കൊല്ലം: കൊല്ലം നിലമേലിൽ സൂപ്പർമാർക്കറ്റ് ഉടമയെ മർദിച്ച കേസിൽ അഞ്ച് സിഐടിയു പ്രവർത്തകർ അറസ്റ്റിൽ. ഇന്ന് വൈകിട്ടോടെയാണ് ച‌ടയമംഗലം പോലീസ് ഇവരെ കസ്റ്റഡിയിലെടുത്തത്.
കേസിൽ പ്രതികളായ പതിമൂന്ന് സിഐടിയു പ്രവർത്തകരെയും തിരിച്ചറിഞ്ഞതായും മറ്റുള്ളവരെ ഉടൻ അറസ്റ്റ് ചെയ്യുമെന്നും പോലീസ് അറിയിച്ചു. കുറ്റക്കാർക്കെതിരെ ന‌ടപടിയെടുക്കുമെന്ന് സിഐടിയു നേതൃത്വം നേരത്തെ വ്യക്തമാക്കിയിരുന്നു.
നിലമേൽ കവലയിലെ യൂണിയൻ കോർപ് സൂപ്പർമാർട്ട് ഉടമ ഷാനുവിനാണ് തൊഴിലാളികളുടെ മർദനമേറ്റത്. വെള്ളിയാഴ്ച ഉച്ചകഴിഞ്ഞാണ് സംഭവമുണ്ടായത്.
സിഐടിയു പ്രവർത്തകരിൽ ഒരാൾ മദ്യപിച്ച് സൂപ്പർമാർക്കറ്റിലെത്തി ഷാനുവുമായി തർക്കമുണ്ടാക്കുകയായിരുന്നു. പിന്നാലെ മറ്റ് പ്രവർത്തകർ സംഘടിച്ചെത്തി ഷാനുവിനെ മർദിക്കുകയായിരുന്നു. മർദനത്തിന്‍റെ സിസിടിവി ദൃശ്യങ്ങളും പുറത്തുവന്നിരുന്നു.
