പശ്ചിമേഷ്യയിലെ നിലവിലെ സവിശേഷ സാഹചര്യങ്ങൾ കണക്കിലെടുത്ത് വിമാനയാത്രക്കാർക്കായി സൗദി സിവിൽ ഏവിയേഷൻ അതോറിറ്റി (GACA) ജാഗ്രതാ നിർദ്ദേശം പുറപ്പെടുവിച്ചു. മേഖലയിലെ സംഭവവികാസങ്ങൾ വിമാന സർവീസുകളുടെ സമയക്രമത്തെ ബാധിക്കാൻ സാധ്യതയുള്ളതിനാൽ, യാത്രക്കാർ വിമാനത്താവളത്തിലേക്ക് തിരിക്കുന്നതിന് മുൻപ് ഫ്ലൈറ്റ് സ്റ്റാറ്റസ് നിർബന്ധമായും പരിശോധിക്കണമെന്ന് അധികൃതർ അറിയിച്ചു.
അപ്ഡേറ്റ് ചെയ്ത ഫ്ലൈറ്റ് ഷെഡ്യൂളുകളെക്കുറിച്ചും ലഭ്യമായ മറ്റ് യാത്രാ ഓപ്ഷനുകളെക്കുറിച്ചും അതത് വിമാനക്കമ്പനികളുമായി ബന്ധപ്പെട്ട് കൃത്യത വരുത്തണം. വിമാനക്കമ്പനികളുടെ ഔദ്യോഗിക വെബ്സൈറ്റുകൾ, മൊബൈൽ ആപ്പുകൾ എന്നിവ വഴി ഏറ്റവും പുതിയ വിവരങ്ങൾ വായനക്കാർ നിരീക്ഷിക്കണം. വിമാന ഗതാഗതത്തിന്റെ സുഗമമായ നടത്തിപ്പിനൊപ്പം യാത്രക്കാരുടെ അവകാശങ്ങൾ സംരക്ഷിക്കാനുമാണ് ഈ മുൻകരുതൽ നടപടിയെന്ന് ഗാക വക്താവ് വ്യക്തമാക്കി.
കൃത്യമായ വിവരങ്ങൾ മുൻകൂട്ടി ശേഖരിക്കുന്നത് വിമാനത്താവളങ്ങളിലെ അനാവശ്യ തിരക്കും പ്രയാസങ്ങളും ഒഴിവാക്കാൻ സഹായിക്കും. ദേശീയ വിമാനക്കമ്പനികൾ വാഗ്ദാനം ചെയ്യുന്ന യാത്രാസൗകര്യങ്ങളും ഇളവുകളും പ്രയോജനപ്പെടുത്തുന്നതിനും ഷെഡ്യൂളുകൾ സ്ഥിരീകരിക്കുന്നതിനും എയർലൈനുകളുമായി നേരിട്ട് ബന്ധപ്പെടാവുന്നതാണ്. യാത്രക്കാരുടെ പരാതികളും അന്വേഷണങ്ങളും ഔദ്യോഗിക മാർഗ്ഗങ്ങളിലൂടെ 24 മണിക്കൂറും സമർപ്പിക്കാമെന്നും അധികൃതർ കൂട്ടിച്ചേർത്തു.
