2023ല്‍ ഏറെ പ്രതീക്ഷയോടെ കാത്തിരിക്കുന്ന പ്രഭാസിന്റെ ചിത്രങ്ങളില്‍ ഒന്നാണ് ആദിപുരുഷ്. ചിത്രം റിലീസിനെത്താന്‍ രണ്ടാഴ്ച മാത്രം അവശേഷിക്കെ അവസാന ഘട്ട പ്രമോഷന്‍ തിരക്കുകളിലാണ് നിര്‍മ്മാതാക്കള്‍. ഏറ്റവുമൊടുവില്‍ എല്ലാ തിയറ്ററുകളിലെയും ഒരു സീറ്റ് ഒഴിച്ചിടുമെന്ന് പ്രഖ്യാപിച്ചിരിക്കുകയാണ് അണിയറപ്രവര്‍ത്തകര്‍. ഈ സീറ്റ് ഭഗവാന്‍ ഹനുമാന് സമര്‍പ്പിക്കുമെന്നാണ് പ്രഖ്യാപനം.
എല്ലാ തിയേറ്ററുകളിലും ഒരു സീറ്റ് ഹനുമാന്
ഓം റൗട്ട് സംവിധാനം ചെയ്ത ആദിപുരുഷ് ജൂണ്‍ 16ന് തിയേറ്ററുകളില്‍ റിലീസ് ചെയ്യും. തെലുങ്ക്, ഹിന്ദി, തമിഴ്, മലയാളം, കന്നഡ എന്നിങ്ങനെ അഞ്ച് ഭാഷകളിലാണ് ചിത്രം തിയേറ്ററുകളിലെത്തുക. ഇതിന് മുന്നോടിയായാണ് ഒരു സീറ്റ് ഒഴിച്ചിടുമെന്ന പ്രഖ്യാപനം.
‘രാമായണം പാരായണം ചെയ്യുന്നിടത്തെല്ലാം ഹനുമാന് പ്രത്യക്ഷപ്പെടും. ഇത് ഞങ്ങളുടെ വിശ്വാസമാണ്. ഈ വിശ്വാസം മാനിച്ച് രാമന്‍ നായകനായ ആദിപുരുഷ് പ്രദര്‍ശിപ്പിക്കുന്ന എല്ലാ തിയേറ്ററുകളിലും ഹനുമാന് ഒരു സീറ്റ് റിസര്‍വ് ചെയ്യും.’, അണിയറപ്രവര്‍ത്തകര്‍ പ്രസ്താവനയില്‍ പറഞ്ഞു.
പുരാണ ചിത്രം
ഇന്ത്യന്‍ ഇതിഹാസമായ രാമായണത്തെ അടിസ്ഥാനമാക്കിയുള്ള പുരാണ ചിത്രമാണ് ആദിപുരുഷ് . ഓം റൗട്ട് ആണ് ചിത്രത്തിന്റെ രചനയും സംവിധാനവും നിര്‍വ്വഹിച്ചിരിക്കുന്നത്. പ്രഭാസ്, കൃതി സനോന്‍, സെയ്ഫ് അലി ഖാന്‍ എന്നിവര്‍ പ്രധാന വേഷങ്ങളില്‍ എത്തുമ്പോള്‍ സണ്ണി സിംഗ്, ദേവദത്ത നാഗ് എന്നിവര്‍ സഹകഥാപാത്രങ്ങളെ അവതരിപ്പിക്കുന്നു.
500 കോടി രൂപ മുതല്‍ മുടക്കില്‍ നിര്‍മ്മിച്ച ഈ ചിത്രം ആരംഭിച്ചത് മുതല്‍ തന്നെ നിരവധി പ്രതിസന്ധികള്‍ നേരിട്ടിരുന്നു. സെയ്ഫ് അലി ഖാന്റെ ‘രാവണന്‍ മനുഷ്യനാണ്’ എന്ന കമന്റ് മുതല്‍ മോശം VFX വരെ വാര്‍ത്തകളില്‍ നിറഞ്ഞു. ലോകമെമ്പാടുമുള്ള ഒട്ടേറെ ഭാഷകളിലായി റിലീസിന് തയ്യാറെടുക്കുകയാണ് ചിത്രം.
