തിരുവനന്തപുരം: സംസ്ഥാനത്ത് വ്യാഴാഴ്ച വരെ അതിശക്തമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. ലക്ഷദ്വീപിനും തെക്കു കിഴക്കൻ അറബിക്കടലിനും സമീപമായി ചക്രവാതചുഴി നിലനിൽക്കുന്നതാണ് മഴ ശക്തമാകാനുള്ള കാരണം.
ചൊവ്വ, ബുധന്, ദിവസങ്ങളില് മഴ കൂടുതല് ശക്തി പ്രാപിച്ചേക്കുമെന്നും പ്രവചനമുണ്ട്. പ്രസ്തുത സാഹചര്യത്തില് വിവിധ ജില്ലകളില് ജാഗ്രത നിര്ദേശം നല്കിയിട്ടുണ്ട്. ഇന്ന് പത്തനംതിട്ട, എറണാകുളം, ഇടുക്കി, മലപ്പുറം, വയനാട് എന്നിവിടങ്ങളില് യെല്ലോ അലര്ട്ടാണ്.
തിങ്കളാഴ്ച പത്തനംതിട്ട, കോട്ടയം, എറണാകുളം, ഇടുക്കി, മലപ്പുറം, വയനാട് ജില്ലകളിലും ചൊവ്വാഴ്ച പത്തനംതിട്ട, ആലപ്പുഴ, കോട്ടയം, എറണാകുളം, ഇടുക്കി, തൃശൂർ, മലപ്പുറം, കോഴിക്കോട്, വയനാട്, കണ്ണൂർ, കാസർഗോഡ് ജില്ലകളിലും യെല്ലോ അലർട്ട് പ്രഖ്യാപിച്ചു.
ലക്ഷദ്വീപ് തീരങ്ങളിൽ ഇന്നും തിങ്കളാഴ്ചയും മത്സ്യബന്ധനത്തിനു പോകാന് പാടില്ലെന്ന് നിര്ദേശമുണ്ട്.
