യുഎസ്-ഇറാൻ സംഘർഷം തുടരുന്നതിനിടെ ടെഹ്റാന് മുന്നറിയിപ്പുമായി സൗദി അറേബ്യ. സംഘർഷങ്ങൾ ലഘൂകരിക്കുന്നതിന് നയതന്ത്രപരമായ പരിഹാരം തേടുമെന്നും എന്നാൽ സൗദി അറേബ്യയ്ക്കോ അതിന്റെ ഊർജ്ജ സൗകര്യങ്ങൾക്കോ നേരെയുള്ള ആക്രമണങ്ങൾ തുടർന്നാൽ പ്രതികാരം ചെയ്യാൻ മടിക്കില്ലെന്നും സൗദി അറേബ്യ അറിയിച്ചു. ഗൾഫ് രാജ്യങ്ങളോട് ക്ഷമാപണം നടത്തിയ ഇറാൻ പ്രസിഡന്റ് മസൂദ് പെഷേഷ്കിയന്റെ പ്രസ്താവനയ്ക്ക് മുമ്പാണ് സൗദി അറേബ്യയിൽ നിന്നുള്ള ഈ സന്ദേശം.
അയൽരാജ്യങ്ങളിൽ ഇറാൻ നടത്തിയ സൈനിക നടപടി മൂലമുണ്ടായ നാശനഷ്ടങ്ങളിൽ ഖേദമുണ്ടെന്ന് പ്രസിഡന്റ് മസൂദ് പെഷേഷ്കിയാൻ പറഞ്ഞു . മേഖലയിൽ വളർന്നുവരുന്ന കോപം ശമിപ്പിക്കാനുള്ള ശ്രമമായാണ് ഇതിനെ കണ്ടത്. എന്നിരുന്നാലും, അദ്ദേഹത്തിന്റെ പ്രസ്താവന പുതിയ ഇടക്കാല ഭരണകൂടത്തിനുള്ളിൽ ഒരു വിള്ളൽ സൃഷ്ടിച്ചു, ഐആർജിസിയിലെ നേതാക്കളും മറ്റ് മതനേതാക്കളും അദ്ദേഹത്തിനെതിരെ പ്രതിഷേധിച്ചു. പ്രസിഡന്റ് പെഷേഷ്കിയൻ പിന്നീട് തന്റെ പ്രസ്താവന പിൻവലിക്കാൻ നിർബന്ധിതനായി.
രണ്ട് ദിവസം മുമ്പ് സൗദി വിദേശകാര്യ മന്ത്രി പ്രിൻസ് ഫൈസൽ ബിൻ ഫർഹാൻ ഇറാനിയൻ വിദേശകാര്യ മന്ത്രി അബ്ബാസ് അരഘ്ചിയുമായി ഫോണിൽ സംസാരിച്ചതായി റോയിട്ടേഴ്സ് റിപ്പോർട്ട് ചെയ്തു. ഈ സംഭാഷണത്തിൽ സൗദി അറേബ്യ നിലപാട് വ്യക്തമാക്കിയതായി വൃത്തങ്ങൾ അറിയിച്ചു. “സംഘർഷങ്ങൾ കുറയ്ക്കാനും സംഭാഷണത്തിലൂടെ പരിഹാരം കണ്ടെത്താനുമുള്ള എല്ലാ ശ്രമങ്ങളെയും സൗദി അറേബ്യ പിന്തുണയ്ക്കുന്നു” എന്ന് ഫൈസൽ രാജകുമാരൻ പ്രസ്താവിച്ചു.
