ഡോ. ജോര്ജ് എം. കാക്കനാട്
ഹ്യൂസ്റ്റണ്: ഈ വര്ഷത്തെ ആദ്യത്തെ ചുഴലികൊടുങ്കാറ്റായ എല്സ തീവ്ര കാറ്റുകളുടെ വിഭാഗമായ കാറ്റഗറി ഒന്നിലേക്ക് മാറുന്നതിന്റെ സൂചനകളുണ്ടെന്നു ദേശീയ കാലാവസ്ഥനിരീക്ഷണ ഏജന്സി അറിയിച്ചു. ഫ്ളോറിഡ സംസ്ഥാനത്ത് ചുഴലിക്കാറ്റ് കനത്ത നാശനഷ്ടമുണ്ടാക്കിയേക്കുമെന്നാണ് കരുതുന്നത്. ഇതിനോടനുബന്ധിച്ച് പ്രദേശവാസികള്ക്ക് കനത്ത സുരക്ഷ പ്രാദേശിക അധികൃതര് ഒരുക്കുന്നുണ്ട്. എല്ലായിടത്തും മുന്നറിയിപ്പ് ബോര്ഡുകളും ഒരുക്കി കഴിഞ്ഞു. വൈദ്യുതി ബന്ധം വിച്ഛേദിക്കപ്പെടാന് സാധ്യതയുള്ളതിനാല് ആവശ്യത്തിനു മുന്കരുതലുകള് സ്വീകരിക്കണമെന്നും അപകടത്തില്പ്പെടാതെ വീടിനുള്ളില് തന്നെ കഴിയണമെന്നും ജാഗ്രത നിര്ദ്ദേശം നല്കിയിട്ടുണ്ട്. ബുധനാഴ്ച പുലര്ച്ചെ കാറ്റ് ഫ്ളോറിഡ തീരം തൊടുമെന്നാണ് കരുതുന്നത്. താമ്പയ്ക്ക് സമീപത്തു കൂടിയാണ് കാറ്റ് കരയിലേക്ക് കയറുന്നത്. വലിയ നാശനഷ്ടങ്ങള് ഉണ്ടാക്കി ഹവാന തീരം മറികടന്ന കാറ്റ് ഇപ്പോള് കടലിടുക്കില് രൗദ്രഭാവം പൂണ്ടിരിക്കുകയാണ്. പടിഞ്ഞാറന് ഫ്ലോറിഡയുടെ വടക്ക് ഭാഗമാണ് കാറ്റിന്റെ ഗേറ്റ് വേയായി ഇപ്പോള് കണക്കാക്കിയിരിക്കുന്നത്.
കനത്ത മഴയും ശക്തമായ കാറ്റും ക്യൂബയിലെങ്ങും അലയടിച്ചിരുന്നു. അതേസമയം എല്സ ചൊവ്വാഴ്ച ഫ്ലോറിഡ കീസിനടുത്ത് എത്തുന്ന കാറ്റ് വടക്കോട്ടു കടക്കുന്നതിനു മുന്നേ ഫ്ലോറിഡയിലുടനീളം കനത്ത മഴയുണ്ടാക്കും. ഇപ്പോഴും പ്രദേശമാകെ മൂടിക്കെട്ടിയ അന്തരീക്ഷമാണ്. ഇവിടെ എട്ട് ഇഞ്ച് മഴ വരെ പെയ്തേക്കുമെന്നു കരുതുന്നു. ജോര്ജിയയിലേക്കും കരോലിനകളിലേക്കും കൊടുങ്കാറ്റ് കടന്നേക്കും. കൊടുങ്കാറ്റ് കീ വെസ്റ്റില് നിന്ന് 55 മൈല് പടിഞ്ഞാറ്, മണിക്കൂറില് 60 മൈല് വീശുന്നതായി ദേശീയ ചുഴലിക്കാറ്റ് കേന്ദ്രം അറിയിച്ചു.
പടിഞ്ഞാറന്മധ്യ ഫ്ലോറിഡയ്ക്കും വടക്ക് ഫ്ലോറിഡ പാന്ഹാന്ഡിലിനും മുന്നറിയിപ്പുകള് നല്കിയിട്ടുണ്ട്. ജോര്ജിയ തീരത്തിനും സൗത്ത് കരോലിനയുടെ ചില ഭാഗങ്ങള്ക്കും ജാഗ്രത നിര്ദ്ദേശമുണ്ട്. ഫ്ലോറിഡ കീസിലും സംസ്ഥാനത്തിന്റെ തെക്കുപടിഞ്ഞാറന്, പടിഞ്ഞാറന് ഭാഗങ്ങളിലും ബുധനാഴ്ച വരെ എട്ട് ഇഞ്ച് വരെ മഴ ഉണ്ടാകുമെന്നും, ഇത് കനത്ത വെള്ളപ്പൊക്കമുണ്ടാക്കുമെന്നും മുന്നറിയിപ്പുണ്ട്. ഫ്ലോറിഡയിലുടനീളം മറ്റിടങ്ങളില് ബുധനാഴ്ച രാത്രി വരെ ആറ് ഇഞ്ച് മഴ പെയ്യാന് സാധ്യതയുണ്ട്. കൊടുങ്കാറ്റ് വടക്കോട്ട് നീങ്ങുമ്പോള്, തെക്കുകിഴക്കന് ജോര്ജിയയുടെയും സൗത്ത് കരോലിനയുടെയും ഭാഗങ്ങളില് കനത്ത മഴയും പ്രതീക്ഷിക്കുന്നു. ചൊവ്വാഴ്ചയും ബുധനാഴ്ചയും ഫ്ലോറിഡയിലുടനീളം ചുഴലിക്കാറ്റ് സാധ്യതയുണ്ട്. മിയാമി പ്രദേശത്ത് കൊടുങ്കാറ്റ് സൂക്ഷ്മമായി നിരീക്ഷിച്ചുകൊണ്ടിരിക്കുകയായിരുന്നു, സര്ഫ്സൈഡിലെ തകര്ന്ന കോണ്ടോ കെട്ടിടത്തിന്റെ സ്ഥലത്തെ രക്ഷാപ്രവര്ത്തകര് തിങ്കളാഴ്ച കനത്ത മിന്നല് കാരണം താല്ക്കാലികമായി രക്ഷാപ്രവര്ത്തനങ്ങള് നിര്ത്താന് നിര്ബന്ധിതരായി. കൊടുങ്കാറ്റിന്റെ ആഘാതം സര്ഫ്സൈഡിനെ ബാധിക്കില്ലെന്ന് അധികൃതര് പറഞ്ഞു.
ചൊവ്വാഴ്ച രാവിലെ ക്യൂബയുടെ ചില ഭാഗങ്ങളില് കൊടുങ്കാറ്റ് മുന്നറിയിപ്പും പ്രാബല്യത്തില് വന്നിരുന്നു, അവിടെ 10 ഇഞ്ച് വരെ മഴയുണ്ടായി. കരീബിയന് പ്രദേശത്ത് കുറഞ്ഞത് മൂന്ന് പേരുടെ മരണത്തിന് എല്സ കാരണമായി. കരീബിയന് ദുരന്ത എമര്ജന്സി മാനേജ്മെന്റ് ഏജന്സി സെന്റ് ലൂസിയയിലെ സൗഫ്രിയറില് ശനിയാഴ്ച ഒരു മരണം റിപ്പോര്ട്ട് ചെയ്തു. ഡൊമിനിക്കന് റിപ്പബ്ലിക്കില് ശനിയാഴ്ച 15 വയസുകാരിയും 75 വയസുള്ള സ്ത്രീയും കനത്ത മഴയില് മതിലുകള് ഇടിഞ്ഞുവീണു വ്യത്യസ്ത സംഭവങ്ങളില് മരിച്ചുവെന്ന് രാജ്യത്തെ അടിയന്തര പ്രവര്ത്തന കേന്ദ്രം പ്രസ്താവനയില് പറഞ്ഞു.
2021-ലെ അറ്റ്ലാന്റിക് ചുഴലിക്കാറ്റ് സീസണിലെ അഞ്ചാമത്തെ പേരുകാരിയാണ് എല്സ. ഇത് വെള്ളിയാഴ്ച കാറ്റഗറി 1 ചുഴലിക്കാറ്റായി മാറിയിരുന്നു. ഈ സീസണിലെ ആദ്യത്തെ പേരിട്ട കൊടുങ്കാറ്റായി അനാ മെയ് 23 ന് മാറിയിരുന്നു. എന്തായാലും ചുഴലിക്കാറ്റുകളും കാലാവസ്ഥാ വ്യതിയാനവും തമ്മിലുള്ള ബന്ധം കൂടുതല് വ്യക്തമാവുകയാണെന്നാണ് ശാസ്ത്രലോകം അഭിപ്രായപ്പെടുന്നത്. ചൂടാകുന്ന ഗ്രഹത്തിന് കാലക്രമേണ ശക്തമായ ചുഴലിക്കാറ്റുകളും ഏറ്റവും ശക്തമായ കൊടുങ്കാറ്റുകളും ഉണ്ടാകുമെന്ന് പ്രതീക്ഷിക്കാമെന്ന് നാഷണല് ഓഷ്യാനിക് ആന്റ് അറ്റ്മോസ്ഫെറിക് അഡ്മിനിസ്ട്രേഷനിലെ ശാസ്ത്രജ്ഞര് പ്രവചിക്കുന്നു. ഈ വര്ഷം 13 മുതല് 20 വരെ കൊടുങ്കാറ്റുകള് ഉണ്ടാകുമെന്നാണ് അവര് ഭയപ്പെടുന്നത്. ഇതില് ആറ് മുതല് 10 വരെ ചുഴലിക്കാറ്റുകള് ഉണ്ടാകും, അറ്റ്ലാന്റിക് സമുദ്രത്തിലെ മൂന്നോ അഞ്ചോ വലിയ ചുഴലിക്കാറ്റുകളും കണ്ടേക്കാം.
കഴിഞ്ഞ വര്ഷം ആറ് പ്രധാന ചുഴലിക്കാറ്റുകള് ഉള്പ്പെടെ 30 കൊടുങ്കാറ്റുകളുണ്ടായിരുന്നു. 2005-ലായിരുന്നു ഇതിനു മുന്പ് ഏറ്റവും കൂടുതല്. അന്ന് 28 കൊടുങ്കാറ്റുകളുണ്ടായി ഒരു റെക്കോര്ഡ് സൃഷ്ടിച്ചു. ചൊവ്വാഴ്ച പുലര്ച്ചെയോടെ ഫ്ലോറിഡ കീസില് കൊടുങ്കാറ്റ് എത്തുമെന്നാണ് കരുതിയിരുന്നത്. ഇപ്പോള് കനത്ത കാറ്റ് ഉച്ചയോടെ സൗത്ത് ഫ്ലോറിഡയില് എത്തുമെന്ന് ദേശീയ കാലാവസ്ഥാ സര്വീസ് അറിയിച്ചു.
കൊടുങ്കാറ്റിന്റെ പ്രവചനങ്ങള് കാരണം, സര്ഫ്സൈഡിലെ കോണ്ടോ കെട്ടിടഭാഗത്തെ രക്ഷാപ്രവര്ത്തനം കൂടുതല് വേഗത്തിലാക്കാന് തീരുമാനിച്ചിട്ടുണ്ട്. എന്നിട്ടും, മിന്നല് കാരണം രക്ഷാപ്രവര്ത്തകര് തിങ്കളാഴ്ച അവരുടെ ശ്രമങ്ങള് താല്ക്കാലികമായി നിര്ത്താന് നിര്ബന്ധിതരായി. കൊടുങ്കാറ്റിന്റെ ആഘാതത്തെക്കുറിച്ചുള്ള ആശങ്ക കാരണം ഞായറാഴ്ച രാത്രി ചാംപ്ലെയ്ന് ടവേഴ്സ് സൗത്തിന്റെ പകുതി പൊളിക്കാന് തീരുമാനിച്ചിരുന്നു. അവശിഷ്ടങ്ങളില് നിന്ന് നാല് മൃതദേഹങ്ങള് കൂടി കണ്ടെടുത്തു. എല്സയുടെ ആഘാതം സ്വാഭാവികമായും മിയാമിയിലേക്ക് വന്നാല്, രക്ഷാപ്രവര്ത്തനം വീണ്ടും തടസ്സപ്പെടും. ചൊവ്വാഴ്ച മിയാമി പ്രദേശത്ത് മണിക്കൂറില് 29 മൈല് വരെ മഴയും കാറ്റും അനുഭവപ്പെടുമെന്ന് കാലാവസ്ഥാ സര്വീസ് അറിയിച്ചു.
