കശ്മീര്: ക്ഷേത്രത്തില് അതിക്രമിച്ചുകയറാന് ശ്രമിച്ച ഭീകരനെന്ന് ‘തെറ്റിദ്ധരിച്ച്’ പൊലീസ് കോണ്സ്റ്റബിളിനെ സുരക്ഷാ ജീവനക്കാരന് വെടിവെച്ചുകൊന്നതായി കശ്മീര് പൊലീസ് വ്യക്തമാക്കി. കഴിഞ്ഞ ദിവസം രാത്രിയാണ് സംഭവം. ലാന്ഗേറ്റ് ഹന്ദ്വാര സ്വദേശിയായ അജയ് ഥര് ആണ് കൊല്ലപ്പെട്ടതെന്ന് വാര്ത്താക്കുറിപ്പില് വ്യക്തമാക്കിയ കശ്മീര് പൊലീസ്, സംഭവം നിര്ഭാഗ്യകരമായി പോയി എന്ന് അഭിപ്രായപ്പെട്ടു.
കഴിഞ്ഞ ദിവസം രാത്രി കശ്മീരിലെ ഒരു ക്ഷേത്രത്തിലെത്തിയ അജയ് ഥര് ഉള്ളിലേക്ക് കടക്കാന് ശ്രമിക്കുകയായിരുന്നു. ഇത് തടയാന് ശ്രമിച്ച ക്ഷേത്രത്തിലെ സുരക്ഷാ ജീവനക്കാരന് ആകാശത്തിലേക്ക് വെടിവെച്ചു. എന്നാല്, അജയ് താന് ആരാണെന്ന് വെളിപ്പെടുത്തുന്നതിന് പകരം ക്ഷേത്രത്തിന്റെ വാതിലില് ശക്തമായി ഇടിക്കുകയായിരുന്നു എന്ന് ഐ.ജി. വിജയ് കുമാര് പറഞ്ഞു. തുടര്ന്ന് അജയ് ക്ഷേത്രം ആക്രമിക്കാന് വന്ന ഭീകരനാണെന്ന് സെന്ട്രി തെറ്റിദ്ധരിക്കുകയും വെടിവെച്ച് കൊല്ലുകയുമായിരുന്നു എന്ന് അദ്ദേഹം വ്യക്തമാക്കി. കശ്മീരിലെ ഭൂരിപക്ഷം ക്ഷേത്രങ്ങളിലും പൊലീസ് ആണ് കാവല് നില്ക്കുന്നത്.