ന്യൂഡല്‍ഹി: 2026 ഐസിസി ടി20 ലോകകപ്പിന്റെ ഷെഡ്യൂള്‍ അന്താരാഷ്ട്ര ക്രിക്കറ്റ് കൗണ്‍സില്‍ (ഐസിസി) ഔദ്യോഗികമായി പുറത്തുവിട്ടു. ചിരവൈരികളായ ഇന്ത്യയും പാകിസ്താനും ഒരേ ഗ്രൂപ്പിലാണ് വരുന്നത്. ഫൈനല്‍ അഹമ്മദാബാദിലെ നരേന്ദ്ര മോദി സ്റ്റേഡിയത്തില് നടക്കും. ഫൈനലില്‍ ഒരു ടീമായി പാകിസ്താന്‍ വന്നാല്‍ കൊളംബോ ആയിരിക്കും വേദി.
ടൂര്‍ണമെന്റ് ഫെബ്രുവരി ഏഴിന് ആരംഭിച്ച്, മാര്‍ച്ച് എട്ടിന് അവസാനിക്കും. മുംബൈയില്‍ നടന്ന ചടങ്ങില്‍ ഐസിസി ചെയര്‍മാന്‍ ജയ്ഷായാണ് ടൂര്‍ണമെന്റ് ഷെഡ്യൂള്‍ പ്രഖ്യാപിച്ചത്. ഇന്ത്യയും ശ്രീലങ്കയും സംയുക്തമായാണ് ടൂര്‍ണമെന്റിന് ആതിഥ്യം വഹിക്കുന്നത്.
ഇന്ത്യയില്‍ അഞ്ചും ശ്രീലങ്കയില്‍ മൂന്നും വേദികളാണ് നിശ്ചയിച്ചത്. ഡല്‍ഹിയിലെ അരുണ്‍ ജെയ്റ്റ്‌ലി സ്റ്റേഡിയം, കൊല്‍ക്കത്ത ഈഡന്‍ ഗാര്‍ഡന്‍സ്, ചെന്നൈ ചിദംബരം സ്റ്റേഡിയം, അഹമ്മദാബാദ് നരേന്ദ്ര മോദി സ്റ്റേഡിയം, മുംബൈ വാംഖഡെ സ്റ്റേഡിയം എന്നിവയാണ് ഇന്ത്യയിലേത്. പല്ലകെലെ അന്താരാഷ്ട്ര ക്രിക്കറ്റ് സ്റ്റേഡിയം, കൊളംബോയിലെ ആര്‍. പ്രേമദാസ സ്റ്റേഡിയം, കൊളംബോയിലെത്തന്നെ സിന്‍ഹെയ്‌ലിസ് സ്‌പോര്‍ട്‌സ് ക്ലബ് എന്നീ വേദികളാണ് ശ്രീലങ്കയിലുള്ളത്.
ഫെബ്രുവരി ഏഴിന് പാകിസ്താനും നെതര്‍ലന്‍ഡ്‌സും തമ്മിലാണ് ഉദ്ഘാടന മത്സരം. ഇന്ത്യയും പാകിസ്താനും തമ്മില്‍ ഫെബ്രുവരി 15-ന് കൊളംബോയിലെ ആര്‍. പ്രേമദാസ സ്റ്റേഡിയത്തില് ഏറ്റുമുട്ടും. വൈകീട്ട് ഏഴുമണിക്കാണ് മത്സരം. ഫെബ്രുവരി ഏഴിന് മുംബൈയില്‍ യുഎസ്എയുമായിട്ടാണ് ഇന്ത്യയുടെ ആദ്യ മത്സരം. 12-ന് ഡല്‍ഹിയില്‍ നമീബിയയുമായും 15-ന് കൊളംബോയില്‍ പാകിസ്താനുമായും 18-ന് അഹമ്മദാബാദില്‍ നെതര്‍ലന്‍ഡ്‌സുമായും ഏറ്റുമുട്ടുന്നതോടെ ഇന്ത്യയുടെ ഗ്രൂപ്പ് ഘട്ടം അവസാനിക്കും. 2024 ടി20 ലോകകപ്പ് നേടിയ ഇന്ത്യന്‍ ടീം ക്യാപ്റ്റന്‍ രോഹിത് ശര്‍മയാണ് ബ്രാന്‍ഡ് അംബാസഡര്‍.
എ, ബി, സി, ഡി എന്നിങ്ങനെ ടീമുകളെ നാല് ഗ്രൂപ്പുകളായി തിരിച്ചാണ് മത്സരം. ഇന്ത്യ, പാകിസ്താന്‍, യുഎസ്എ, നെതര്‍ലന്‍ഡ്‌സ്, നമീബിയ എന്നീ ടീമുകളാണ് എ ഗ്രൂപ്പിലുള്ളത്. ഓസ്‌ട്രേലിയ, ശ്രീലങ്ക, സിംബാബ്‌വെ, അയര്‍ലന്‍ഡ്, ഒമാന്‍ ടീമുകള്‍ ഗ്രൂപ്പ് ബി-യില്‍. ഇംഗ്ലണ്ട്, വെസ്റ്റ് ഇന്‍ഡീസ്, ബംഗ്ലാദേശ്, നേപ്പാള്‍, ഇറ്റലി ടീമുകള്‍ സി-യിലും ദക്ഷിണാഫ്രിക്ക, ന്യൂസീലന്‍ഡ്, അഫ്ഗാനിസ്താന്‍, കാനഡ, യുഎഇ ടീമുകള്‍ ഗ്രൂപ്പ് ഡി-യിലുമാണ്.
