സാമ്പത്തിക മാന്ദ്യത്തെ നേരിടാൻ നിയമനങ്ങൾ മന്ദഗതിയിലാക്കാൻ ഒരുങ്ങി ആപ്പിൾ (Apple Inc). ഗൂഗിൾ (Google), ടെസ്ല (Tesla) കമ്പനികൾ നേരത്തെ തന്നെ നിയമനങ്ങൾ വെട്ടി ചുരുക്കിയിരുന്നു. ഈ കമ്പനികൾക്ക് പിന്നാലെയാണ് ഇപ്പോൾ ആപ്പിളും നിയമനങ്ങൾ ചുരുക്കുന്നത് എന്ന ബ്ലൂംബെർഗ് റിപ്പോർട്ട് ചെയ്തു.
അതേസമയം, ആപ്പിൾ ഓഹരികൾ 1.6 ശതമാനം ഇടിഞ്ഞ് 147.6 ഡോളറിലെത്തി. നിയമനങ്ങൾ മന്ദഗതിയിലാക്കുന്നത് എല്ലാ ടീമുകളെയും ബാധിക്കുകയില്ലെന്ന് ആപ്പിൾ വ്യക്തമാക്കിയിട്ടുണ്ട്. പണപ്പെരുപ്പം കുതിച്ചുയരുന്ന സാഹചര്യത്തിൽ അമേരിക്കൻ ഫെഡറൽ റിസർവ് പലിശ നിരക്കുകൾ ഉയർത്തിയേക്കുമെന്ന് റിപ്പോർട്ടുകളുണ്ട്. ഫെഡറൽ റിസർവ് പലിശ നിരക്ക് കുത്തനെ ഉയർത്തിയാൽ അത് കടുത്ത മാന്ദ്യത്തിലേക്ക് നയിക്കും എന്ന ഭയം നിലനിൽക്കുന്നുണ്ട്. വരാൻ പോകുന്ന മാന്ദ്യത്തെ നേരിടാൻ പല വഴികളാണ് വൻകിട കമ്പനികൾ അടക്കം നടത്തുന്നത്. അതിൽ ഒന്നാണ് പുതിയ നിയമനങ്ങൾ വെട്ടിച്ചുരുക്കുന്നത്.
മാത്രവുമല്ല, രണ്ടാം പാദത്തിൽ ആപ്പിളിന്റെ സ്മാർട്ട്ഫോൺ കയറ്റുമതിയിൽ 9% ഇടിവുണ്ടായതായി കനാലിസിൽ നിന്നുള്ള കണക്കുകൾ വ്യക്തമാക്കുന്നു. എങ്കിലും ആപ്പിളിന്റെ ഐഫോണുകൾ ലോകത്ത് ഏറ്റവുമധികം വിറ്റഴിക്കപ്പെടുന്ന ഫോണുകളുടെ പട്ടികയിൽ ആപ്പിളിന്റെ ഐഫോണുകൾ ഉണ്ട്.
മാന്ദ്യത്തിന്റെ പശ്ചാത്തലത്തിൽ, ഈ വർഷം നടത്തേണ്ടിയിരുന്ന നിയമനങ്ങൾ എല്ലാം തന്നെ മന്ദഗതിയിലാക്കാൻ ഗൂഗിൾ തീരുമാനിച്ചിരുന്നു. ചീഫ് എക്സിക്യൂട്ടീവ് ഓഫീസർ സുന്ദർ പിച്ചൈ ഉദ്യോഗസ്ഥർക്ക് അയച്ച ഇമെയിലിൽ ആണ് നിയമനങ്ങൾ പതുക്കെയാക്കാനുള്ള നിർദേശം ഉള്ളതെന്ന് ബ്ലൂബെർഗ് റിപ്പോർട്ട് ചെയ്തു.
സാങ്കേതിക മേഖലയിലെ സാമ്പത്തിക തകർച്ചകളിൽ നിന്ന് മുന്നേറാൻ താരതമ്യേന ഗൂഗിളിന് കഴിഞ്ഞിട്ടുണ്ട്. പത്ത് വർഷത്തിന് മുൻപാണ് സാമ്പത്തിക പ്രതിസന്ധിയെ തുടർന്ന് ഗൂഗിൾ അവസാനമായി നിയമനം നിർത്തിയിട്ടുണ്ടായിരുന്നത്. ഗൂഗിളിന്റെ മാതൃസ്ഥാപനമായ ആൽഫബെറ്റ്, മാർച്ച് 31 വരെ ഏകദേശം 164,000 ആളുകൾക്ക് ജോലി നൽകിയിട്ടുണ്ട്.
അതേസമയം, ഗൂഗിളിന്റെ ഈ നീക്കം മറ്റ് ടെക് കമ്പനികളും പിന്തുടർന്നേക്കാം. ഗൂഗിന്റെ പ്രധാന എതിരാളിയായ മൈക്രോസോഫ്റ്റ് ജീവനക്കാരുടെ എണ്ണം വെട്ടികുറയ്ക്കുന്നതായി പ്രഖ്യാപിച്ചിട്ടുണ്ട്. ടെസ്ല പത്ത് ശതമാനത്തോളം ജീവനക്കാരെ കുറയ്ക്കുമെന്ന് മുൻപേ വ്യക്തമാക്കിയിരുന്നു.
ആഗോള സാമ്പത്തിക മാന്ദ്യ ഭീതിയിലാണ് ടെക് ഭീമന്മാർ നിയമനങ്ങളിൽ കുറവ് വരുത്തുന്നത്. യുഎസ് ഫെഡറൽ റിസർവ് പലിശ നിരക്കുകൾ ഉയർത്തിയേക്കുമെന്ന സാധ്യത മുന്നില്കണ്ടുകൊണ്ടാണ് നടപടി.
