ലോകനേതാക്കളുടെയും നിക്ഷേപകരുടെയും സാന്നിധ്യത്തിൽ നടന്ന ചടങ്ങിൽ തന്റെ വേറിട്ട ചിന്താഗതികൾ പങ്കുവെച്ച് യുഎസ് പ്രസിഡന്റ് ഡൊണാൾഡ് ട്രംപ്. അതിസമ്പന്നരും വിജയികളുമായ ആളുകളേക്കാൾ തനിക്ക് സമയം ചെലവഴിക്കാൻ ഇഷ്ടം പരാജയപ്പെട്ടവർക്കൊപ്പമാണെന്ന് ട്രംപ് വെളിപ്പെടുത്തി. വിജയികളുടെ വിജയഗാഥകൾ കേൾക്കാൻ തനിക്ക് താല്പര്യമില്ലെന്നും, പകരം തന്റെ വിജയങ്ങളെക്കുറിച്ച് കേൾക്കാൻ ഇഷ്ടപ്പെടുന്നവർക്കൊപ്പം ഇരിക്കുന്നത് തന്നെ കൂടുതൽ സന്തോഷിപ്പിക്കുമെന്നും അദ്ദേഹം മയാമിയിൽ പറഞ്ഞു.
തന്റെ പ്രസംഗത്തിന് ശേഷമുള്ള ചോദ്യോത്തര വേളയിലാണ് ട്രംപ് ഈ രസകരമായ മറുപടി നൽകിയത്. “ഞാൻ തമാശ പറയുന്നതാണ്, അല്ലെങ്കിൽ ഒരു പരിധിവരെ ഇത് സത്യമാണ്” എന്ന് കൂട്ടിച്ചേർത്ത അദ്ദേഹം, കായികരംഗത്തെപ്പോലെ ജീവിതത്തിലും വിജയികളെയും പരാജിതരെയും പെട്ടെന്ന് തിരിച്ചറിയാൻ കഴിയുമെന്നും അഭിപ്രായപ്പെട്ടു. ആഗോള നേതൃത്വത്തിൽ ഇന്ന് കാണാത്ത പ്രധാന ഗുണം ‘വിജയിക്കാനുള്ള കഠിനമായ ആഗ്രഹം’ (Winning) ആണെന്നും ട്രംപ് ചൂണ്ടിക്കാട്ടി.
ഇറാൻ യുദ്ധത്തെക്കുറിച്ചും ഗൗരവകരമായ വെളിപ്പെടുത്തലുകൾ ട്രംപ് ഈ ചടങ്ങിൽ നടത്തി. ഇറാന്റെ പരമോന്നത നേതാവ് ഇനി ‘പരമോന്നതനല്ല’ എന്നും അദ്ദേഹം കൊല്ലപ്പെട്ടതായും ട്രംപ് അവകാശപ്പെട്ടു. പുതിയ പിൻഗാമിയായി പ്രഖ്യാപിക്കപ്പെട്ട അയത്തുള്ള മുജ്തബ ഖമേനിയും ഒന്നുകിൽ കൊല്ലപ്പെട്ടിരിക്കാം അല്ലെങ്കിൽ മാരകമായി പരിക്കേറ്റിരിക്കാം എന്നാണ് ട്രംപ് പറഞ്ഞത്. ഇറാന്റെ സൈനിക നേതൃത്വം തകർന്നടിഞ്ഞതായും അവരുടെ പ്രതിരോധ സംവിധാനങ്ങൾ യുഎസ് സൈന്യം പൂർണ്ണമായും നിഷ്പ്രഭമാക്കിയതായും അദ്ദേഹം അവകാശപ്പെട്ടു.
മുൻപ് അമേരിക്ക വധിച്ച ഇറാനിയൻ കമാൻഡർ ഖാസിം സുലൈമാനിയെ ‘മഹാനായ നേതാവ്’ എന്നും ‘ഭ്രാന്തനായ പ്രതിഭ’ (Mad Genius) എന്നും ട്രംപ് വിശേഷിപ്പിച്ചു. ഇറാന്റെ മിസൈൽ ശേഖരങ്ങളും ഡ്രോൺ നിർമ്മാണ ശാലകളും അമേരിക്ക തകർത്തു കൊണ്ടിരിക്കുകയാണെന്നും വൈകാതെ തന്നെ ഈ സൈനിക നടപടികൾ അവസാനിക്കുമെന്നും ട്രംപ് പ്രത്യാശ പ്രകടിപ്പിച്ചു.
