മുംബൈ: വിരമിക്കല്‍ തീരുമാനം പിന്‍വലിച്ച് സാനിയ മിര്‍സ. ഓസ്ട്രേലിയന്‍ ഓപ്പണ്‍ ഗ്രാന്‍സ്‌ലാം ടെന്നിസില്‍ സാനിയ മിര്‍സ രോഹന്‍ ബൊപ്പണ്ണയ്ക്കൊപ്പം മിക്സഡ് ഡബിള്‍സില്‍ മത്സരിക്കും. 2022 സീസണോടെ വിരമിക്കാനൊരുങ്ങിയ സാനിയ, തീരുമാനം പിന്‍വലിച്ചാണ് ഓസ്ട്രേലിയയില്‍ മത്സരിക്കാനെത്തുന്നത്.
കഴിഞ്ഞ വർഷം ഓസ്ട്രേലിയൻ ഓപ്പണിൽ വനിതാ വിഭാഗം ഡബിൾസിന്‍റെ ആദ്യ റൗണ്ടിൽത്തന്നെ തോറ്റു പുറത്തായതിനു പിന്നാലെയാണ് ഇത് തന്‍റെ അവസാന സീസണായിരിക്കുമെന്ന് സാനിയ പ്രഖ്യാപിച്ചത്.
ജനുവരി 16ന് ആരംഭിക്കുന്ന ഓസ്ട്രലിയന്‍ ഓപ്പണില്‍ മിക്സഡ് ഡബിള്‍സിലാണ് സാനിയ–ബൊപ്പണ്ണ സഖ്യം കളത്തിലിറങ്ങുന്നത്. മഹാരാഷ്ട്ര ഓപ്പണോടെ സീസണ് തുടക്കമിട്ട രോഹന്‍ ബൊപ്പണ്ണയാണ് സാനിയക്കൊപ്പം മത്സരിക്കുമെന്ന പ്രഖ്യാപനം നടത്തിയത്.
