വിമാനയാത്രയ്ക്കിടെ ഉണ്ടാകാൻ സാധ്യതയുള്ള തീപിടിത്തങ്ങൾ ഒഴിവാക്കുന്നതിനായി പവർ ബാങ്കുകളുടെ ഉപയോഗത്തിന് കർശന നിയന്ത്രണങ്ങൾ ഏർപ്പെടുത്തി ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ (ഡിജിസിഎ). വിമാനത്തിനുള്ളിൽ പവർ ബാങ്കുകൾ ഉപയോഗിക്കുന്നതിനും അവ ചാർജ് ചെയ്യുന്നതിനും വിലക്കേർപ്പെടുത്തിക്കൊണ്ട് ഡിജിസിഎ പുതിയ സർക്കുലർ പുറത്തിറക്കി.
യാത്രക്കാർക്ക് പവർ ബാങ്കുകളും സ്പെയർ ബാറ്ററികളും ഹാൻഡ് ലഗേജിൽ (കൈവശം വയ്ക്കുന്ന ബാഗ്) മാത്രമേ കൊണ്ടുപോകാൻ അനുവാദമുള്ളൂ. ഇവ ചെക്ക്-ഇൻ ലഗേജിൽ വയ്ക്കാൻ പാടില്ലെന്ന് നേരത്തെ തന്നെ നിർദ്ദേശമുണ്ട്. എന്നാൽ പുതിയ ഉത്തരവ് പ്രകാരം, സീറ്റിന് മുകളിലുള്ള ലോക്കറുകളിൽ (ഓവർഹെഡ് കംപാർട്ടുമെന്റുകൾ) പവർ ബാങ്കുകൾ സൂക്ഷിക്കാൻ പാടില്ല. വിമാനയാത്രക്കിടെ ലിഥിയം ബാറ്ററികൾക്ക് തീപിടിച്ചതുമായി ബന്ധപ്പെട്ട സംഭവങ്ങൾ റിപ്പോർട്ട് ചെയ്ത സാഹചര്യത്തിലാണ് സുരക്ഷാ മുൻകരുതലുകൾ ശക്തമാക്കുന്നത്.
വിമാനയാത്രയ്ക്കിടെ മൊബൈൽ ഫോൺ ഉൾപ്പെടെയുള്ള പോർട്ടബിൾ ഇലക്ട്രോണിക് ഉപകരണങ്ങൾ ചാർജ് ചെയ്യാൻ പവർ ബാങ്കുകൾ ഉപയോഗിക്കുന്നത് പുതിയ സർക്കുലർ പ്രകാരം വിലക്കിയിട്ടുണ്ട്. കൂടാതെ, വിമാനക്കമ്പനികൾ നൽകുന്ന ഇൻ-സീറ്റ് പവർ സപ്ലൈ സിസ്റ്റങ്ങളിൽ (സീറ്റുകളിലുള്ള പ്ലഗ് പോയിന്റുകൾ) കുത്തി പവർ ബാങ്കുകൾ ചാർജ് ചെയ്യുന്നതിനും യാത്രക്കാർക്ക് വിലക്കുണ്ട്.
കഴിഞ്ഞ ഒക്ടോബറിൽ ഡൽഹി വിമാനത്താവളത്തിൽ ഇൻഡിഗോ വിമാനത്തിലെ യാത്രക്കാരന്റെ പവർ ബാങ്കിന് തീപിടിച്ചിരുന്നു. ഡൽഹിയിൽ നിന്നും നാഗാലാൻഡിലെ ദിമാപൂരിലേക്ക് പുറപ്പെടാനൊരുങ്ങിയ 6ഇ 2107 നമ്പർ വിമാനത്തിലായിരുന്നു സംഭവം. വിമാനം ടാക്സിയിങ് (റൺവേയിലേക്ക് നീങ്ങുന്ന സമയം) നടത്തുന്നതിനിടെയായിരുന്നു തീപിടിത്തം ഉണ്ടായത്. ഇത്തരം അപകടങ്ങൾ ആവർത്തിക്കാതിരിക്കാനാണ് ഡിജിസിഎയുടെ പുതിയ നടപടി.
വിമാനത്താവള ഓപ്പറേറ്റർമാർക്കും ഇതുമായി ബന്ധപ്പെട്ട കർശന നിർദ്ദേശങ്ങൾ കൈമാറിയിട്ടുണ്ട്. ടെർമിനൽ പ്രവേശന കവാടങ്ങൾ, ചെക്ക്-ഇൻ കൗണ്ടറുകൾ, സുരക്ഷാ ചെക്ക്പോസ്റ്റുകൾ, ബോർഡിങ് ഗേറ്റുകൾ എന്നിവിടങ്ങളിൽ ലിഥിയം ബാറ്ററി മൂലമുണ്ടാകാവുന്ന തീപിടിത്ത സാധ്യതകളെക്കുറിച്ചുള്ള വ്യക്തമായ സുരക്ഷാ സന്ദേശങ്ങളും വീഡിയോകളും പ്രദർശിപ്പിക്കണമെന്ന് ഡിജിസിഎ ആവശ്യപ്പെട്ടു. പവർ ബാങ്കുകളും ബാറ്ററിയിൽ പ്രവർത്തിക്കുന്ന മറ്റ് ഉപകരണങ്ങളും സുരക്ഷിതമായി കൈകാര്യം ചെയ്യുന്നതിനെക്കുറിച്ച് യാത്രക്കാരെ ബോധവൽക്കരിക്കുന്നതിന് എയർലൈനുകളുമായി സഹകരിച്ച് പ്രവർത്തിക്കാനും വിമാനത്താവളങ്ങൾക്ക് നിർദ്ദേശം നൽകിയിട്ടുണ്ട്.
