മാസങ്ങളായി നിലച്ചുനിന്നിരുന്ന കാനഡ–അമേരിക്ക വ്യാപാര ചർച്ചകൾ വീണ്ടും ആരംഭിക്കുന്നതായി അമേരിക്കൻ പ്രസിഡന്റ് ഡൊണാൾഡ് ട്രംപ് പ്രഖ്യാപിച്ചതോടെ സാഹചര്യം മാറ്റംകൊണ്ടിരിക്കുകയാണ്. വിൻഡ്സറിലെ ഗോർഡി ഹൗ ഇന്റർനാഷണൽ ബ്രിഡ്ജ് ഉൾപ്പെടെയുള്ള വിഷയങ്ങൾ ചൂണ്ടിക്കാട്ടി ട്രൂത്ത് സോഷ്യൽ പ്ലാറ്റ്ഫോമിൽ ട്രംപ് നടത്തിയ പരാമർശമാണ് പുതിയ വഴിത്തിരിവിന് കാരണമായത്.
“അമേരിക്കയ്ക്ക് ലഭിക്കേണ്ട മുഴുവൻ നഷ്ടപരിഹാരവും ലഭിക്കാതെ, കൂടാതെ കാനഡ അമേരിക്കയോട് ആവശ്യമായ നീതിയും ബഹുമാനവും കാണിക്കാതെ ഈ പാലം തുറക്കാൻ ഞാൻ അനുവദിക്കില്ല. ചർച്ചകൾ ഉടൻ തന്നെ ആരംഭിക്കും,” എന്നായിരുന്നു ട്രംപിന്റെ കുറിപ്പ്. ട്രംപിന്റെ നിലപാട് പാലത്തിന്റെ ആസൂത്രിത ഉദ്ഘാടനത്തെ ബാധിക്കാമെന്ന ആശങ്ക ഉയർത്തുന്നുണ്ടെങ്കിലും, ചില വ്യവസായ നേതാക്കൾ ഇത് വ്യാപാര ചർച്ചകൾ വേഗത്തിലാക്കാനുള്ള അവസരമായി കാണുന്നു.
കാനഡിയൻ അസോസിയേഷൻ ഓഫ് മോൾഡ്മേക്കേഴ്സിന്റെ എക്സിക്യൂട്ടീവ് ഡയറക്ടർ നിക്കോൾ വ്ലാനിച്ച് പറഞ്ഞു: കുറച്ച് ആഴ്ചകൾക്ക് മുമ്പ് വരെ കാനഡയും അമേരിക്കയും തമ്മിൽ യാതൊരു സംഭാഷണവും ഉണ്ടായിരുന്നില്ല. ഇപ്പോൾ വീണ്ടും ചർച്ചകൾ തുടങ്ങിയിരിക്കുന്നത് ഒരു നല്ല സൂചനയാണ്. ട്രംപിന്റെ പുതിയ പരാമർശങ്ങൾ അതിശയിപ്പിച്ചില്ലെന്നും, ആദ്യ കാലാവധിയിൽ അദ്ദേഹം ഈ പാലം പദ്ധതിയെ പിന്തുണച്ചിരുന്നുവെന്നും വ്ലാനിച്ച് വ്യക്തമാക്കി. 2017 ഫെബ്രുവരിയിൽ ട്രംപും അന്നത്തെ കാനഡ പ്രധാനമന്ത്രി ജസ്റ്റിൻ ട്രൂഡോയും പുറത്തിറക്കിയ സംയുക്ത പ്രസ്താവനയിൽ, “ഗോർഡി ഹൗ ഇന്റർനാഷണൽ ബ്രിഡ്ജ് വേഗത്തിൽ പൂർത്തിയാകുമെന്ന്, അത് ഇരുരാജ്യങ്ങൾക്കിടയിലെ പ്രധാന സാമ്പത്തിക ബന്ധമായി മാറുമെന്നും” വ്യക്തമാക്കിയിരുന്നു.“ആ പ്രസ്താവന ശരിയായിരുന്നു. ഈ രണ്ടാം പാലം അനിവാര്യമാണ്. ഇരുപത് വർഷത്തിലേറെയായി ഇതിന്റെ പ്രാധാന്യം നമ്മൾ ചർച്ചചെയ്യുകയാണ്,” വ്ലാനിച്ച് കൂട്ടിച്ചേർത്തു.
ഡിട്രോയിറ്റിലെയും വിൻഡ്സറിലെയും ബിസിനസ് നേതാക്കളും നാട്ടുകാരും ഈ പാലം അതിർത്തി സഹകരണത്തിന്റെ പ്രതീകമാണെന്നും, പദ്ധതി ആസൂത്രിത സമയത്ത് തന്നെ മുന്നോട്ടുപോകണമെന്നും ആവശ്യപ്പെടുന്നു. മിഷിഗൺ ഗവർണർ ഗ്രെച്ചൻ വിറ്റ്മർ പറഞ്ഞു: “വടക്കേ അമേരിക്കയിലെ ഏറ്റവും വലിയ വ്യാപാര കടന്നുപോകൽ കേന്ദ്രമാണിത്. അതിനാൽ ഈ പാലം സമയത്ത് തുറക്കുന്നത് വളരെ പ്രധാനമാണ്.” വിൻഡ്സർ മേയർ ഡ്രൂ ഡിൽകിൻസ് ട്രംപിന്റെ ആരോപണങ്ങളെ അസംബന്ധവും തെറ്റായതുമാണ് എന്ന് വിശേഷിപ്പിച്ചു. കാനഡയും അമേരിക്കയും തമ്മിലുള്ള ഏറ്റവും തിരക്കേറിയ വാണിജ്യ അതിർത്തി കടന്നുപോകൽ കേന്ദ്രമാണ് വിൻഡ്സർ. നാം പരസ്പരം ഏറ്റവും വലിയ വ്യാപാര പങ്കാളികളാണ്,-അദ്ദേഹം പറഞ്ഞു.
പാലം തുറക്കുന്നതിൽ ഉണ്ടാകുന്ന ഏതെങ്കിലും താമസം ഇരുവശത്തെയും നഗരങ്ങളുടെ സമ്പദ്വ്യവസ്ഥയെ പ്രതികൂലമായി ബാധിക്കുമെന്ന് ബിസിനസ് നേതാക്കൾ മുന്നറിയിപ്പ് നൽകി. ദിവസേന ഏകദേശം ഒരു ബില്യൺ ഡോളറിന്റെ വ്യാപാരമാണ് വിൻഡ്സർ–എസ്സെക്സ് മേഖലയിലൂടെ കടന്നുപോകുന്നത്. പുതിയ പാലം ട്രക്കുകൾക്ക് സുഗമമായ ഒരു ബദൽ വഴിയാകുമെന്നും, ആംബാസഡർ ബ്രിഡ്ജിൽ പതിവായി അനുഭവപ്പെടുന്ന ഗതാഗതക്കുരുക്ക് കുറയ്ക്കാനാകുമെന്നും വിലയിരുത്തുന്നു.
വ്യാപാര ചർച്ചകൾ വീണ്ടും ആരംഭിച്ചതോടെ, അതിർത്തി വ്യാപാരത്തിൽ ആശ്രയിക്കുന്ന കാനഡയുടെയും അമേരിക്കയുടെയും സമ്പദ്വ്യവസ്ഥയ്ക്ക് ഇത് ഒരു നിർണായക മുന്നേറ്റമാകുമെന്ന് വിൻഡ്സറിലെ വ്യവസായ മേഖല പ്രതീക്ഷിക്കുന്നു. അതേസമയം, ഗോർഡി ഹൗ ബ്രിഡ്ജിനെ ട്രംപ് തന്റെ ‘അമേരിക്ക ഫസ്റ്റ്’ അജണ്ട മുന്നോട്ട് നയിക്കാൻ ഒരു സമ്മർദ്ദ ഉപാധിയായി ഉപയോഗിക്കുകയാണെന്നതും വ്യക്തമാണ്.
