ഈ ആഴ്ചയും ശക്തമായ ചൂട് തുടരുമെന്ന് കാലാവസ്ഥാ വകുപ്പിന്റെ മുന്നറിയിപ്പ്. ദശലക്ഷക്കണക്കിന് അമേരിക്കക്കാര്‍ ജൂണ്‍ 23 ന് ജോലിയില്‍ തിരിച്ചെത്തുമ്പോള്‍, പ്രത്യേകിച്ച് മിഡ്-അറ്റ്‌ലാന്റിക് മേഖലയില്‍ ചൂട് 100 ഡിഗ്രി വരെ ഉയരാന്‍ സാധ്യതയുണ്ട്. ചുട്ടുപൊള്ളുന്ന താപനിലയെ അവര്‍ക്ക് നേരിടേണ്ടിവരുമെന്നാണ് കാലാവസ്ഥാ വിദഗ്ധര്‍ പറയുന്നത്.
തിങ്കള്‍ മുതല്‍ ബുധന്‍ വരെയുള്ള ദിവസങ്ങളാണ് കടന്നുപോകാന്‍ ഏറ്റവും പ്രയാസമേറിയതെന്ന് നാഷണല്‍ വെതര്‍ സര്‍വീസിന്റെ ഭാഗമായ വെതര്‍ പ്രെഡിക്ഷന്‍ സെന്ററിലെ കാലാവസ്ഥാ നിരീക്ഷകന്‍ ബ്രയാന്‍ ഹര്‍ലി പറഞ്ഞു. മിഡ്വെസ്റ്റ്, മിഡ്-അറ്റ്‌ലാന്റിക്, വടക്കുകിഴക്കന്‍ മേഖലകളില്‍ ഉഷ്ണതരംഗം തുടരുമെന്നും പ്രതീക്ഷിക്കുന്നു. 110 ഡിഗ്രി വരെ ഉയര്‍ന്ന താപനിലയില്‍ ചൂട് മുന്നറിയിപ്പ് കൂടുതല്‍ തീവ്രമാണ്. സാഹചര്യങ്ങള്‍ അപകടകരമാകാമെന്നും ഹര്‍ലി പറഞ്ഞു. ജൂണില്‍ ചിലപ്പോള്‍ താപനില സാധാരണയേക്കാള്‍ 15 ഡിഗ്രിയിലെത്തിയേക്കാമെന്നും ഹര്‍ലി പറഞ്ഞു.
