തിരുവനന്തപുരം: സംസ്ഥാനത്ത് ഐഎഎസ് തലപ്പത്ത് അഴിച്ചുപണി. പത്തനംതിട്ട ജില്ലാ കളക്ടറായിരുന്ന ദിവ്യ എസ്.അയ്യറെ വിഴിഞ്ഞം അന്താരാഷ്ട്ര തുറമുഖ എംഡിയായി നിയമിച്ചു. തുറമുഖ ഉദ്ഘാടനം ഈ മാസം 15ന് നടക്കാനിരിക്കേയാണ് നിയമനം.
തുറമുഖ നിര്മാണം അടക്കമുള്ള പ്രവര്ത്തനങ്ങള്ക്ക് നേതൃത്വം നല്കിയ ഐഎഎസ് ഓഫീസര് അദീല അബ്ദുള്ളയെയാണ് ഉദ്ഘാടനത്തിന് തൊട്ടുമുന്പ് സ്ഥാനത്തുനിന്ന് മാറ്റിയത്. അദീലയ്ക്ക് നിരവധി വകുപ്പുകളുടെ ചുമതലയുള്ളതിനാലാണ് മാറ്റമെന്നാണ് പൊതുഭരണ വകുപ്പിന്റെ വിശദീകരണം.
വിഴിഞ്ഞത്തിന്റെ മാത്രം ചുമതല നല്കി മറ്റ് അധിക ചുമതലകളില്നിന്ന് ഒഴിവാക്കണമെന്ന് അദീല ആവശ്യപ്പെട്ടിരുന്നതായാണ് വിവരം. എന്നാല് തുറമുഖത്തിന്റെ ചുമതലയില്നിന്ന് അദീലയെ നീക്കാന് സര്ക്കാര് തീരുമാനമെടുക്കുകയായിരുന്നു.
ഇതിന് പുറമേ ആലപ്പുഴ, കൊല്ലം, കണ്ണൂര്, കോഴിക്കോട്, മലപ്പുറം എന്നീ ജില്ലകളിലെ കളക്ടര്മാരെയും സ്ഥലം മാറ്റി. ആലപ്പുഴ കളക്ടറായിരുന്ന ഹരിത വി.കുമാറിനെ മൈനിംഗ് ആന്റ് ജിയോളജി ഡയറക്ടറാക്കി. ജോണ് വി.സാമുവലാണ് പുതിയ ആലപ്പുഴ ജില്ലാ കളക്ടര്.
മലപ്പുറം ജില്ലാ കളക്ടറായിരുന്ന പ്രേംകുമാര് പഞ്ചായത്ത് ഡയറക്ടറാകും. വി.ആര്.വിനോദാണ് മലപ്പുറത്തെ പുതിയ കളക്ടര്. കൊല്ലം കളക്ടറായിരുന്ന അഫ്സാന പര്വീണിനെ ഭക്ഷ്യ സുരക്ഷ കമ്മീഷണറായി നിയമിച്ചു. എല്.ദേവിദാസാണ് കൊല്ലത്തെ പുതിയ കളക്ടര്. എ.ഷിബുവാണ് പുതിയ പത്തനംതിട്ട കളക്ടര്.
കോഴിക്കോട് കളക്ടറായി സ്നേഹജ് കുമാറിനേയും കണ്ണൂര് കളക്ടറായി അരുണ് കെ.വിജയനെയുമാണ് പുതുതായി നിയമിച്ചത്.
