ന്യൂഡല്ഹി: രാജ്യത്ത് ബ്ലാക്ക് ഫംഗസ് രോഗബാധിതരുടെ എണ്ണം പതിനായിരത്തോട് അടുക്കുന്നു. വിവിധ സംസ്ഥാനങ്ങളിലായി 8848 പേരാണ് ചികിത്സയിലുള്ളതെന്ന് കേന്ദ്രമന്ത്രി സദാനന്ദ ഗൗഡ അറിയിച്ചു.
ആകെ രോഗികളുടെ 60 ശതമാനത്തോളം പേരും മൂന്ന് സംസ്ഥാനങ്ങളില് നിന്നുള്ളവരാണ്. ഗുജറാത്ത് (2281), മഹാരാഷ്ട്ര (2000), ആന്ധ്രപ്രദേശ് (910) എന്നിങ്ങനെയാണ് രോഗികളുടെ എണ്ണം കൂടിയ സംസ്ഥാനങ്ങളിലെ കണക്കുകള്.
കേന്ദ്രത്തിന്റെ കണക്കുപ്രകാരം കേരളത്തില് 36 പേരിലാണ് ബ്ലാക്ക് ഫംഗസ് റിപ്പോര്ട്ട് ചെയ്തത്. മധ്യപ്രദേശ് (720), രാജസ്ഥാന് (700), കര്ണാടക (500) എന്നിങ്ങനെയാണ് കൂടുതല് രോഗികള് റിപ്പോര്ട്ട് ചെയ്ത മറ്റ് സംസ്ഥാനങ്ങള്.
ബ്ലാക്ക് ഫംഗസ് രോഗ ചികിത്സക്ക് ഉപയോഗിക്കുന്ന മരുന്നായ ആംഫോടെറിസിന് – ബി രോഗികളുടെ എണ്ണത്തിനനുസരിച്ച് സംസ്ഥാനങ്ങള്ക്ക് വിതരണം ചെയ്തതായി മന്ത്രി സദാനന്ദ ഗൗഡ അറിയിച്ചു. ഇതുപ്രകാരം കേരളത്തിന് 120 വയല് മരുന്നാണ് അനുവദിച്ചിരിക്കുന്നത്.
