സൗകര്യങ്ങളും ഇവിടെ ലഭ്യമാണ്. കോൺഗ്രസിന്റെ പ്രധാന ഓഫീസിനൊപ്പം മഹിളാ കോൺഗ്രസ്, യൂത്ത് കോൺഗ്രസ്, എൻഎസ്യുഐ തുടങ്ങിയ പോഷക സംഘടനകളുടെ ഓഫീസുകളും ഇന്ദിരാ ഭവനിലേക്ക് മാറ്റും.
