യുഎഇ-ഒമാൻ റെയിൽ നെറ്റ്വർക്ക് പദ്ധതിയുടെ പ്രവർത്തനങ്ങൾ പുരോഗമിക്കുന്നു. റെയിൽവേ ട്രാക്കുകൾ സ്ഥാപിക്കുന്നതിനായി ഭാരമേറിയ മണ്ണുമാന്തി യന്ത്രങ്ങളും മറ്റ് ഉപകരണങ്ങളും ഇതിനകം തന്നെ വിന്യസിച്ചിട്ടുണ്ട്. 2.5 ബില്യൺ ഡോളറിന്റെ ഈ പ്രോജക്റ്റ് ഗൾഫ് പ്രദേശത്ത് വ്യാപാരവും യാത്രാ സൗകര്യങ്ങളും വിപുലീകരിക്കാൻ ലക്ഷ്യമിട്ട് കൊണ്ടാണ് നടപ്പിലാക്കുന്നത്.
ഈ പദ്ധതി ദ്രുതഗതിയിലുള്ള റെയിൽ ശൃംഖല രണ്ട് രാജ്യങ്ങൾക്കുള്ള കടത്തുമാർഗ്ഗങ്ങൾ മെച്ചപ്പെടുത്തുകയും യാത്രാസൗകര്യങ്ങൾ സുഗമമാക്കുകയും ചെയ്യും. കൂടാതെ ഗതാഗതത്തിന് അടിസ്ഥാനം നൽകുകയും ഗൾഫ് രാജ്യങ്ങൾക്കുള്ള സമ്പർക്കവും ബന്ധങ്ങളും കൂടുതൽ ശക്തമാക്കുകയും ചെയ്യുന്നു.
“ആത്മവിശ്വാസത്തോടെയുള്ള ചുവടുവയ്പ്പുകളിലൂടെ, തങ്ങൾ ഈ വിടവ് നികത്തുകയും നമ്മെ ഒരുമിച്ച് കൊണ്ടുവരുന്ന ഒരു ഭാവി കെട്ടിപ്പടുക്കുകയും ചെയ്യുന്നുവെന്നും. കൂടാതെ ഹഫീത് റെയിൽവേ ശൃംഖല വഴി യുഎഇയെയും ഒമാൻ സുൽത്താനേറ്റിനെയും ബന്ധിപ്പിക്കുന്നതിനുള്ള പാതയിൽ ഓരോ ദിവസവും പുരോഗതി കൈവരിക്കുന്നുവെന്നും നിർമാണ ചുമതലപ്പെടുത്തിയിരിക്കുന്ന കമ്പനിയായ ഹഫീത് റെയിൽ ഒരു ട്വീറ്റിൽ വ്യക്തമാക്കി. ഏകദേശം 2.5 ബില്യൺ ഡോളർ അതായത് ഏകദേശം 960 ദശലക്ഷം ഒമാനി റിയാലുകൾ ഉപയോഗിച്ച് കൊണ്ടാണ് ഈ പദ്ധതി പൂർത്തിയാക്കുക.
രണ്ട് രാജ്യങ്ങളുടെയും വ്യാപാരത്തെ കൂടുതൽ സുഗമമാക്കാനും, ലോകോത്തര സമ്പന്നതകളും കണക്റ്റിവിറ്റിയും സൃഷ്ടിക്കുന്നതിനുള്ള ഒരു വാതിൽ കൂടിയാണ് ഇവിടെ തുറക്കപ്പെടും. കൂടാതെ ഒമാനിലെയും യുഎഇയിലെയും അഞ്ച് തുറമുഖങ്ങളെയും വ്യാവസായിക മേഖലകളെയും ഈ റെയിൽവേ ബന്ധിപ്പിക്കും. ഓരോ ചരക്ക് ട്രെയിൻ യാത്രയിലും 15,000 ടണ്ണിലധികം സാധനങ്ങൾ വഹിക്കുമെന്നാണ് പ്രതീക്ഷ.
ഏകദേശം 270 സ്റ്റാൻഡേർഡ് കണ്ടെയ്നറുകൾ വരും. കൂടാതെ ഈ പദ്ധതി ഇരു രാജ്യങ്ങളുടെ വ്യാപാര പ്രവർത്തനങ്ങൾക്കും സമ്പത്തിക വളർച്ചയ്ക്കും വലിയ പ്രചോദനമാകുമെന്നും ഗതാഗതത്തിനും ലോജിസ്റ്റിക്സ് രംഗത്തും നിർണായകമായ ഒരു പങ്ക് വഹിക്കുന്നുവെന്നും വിദഗ്ധർ പറഞ്ഞു.
ഇത് യാഥാർഥ്യമാകുന്നതോടെ അബുദാബിക്കും സൊഹാറിനും ഇടയിലുള്ള യാത്ര സമയം 100 മിനിറ്റായി കുറയ്ക്കും, ചരക്ക് ട്രെയിനുകളുടെ വേഗത മണിക്കൂറിൽ 120 കിലോമീറ്റർ വരെയാക്കാനാണ് തീരുമാനം. ഈ പുരോഗതി ഗതാഗതത്തെ അതിവേഗവും കാര്യക്ഷമവുമായ രീതിയിൽ പരിഷ്കരിച്ച് കൊണ്ട് രണ്ട് രാജ്യങ്ങളും തമ്മിലുള്ള വ്യാപാരത്തെ മെച്ചപ്പെടുത്തുകയും ലോജിസ്റ്റിക്സ് രംഗത്ത് മികവുറ്റ പ്രവർത്തനങ്ങളെ പ്രോത്സാഹിപ്പിക്കുകയും ചെയ്യുന്നു.
കൂടാതെ പാസഞ്ചർ ട്രെയിനുകൾ മണിക്കൂറിൽ 200 കിലോമീറ്റർ വരെ വേഗതയിൽ സർവീസ് നടത്തുകയും ഇത് വഴി ഓരോ യാത്രയിലും 400 യാത്രക്കാരെ വരെ ഉൾക്കൊള്ളാൻ കഴിയുകയും ചെയ്യും. കൂടാതെ 238 കിലോമീറ്റർ ദൈർഘ്യമുള്ള ഈ റെയിൽവേയിൽ 60 പാലങ്ങളും 2.5 കിലോമീറ്ററിൽ കൂടുതൽ നീളമുള്ള തുരങ്കങ്ങളും ഉൾപ്പെടുന്നതായും റിപ്പോർട്ടിലുണ്ട്.
അതേസമയം ഈ പദ്ധതി ഒമാൻ വിഷൻ 2040 യുഎഇ സെന്റിനിയൽ 2071 എന്നിവയെ പിന്തുണയ്ക്കുന്നു. അതിനാൽ സൊഹാർ തുറമുഖത്തെ യുഎഇ റെയിൽ ശൃംഖലയുമായി ബന്ധിപ്പിക്കുന്നതിലൂടെ, ഗതാഗത, ലോജിസ്റ്റിക് സേവനങ്ങൾക്കുള്ള തന്ത്രപരമായ കേന്ദ്രമെന്ന നിലയിൽ മേഖലയുടെ പങ്ക് വർദ്ധിപ്പിക്കുന്നതിലൂടെ, ഒരു സുപ്രധാന വ്യാപാര ഇടനാഴിയായി ഇത് മാറും.
