ദുബായ്: 2034ലെ ഫിഫ ലോകകപ്പിന് ആതിഥേയ രാഷ്ട്ര പദവി ലഭിച്ച സൗദി അറേബ്യയെ യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഷെയ്ഖ് മുഹമ്മദ് ബിന് റാഷിദ് അല് മക്തൂം അഭിനന്ദിച്ചു. ഫുട്ബോള് അന്താരാഷ്ട്ര ഭരണ സമിതിയായ ഫിഫ ബുധനാഴ്ച ഇതുമായി ബന്ധപ്പെട്ട പ്രഖ്യാപനം നടത്തിയതിനെ തുടര്ന്നാണ് ദുബായ് ഭരണാധികാരിയുടെ അഭിനന്ദനം.
ഒരു വെര്ച്വല് കോണ്ഗ്രസിന് ശേഷമാണ് കഴിഞ്ഞ ദിവസം ഫിഫ പ്രസിഡന്റ് ജിയാനി ഇന്ഫാന്റിനോ ലോകകപ്പ് ആതിഥേയ രാജ്യങ്ങളുടെ വിവരങ്ങള് പ്രഖ്യാപിച്ചത്. 2030, 2034 ലോകകപ്പുകളില് ഓരോന്നിനും ഒരു ബിഡ് മാത്രമേ ഉണ്ടായിരുന്നുള്ളൂവെന്നും അവ രണ്ടും അംഗീകരിക്കപ്പെട്ടതായും അദ്ദേഹം അറിയിച്ചു.
ഫിഫ ലോകകപ്പിനുള്ള ആതിഥേയത്വം നേടിയെടുക്കുന്നതില് സൗദി അറേബ്യയുടെ ‘മഹത്തായ അഭിലാഷത്തെയും’ ‘ശക്തമായ ഇച്ഛാശക്തിയെയും’ പ്രശംസിച്ച അദ്ദേഹം, ഈ ഗുണങ്ങള് വിജയകരവും അവിസ്മരണീയവുമായ ഒരു ടൂര്ണമെന്റ് ഉറപ്പാക്കുമെന്നും അഭിപ്രായപ്പെട്ടു. ഈ സുപ്രധാന നേട്ടത്തിന് എന്റെ സഹോദരന് സല്മാന് ബിന് അബ്ദുല് അസീസ് രാജാവിനെയും കിരീടാവകാശി മുഹമ്മദ് ബിന് സല്മാനെയും സഹോദരന്മാരായ സൗദി ജനതയെയും ഞങ്ങള് അഭിനന്ദിക്കുന്നു- ശെയ്ഖ് മുഹമ്മദ് ഒരു ട്വീറ്റില് കുറിച്ചു.
2030 ലോകകപ്പിന് ആതിഥേയത്വം വഹിക്കാനുള്ള ശ്രമം ഉറപ്പാക്കിയതിന് സ്പെയിനിനും പോര്ച്ചുഗലിനും ഒപ്പം മൊറോക്കോയിലെ മുഹമ്മദ് ആറാമന് രാജാവിനെയും അദ്ദേഹം അഭിനന്ദിച്ചു. മൊറോക്കോ, സ്പെയിന്, പോര്ച്ചുഗല് എന്നിവിടങ്ങളില് നിന്നുള്ള സംയുക്ത നിര്ദ്ദേശപ്രകാരം 2030 ലോകകപ്പ് മൂന്ന് ഭൂഖണ്ഡങ്ങളിലും ആറ് രാജ്യങ്ങളിലും നടക്കും. ടൂര്ണമെന്റിന്റെ ശതാബ്ദി ആഘോഷിക്കാന് ഉറുഗ്വേ, അര്ജന്റീന, പരാഗ്വേ എന്നിവ ആഘോഷ ഗെയിമുകള്ക്ക് ആതിഥേയത്വം വഹിക്കും.
