പട്ടാള നിയമം അടിച്ചേല്പ്പിക്കാന് ശ്രമിച്ച് പരാജയപ്പെട്ട ദക്ഷിണ കൊറിയന് പ്രസിഡന്റ് യൂന് സൂക് യോലിനെ പാര്ലമെന്റ് ഇംപീച്ച് ചെയ്തു. 300 അംഗ പാര്ലമെന്റില് 204 പേര് ഇംപീച്ച്മെന്റിന് അനുകൂലമായി വോട്ട് ചെയ്തപ്പോള് 85 പേര് എതിര്ത്തു. ഇംപീച്ച്മെന്റ് പ്രമേയത്തിന്റെ പകര്പ്പ് ഭരണഘടനാ കോടതിക്കു കൈമാറും. പ്രസിഡന്റിനെ നീക്കുന്ന കാര്യത്തില് കോടതിയാവും അന്തിമ തീരുമാനമെടുക്കുക.
യൂന് സൂക് യോലിനെ പ്രസിഡന്റ് സ്ഥാനത്ത് നിലനിര്ത്തണോ എന്ന കാര്യത്തില് 180 ദിവസത്തിനകം കോടതി തീരുമാനമെടുക്കണം. പ്രസിഡന്റ് സ്ഥാനത്ത് നിന്ന് പുറത്താക്കപ്പെട്ടാല് 60 ദിവസത്തിനുള്ളില് അടുത്ത പ്രസിഡന്റിനെ കണ്ടെത്തുന്നതിനായി തെരഞ്ഞെടുപ്പ് നടത്തണം.ഇംപീച്ച് പ്രമേയത്തിലെ രണ്ടാമത്തെ വോട്ടാണ് ഇന്നു നടന്നത്.
കഴിഞ്ഞ ശനിയാഴ്ച ഭരണകക്ഷിയിലെ മിക്ക അംഗങ്ങളും വോട്ട് ബഹിഷ്കരിച്ചതുകാരണം ഇംപീച്ച്മെന്റില് നിന്ന് യൂന് രക്ഷപ്പെടുകയായിരുന്നു. എന്നാല് യൂനിനെതിരായ പൊതുജന പ്രതിഷേധം ശക്തമാവുകയും അദ്ദേഹത്തിന്റെ ജനപ്രീതി കുറയുകയും ചെയ്തതോടെ രണ്ടാമത്തെ വോട്ടെടുപ്പില് ഇംപീച്ച്മെന്റിന് അനുകൂലമായി വോട്ട് ചെയ്യാന് പീപ്പിള് പവര് പാര്ട്ടിയിലെ അംഗങ്ങള് തീരുമാനിക്കുകയായിരുന്നു.
