ന്യൂഡല്ഹി: മ്യൂക്കോര്മൈകോസിസ് രോഗികളുടെ എണ്ണം രാജ്യത്ത് ക്രമാതീതമായി വര്ദ്ധിക്കുന്നതിനിടെ ഡല്ഹിയില് അപൂര്വതരം വൈറ്റ് ഫംഗസ് (കാന്ഡിഡ) ബാധ റിപ്പോര്ട്ട് ചെയ്തു. കുടലില് മാരകമായ തകരാറുണ്ടാക്കുന്ന പ്രത്യേക തരം ഫംഗസ് രോഗമാണിത്. രാജ്യത്താദ്യമായി ഡല്ഹി എസ്.ജി.ആര്.എച്ച് ആശുപത്രിയിലാണ്
ഈ രോഗം റിപ്പോര്ട്ട് ചെയ്തിരിക്കുന്നത്.
കഠിനമായ വയറുവേദന, ഛര്ദ്ദി, മലബന്ധം തുടങ്ങിയ അസുഖങ്ങളോടെ മേയ്13ന് ആശുപത്രിയിലെത്തിയ 49കാരിയായ കൊവിഡ് രോഗിയിലാണ് വൈറ്റ് ഫംഗസ് ബാധ കണ്ടെത്തിയത്. സ്തനാര്ബുദത്തെ തുടര്ന്ന് കഴിഞ്ഞ വര്ഷം ഡിസംബറില് ശസ്ത്രക്രിയയിലൂടെ ഇവരുടെ സ്തനം നീക്കം ചെയ്തിരുന്നു. നാലാഴ്ച മുമ്ബ് വരെ കീമോതെറാപ്പിയും നടത്തിയിരുന്നു. അടിവയറ്റില് സി.ടി സ്കാന് നടത്തിയപ്പോള് കുടലില് സുഷിരമുള്ളതായി സൂചനകള് ലഭിച്ചു.
ഡോക്ടര്മാര് ഉടനെ അടിവയറ്റിനുള്ളില് ട്യൂബ് സ്ഥാപിച്ച് ഒരു ലിറ്ററോളം പിത്തരസം കലര്ന്ന പഴുപ്പ് പുറത്ത് കളഞ്ഞു. ഡോ.സമിറാന് നന്ഡിയുടെ നേതൃത്വത്തില് ഇവര്ക്ക് ശസ്ത്രക്രിയ നടത്തിയതായും ആശുപത്രി അധികൃതര് വ്യക്തമാക്കി. നാലു മണിക്കൂറോളം നീണ്ട ശസ്ത്രക്രിയയിലൂടെ സുഷിരങ്ങള് അടച്ചതായി ഡോ.നന്ഡി പറഞ്ഞു.
കുടലിന്റെ ഒരു ഭാഗം എടുത്ത് നടത്തിയ പരിശോധനയിലാണ് കുടല് ഭിത്തിയില് ഗുരുതരമായ വ്രണം ഉണ്ടായതായും വെളുത്ത ഫംഗസ് മൂലമുണ്ടാകുന്ന നെക്രോസിസ് ഉണ്ടെന്ന് കണ്ടെത്തിയെന്നും ഡോക്ടര്മാര് പറഞ്ഞു. അതേസമയം അനസ്തോമോട്ടിക്ക് ഭാഗത്ത് ചെറിയ ചോര്ച്ചയുണ്ടായതിനെ തുടര്ന്ന് ആദ്യ ശസ്ത്രക്രിയ നടത്തി അഞ്ച് ദിവസത്തിന് ശേഷം സ്ത്രീയെ വീണ്ടും ശസ്ത്രക്രിയയ്ക്ക് വിധേയമാക്കി. സ്ത്രീ നിലവില് സുഖംപ്രാപിച്ച് വരികയാണെന്നും ഡോക്ടര്മാര് അറിയിച്ചു.
ലക്ഷണങ്ങള്
ശ്വാസതടസം, പനി, ജലദോഷം, രുചിയും മണവും നഷ്ടപ്പെടുക.
പുതിയ രോഗമല്ല
വൈറ്റ് ഫംഗസ് ബാധ പുതിയ രോഗമല്ല. സാധാരണയായി ശരീരത്തില് കണ്ടുവരുന്ന ഫംഗസാണിത്. എന്നാല് പ്രതിരോധശേഷി കുറഞ്ഞ ശരീരാവസ്ഥയെ ഇത് മുതലെടുക്കും. ശ്വാസകോശത്തെയാണ് രോഗം ഗുരുതരമായി ബാധിക്കുന്നത്. ശേഷം ത്വക്ക്, ആമാശയം, വൃക്ക, തലച്ചോര്, സ്വകാര്യ ഭാഗങ്ങള്, വായ, നഖം എന്നീ ശരീരഭാഗങ്ങളെയും ബാധിക്കുന്നു.
- ഡോ. എസ്.എന്. സിംഗ്, പാട്ന മെഡിക്കല് കോളജിലെ മൈക്രോബയോളജി വിഭാഗം മേധാവി
പ്രതിരോധിക്കാം
വൈറ്റ് ഫംഗസ് ബാധയെ ചെറുക്കാന് രോഗ പ്രതിരോധ ശേഷിയും ശുചിത്വവും അത്യാവശ്യം. വൃത്തിഹീനമായ ജലസ്രോതസുകള് പോലും അപകടമുണ്ടാക്കും. ആവി പിടിക്കാന് ഉപയോഗിക്കുന്ന വെള്ളം പോലും പഴയതല്ലാതിരിക്കാന് ശ്രദ്ധിക്കണം.
