കഴിഞ്ഞ ഞായറാഴ്ച കൊളംബോയിലെ പി സാറ ഓവൽ സ്റ്റേഡിയവും അവിടുത്തെ കാഴ്ചക്കാരും ചരിത്രപരമായ ഒരു വലിയ നേട്ടത്തിന് ദൃക്സാക്ഷികളായി. ആ നേട്ടം നേടിക്കൊടുത്തവർക്ക് ആ കാഴ്ച വ്യക്തമല്ലെങ്കിലും അവർക്ക് ചുറ്റുമുള്ള കരഘോഷം അവരുടെ കണ്ണും മനസ്സും നിറയ്ക്കുന്നതായിരുന്നു. പ്രഥമ അന്ധവനിതാ ടി20 ലോകകപ്പിന്റെ ഫൈനലിൽ നേപ്പാളിനെ തോൽപിച്ച് ഇന്ത്യയെ വിജയത്തിലെത്തിച്ച 16 വനിതാ ക്രിക്കറ്റർമാർ. ഇന്ത്യയ്ക്ക് അഭിമാനമായി മാറിയ, എവിടെയോ വീണുപോയ ഒരുപാട് പേർക്ക് മുന്നോട്ടു കുതിക്കാനുള്ള ഊർജമായി മാറിയ 16 വനിതാരത്നങ്ങൾ!
ഗ്രാമങ്ങളിൽ നിന്നും ഇന്ത്യയുടെ മനസ്സിലേക്ക്
ക്രിക്കറ്റിൽ പങ്കെടുത്ത 16 വനിതകളിൽ ഭൂരിഭാഗവും രാജ്യത്തുടനീളമുള്ള ചെറിയ ഗ്രാമങ്ങളിൽ നിന്നുള്ളവരാണ്. അവരിൽ പലരും കർഷക കുടുംബങ്ങൾ, അവസരങ്ങൾ തീരെ കുറവുള്ള സാധാരണ സർക്കാർ സ്കൂളുകൾ എന്നിവിടങ്ങളിൽ നിന്നുള്ളവരായിരുന്നു. ലോകകപ്പ് നേടിയ ഈ ടീമിൽ ഉൾപ്പെട്ട 16 കളിക്കാർ ഇത്തരത്തിൽ ഒൻപതു സംസ്ഥാനങ്ങളിൽ നിന്നുള്ളവരാണ്. ക്രിക്കറ്റ് അവരുടെ ജീവിതത്തിലേക്കു കടന്നുവന്നത് അക്കാദമികളിലൂടെയോ, ഔപചാരിക സ്കൗട്ടിംഗ് സംവിധാനങ്ങളിലൂടെയോ ആയിരുന്നില്ല. അവരിൽ നിന്നും പ്രത്യേകിച്ച് ഒന്നും പ്രതീക്ഷിക്കാത്ത സമൂഹമായിരുന്നു ഇത്. എന്നാൽ അതേ സമൂഹത്തിനു മുന്നിലൂടെയാണ് അവർ ഇന്ത്യയുടെ വിജയപതാക പാറിച്ചത്.
എല്ലാ താഴ്ത്തിക്കെട്ടലുകൾക്കും മേലെ വരിച്ച വിജയം
നിങ്ങൾ അന്ധരാണ്, നിങ്ങൾക്ക് എന്തുചെയ്യാൻ കഴിയും? തനിക്കു ചുറ്റും കേൾക്കേണ്ടിവന്ന ഈ ചോദ്യത്തിനു മുൻപിൽ പലപ്പോഴും ദീപിക പതറിപ്പോയിരുന്നു. എന്നാൽ ഇന്ന് അവൾക്ക് അതിന് ഉത്തരമുണ്ട്. ഇന്ത്യൻ അന്ധവനിതാ ക്രിക്കറ്റ് ടീമിന്റെ ക്യാപ്റ്റനായി ട്രോഫി ഉയർത്തിയ ശേഷം വികാരഭരിതയായി ദീപിക അത് പറഞ്ഞു: “ഇന്ന് ഞങ്ങൾക്ക് കൃത്യമായി എന്തുചെയ്യാൻ കഴിയുമെന്ന് ഞങ്ങൾ അവർക്ക് കാണിച്ചുകൊടുത്തു.”
കർണാടകയിലെ ഒരു ഗ്രാമത്തിൽ ജനിച്ചുവളർന്ന ദീപികയ്ക്ക് നന്നേ ചെറുപ്പത്തിൽ ഒരു അപകടത്തെത്തുടർന്നാണ് കാഴ്ചശക്തി ഭാഗികമായി നഷ്ടപ്പെട്ടത്. കുട്ടിക്കാലം മുഴുവൻ കൃഷിയിടങ്ങളിൽ കുടുംബത്തെ സഹായിച്ചുകൊണ്ട് ദീപിക ചെലവഴിച്ചു. കായികരംഗം ഒരു പുതിയ വ്യക്തിത്വം നൽകുമെന്ന് ഒരിക്കലും കരുതിയിരുന്നില്ല. എന്നാൽ ക്രിക്കറ്റ് പതുക്കെ അവർക്ക് ആത്മവിശ്വാസം നൽകിത്തുടങ്ങി. ഇന്ന്, അവർ ഇന്ത്യയുടെ ദേശീയടീമിനെ നയിക്കുകയും ആദായനികുതി വകുപ്പിൽ ജോലിചെയ്യുകയും ചെയ്യുന്നു. അവൾ അവളുടെ കുടുംബത്തിന്റെ വരുമാനം മാത്രമല്ല, ആ നാടിന്റെ അഭിമാനവുമാണ് ദീപിക.
വൈസ് ക്യാപ്റ്റൻ ഗംഗാ കദത്തിന്റെയും ജീവിതവും ഇതുപോലെ തന്നെയാണ്. മഹാരാഷ്ട്രയിലെ ഒൻപതു മക്കളുള്ള ഒരു കുടുംബത്തിലാണ് അവളുടെ ജനനം. കർഷകനായ അച്ഛൻ അവളുടെ ഭാവി സുരക്ഷിതമാക്കാൻ അവളെ അന്ധർക്കായുള്ള ഒരു സ്കൂളിൽ ചേർത്തു. ഒരു വിനോദമായി തുടങ്ങിയ ക്രിക്കറ്റ് പക്ഷെ, അവളുടെ ജീവിതത്തെ തന്നെ മാറ്റിമറിച്ചു. ഒരു അധ്യാപിക അവളിൽ എന്തോ ഒന്ന് ഉണ്ടെന്ന് കണ്ടെത്തി. അവളെ കൂടുതൽ പ്രോത്സാഹിപ്പിച്ചു.
ടീമിലുള്ള ഓരോരുത്തർക്കുമുണ്ട് ഇത്തരത്തിൽ ഓരോ കഥകൾ. ഇരുട്ടിന്റെ പശ്ചാത്തലത്തിൽ ഇന്ത്യയ്ക്ക് അഭിമാനമായി മാറിയ ഇവരുടെ വിജയം മറ്റുള്ളവർക്ക് ഒരു വെളിച്ചമാണ്. തകർന്ന പ്രതീക്ഷകളിൽ തളരാതെ പുതിയ വിജയം തുന്നിച്ചേർക്കാനുള്ള പ്രചോദനമാണ്, ഒരു ഇരിട്ടിലും തകർന്നുപോകില്ലെന്ന ആത്മവിശ്വാസമാണ്.
