കാനഡയിലെ സറെയിലുള്ള ‘ചായ് സുട്ട ബാർ’ കഫേയിൽ നടന്ന വെടിവെപ്പിന്റെ ഉത്തരവാദിത്തം ലോറൻസ് ബിഷ്ണോയി ഗുണ്ടാസംഘം ഏറ്റെടുത്തു. ലോറൻസ് ബിഷ്ണോയി സംഘത്തിലെ അംഗങ്ങളായ ടൈസൺ ബിഷ്ണോയി, ജോറ സന്ധു എന്നിവരുടേതെന്ന് കരുതപ്പെടുന്ന സോഷ്യൽ മീഡിയ പോസ്റ്റുകളിലൂടെയാണ് ഇക്കാര്യം അറിയിച്ചത്.
പ്രശസ്ത ഇന്ത്യൻ ഹാസ്യനടൻ കപിൽ ശർമ്മയുടെ ‘കാപ്സ് കഫേ’ (Kaps Cafe) എന്ന സ്ഥാപനത്തിന് തൊട്ടടുത്താണ് വെടിവെപ്പ് നടന്ന കഫേ സ്ഥിതി ചെയ്യുന്നത്.രാത്രികാലത്താണ് കഫേയ്ക്ക് നേരെ വെടിവെപ്പ് നടന്നതെന്നും ഇത് ഒരു മുന്നറിയിപ്പ് മാത്രമാണെന്നും സോഷ്യൽ മീഡിയ പോസ്റ്റിൽ പറയുന്നു.
കപിൽ ശർമ്മയെയും കഫേ ഉടമകളെയും നേരിട്ട് ഭീഷണിപ്പെടുത്തുന്ന പോസ്റ്റിൽ, തങ്ങളുടെ ആവശ്യങ്ങൾ അംഗീകരിച്ചില്ലെങ്കിൽ കഫേ പൂട്ടിക്കുമെന്നും കപിൽ ശർമ്മയെ ലക്ഷ്യം വെക്കുമെന്നും സംഘം മുന്നറിയിപ്പ് നൽകി. തങ്ങളുടെ സമയം ഇനിയും പാഴാക്കിയാൽ മുംബൈയിലെ കപിൽ ശർമ്മയുടെ വീടിന് നേരെയും ആക്രമണം ഉണ്ടായേക്കാമെന്ന് പോസ്റ്റിൽ പറയുന്നു. ഈ സംഭവത്തിൽ അധികൃതരുടെ ഭാഗത്തുനിന്നും ഔദ്യോഗിക സ്ഥിരീകരണങ്ങളൊന്നും ഇതുവരെ ലഭ്യമായിട്ടില്ല.
