കൊല്ലം: സൂപ്പർ മാർക്കറ്റ് ഉടമയെ സിഐടിയു പ്രവർത്തകർ ക്രൂരമായി തല്ലിച്ചതച്ചു. കൊല്ലം നിലമേലിലാണ് സംഭവം. യൂണിയൻ കോർപ് സൂപ്പർ മാർട്ട് ഉടമ ഷാനുവിനാണ് തൊഴിലാളികളുടെ മർദനമേറ്റത്. വെള്ളിയാഴ്ച ഉച്ചകഴിഞ്ഞാണ് സംഭവമുണ്ടായത്.
സിഐടിയു പ്രവർത്തകരിൽ ഒരാൾ മദ്യപിച്ച് സൂപ്പർ മാർക്കറ്റിലെത്തി ഷാനുവുമായി തർക്കമുണ്ടാക്കിയെന്നും പിന്നാലെ മറ്റ് പ്രവർത്തകർ സംഘടിച്ചെത്തി മർദിക്കുകയായിരുന്നുവെന്നും ഉടമ പരാതിയിൽ പറയുന്നു. മർദനത്തിന്‍റെ സിസിടിവി ദൃശ്യങ്ങളും പുറത്തുവന്നിട്ടുണ്ട്.
സംഭവത്തിലെ പ്രതികളെ തിരിച്ചറിഞ്ഞതായും പതിമൂന്ന് സിഐടിയു പ്രവർത്തകർക്കെതിരെ കേസെടുത്തതായും പോലീസ് അറിയിച്ചു. വ്യക്തിവിരോധമാണ് സംഘം ചേർന്നുള്ള ആക്രമണത്തിലേക്ക് എത്തിയതെന്നാണ് പോലീസ് നൽകുന്ന പ്രാഥമിക വിവരം.
