വായുവഴി യാത്ര ഇനി സ്വപ്നമല്ല, മിനിറ്റുകൾക്കുള്ളിൽ ലക്ഷ്യസ്ഥാനത്ത് എത്താൻ കഴിയും എന്നതാണ് പുതിയ എയർ ടാക്സി സർവീസ് വാഗ്ദാനം ചെയ്യുന്നത്. രാജ്യത്ത് ആദ്യമായി ആരംഭിക്കാനിരിക്കുന്ന ഈ സർവീസ് നഗര ഗതാഗതത്തെ പുതുവഴിയിലേക്ക് മാറ്റിമറിക്കാൻ പോകുന്നു. ട്രാഫിക് ജാം, വൈകലുകൾ, ദൈർഘ്യമേറിയ യാത്രകൾ എന്നിവ ഇനി ഉണ്ടാകില്ല. ഗതാഗതക്കുരുക്കോ ക്ഷീണമോ ഇല്ലാതെ വായുവിലൂടെ പറന്നുയരുന്ന ഏതാനും മിനിറ്റുകൾക്കുള്ളിൽ നിങ്ങളെ ലക്ഷ്യ സ്ഥാനത്ത് ഇവ എത്തിയ്ക്കും. ആന്ധ്രാപ്രദേശിലെ അനന്തപൂരിലാണ് രാജ്യത്തെ ആദ്യത്തെ ഗിഗാ-സ്കെയിൽ ഇലക്ട്രിക് എയർ ടാക്സി ഫാക്ടറി നിർമ്മിക്കാൻ പോകുന്നത്.
ബെംഗളൂരു ആസ്ഥാനമായുള്ള സർല ഏവിയേഷൻ ആന്ധ്രാപ്രദേശിൽ 500 ഏക്കറിൽ ഒരു വലിയ എയ്‌റോസ്‌പേസ് നിർമ്മാണ കേന്ദ്രം സ്ഥാപിക്കുമെന്ന് പ്രഖ്യാപിച്ചു. ഈ ഹബ് വികസിപ്പിക്കുന്നതിനായി കമ്പനി ആന്ധ്രാപ്രദേശ് സർക്കാരുമായി ഒരു കരാറിൽ ഒപ്പുവച്ചു. സംസ്ഥാന സർക്കാരുമായുള്ള കരാർ പ്രകാരം, ഇന്ത്യയിലെ ആദ്യത്തെ ഗിഗാ-സ്കെയിൽ ഇലക്ട്രിക് എയർ ടാക്സി നിർമ്മാണ ക്ലസ്റ്റർ ഇവിടെ സ്ഥാപിക്കും. ₹1,300 കോടി മുതൽമുടക്കിൽ, ഈ പദ്ധതി ഇന്ത്യയുടെ ആധുനിക വ്യോമയാന ചരിത്രത്തിലെ ഏറ്റവും വലിയ കുതിച്ചുചാട്ടമായി മാറും.
