ഭാരതത്തിന്റെ ഭരണഘടന ഉറപ്പ് നൽകുന്ന മനഃസാക്ഷിയുടെയും വിശ്വാസത്തിന്റെയും കാര്യങ്ങളിലുള്ള സ്വാതന്ത്ര്യം സംരക്ഷിക്കുന്നതിനുള്ള ശ്രമങ്ങളുമായി ഇന്ത്യയിലെ കത്തോലിക്കാസഭ മുന്നോട്ട് നീങ്ങുകയാണെന്ന് ഫീദെസ് ഏജൻസി റിപ്പോർട്ട് ചെയ്തു. 2025 സെപ്റ്റംബറിൽ രാജസ്ഥാനിലെ സംസ്ഥാനനിയമസഭ “രാജസ്ഥാൻ നിയമവിരുദ്ധ മതപരിവർത്തന നിരോധന നിയമം 2025” പാസാക്കിയതിന്റെയും, മഹാരാഷ്ട്രയിലെ ഗവണ്മെന്റ് സമാനനിയമം പാസാക്കാനുള്ള ശ്രമങ്ങളുമായി മുന്നോട്ട് പോകുന്നതിന്റെയും പശ്ചാത്തലത്തിലാണ് സഭ ഇത്തരം പ്രതിരോധശ്രമങ്ങൾ മുന്നോട്ട് വയ്ക്കുന്നതെന്ന് പ്രാദേശിക ഘടകങ്ങളെ പരാമർശിച്ച് ഫീദെസ് എഴുതി.
രാജസ്ഥാനിൽ നിയമവിരുദ്ധ മതപരിവർത്തനത്തിനെതിരെയുള്ള നിയമം എന്ന പേരിൽ പാസാക്കപ്പെട്ട തീരുമാനത്തിനെതിരെ അവിടെയുള്ള “ജയ്‌പൂർ കത്തോലിക്കാ വെൽഫയർ സൊസൈറ്റി” സുപ്രീം കോടതിയിൽ അപേക്ഷ സമർപ്പിച്ചിരുന്നു. ഇത്തരം നിയമം രാജ്യത്തെ ഭരണഘടനയ്ക്ക് എതിരാണെന്നും, ജനങ്ങളിൽ ഭയം ജനിപ്പിക്കാനും, മതപരിവർത്തനത്തിൽനിന്ന് പിന്മാറാൻ പ്രേരിപ്പിക്കാനുമേ സഹായിക്കൂ എന്ന് സംഘടന പരാതിപ്പെട്ടു. ഈ പരാതിയുടെ സാദ്ധ്യതകൾ പരിഗണിച്ച കോടതി, രാജസ്ഥാൻ ഗവൺമെന്റിനോട് വിശദീകരണം ആവശ്യപ്പെട്ടിട്ടുണ്ടെന്ന് സംഘടനയെ പ്രതിനിധീകരിച്ച അഡ്വ. രാജീവ് ധവാൻ അറിയിച്ചതായി ഫീദെസ് റിപ്പോർട്ട് ചെയ്തു.
“നിയമവിരുദ്ധ മതപരിവർത്തന നിരോധന നിയമം” എന്ന പേരിലുള്ള നിയമമനുസരിച്ച്, തെറ്റായ പ്രസ്താവനകളിലൂടെയോ, ബലപ്രയോഗത്തിലൂടെയോ, അനാവശ്യ സ്വാധീനത്തിലൂടെയോ, നിർബന്ധം മൂലമോ, പ്രീതിപ്പെടുത്തിയോ, മറ്റേതെങ്കിലും വഞ്ചനാപരമായ മാർഗ്ഗങ്ങളിലൂടെയോ, വിവാഹത്തിലൂടെയോ നടക്കുന്ന മതപരിവർത്തനങ്ങളെ “നിയമവിരുദ്ധമെന്നും, അസാധുവെന്നുമാണ്” കണക്കാക്കുന്നതെന്ന് ഫീദെസ് എഴുതി. എന്നാൽ, “പ്രീതിപ്പെടുത്തൽ” പോലെയുള്ള പദങ്ങൾ ഉപയോഗിക്കുന്നത്, ഏത് മതപരിവർത്തനത്തെയും നിയമവിരുദ്ധമായി വ്യാഖ്യാനിക്കാൻ വഴി നൽകുന്നതാണെന്നും, അങ്ങനെ, വ്യക്തികളുടെ മനഃസാക്ഷിയനുസരിച്ചുള്ള സ്വതന്ത്ര തിരഞ്ഞെടുപ്പിനെ ഹനിക്കുന്നതാണെന്നും ജയ്‌പൂരിലെ കാതോലിക്കാസമൂഹം വിലയിരുത്തി.
മഹാരാഷ്ട്രയിൽ ഇത്തരമൊരു നിയമം പ്രാബല്യത്തിൽ കൊണ്ടുവരാൻ വേണ്ടിയുള്ള ശ്രമങ്ങൾ നടക്കുന്നതിന്റെ പശ്ചാത്തലത്തിൽ, അവിടെയുള്ള പ്രാദേശിക കത്തോലിക്കർ, മുഖ്യമന്ത്രി ദേവേന്ദ്ര പദ്നാവിസിന് ഇതിനെതിരെ ഒരു തുറന്ന കത്തയച്ചതായി ഫീദെസ് റിപ്പോർട്ട് ചെയ്തു. മതം ഒരാളുടെ വ്യക്തിപരമായ വിശ്വാസത്തിന്റെ ഭാഗമാണെന്നും, അത് മനഃസാക്ഷിയുടെ കാര്യമാണെന്നും, “ഇന്ത്യൻ കത്തോലിക്കാ യൂണിയൻ” അംഗവും അഡ്വക്കേറ്റുമായ റാഫേൽ ഡിസൂസ ഫീദെസ് ഏജൻസിയോട് പറഞ്ഞു. ഏഷ്യയിലെ തന്നെ ഏറ്റവും വലിയ അല്മായ പ്രസ്ഥാനമായാണ് ഒന്നരക്കോടിയോളം അംഗങ്ങളുള്ള ഇന്ത്യൻ കത്തോലിക്കാ യൂണിയൻ (All India Catholic Union).
തങ്ങളുടെ വിശ്വാസം പാലിക്കാനും, പ്രഘോഷിക്കാനും, പരത്താനുമുള്ളത് ഭരണഘടനാ നൽകുന്ന അടിസ്ഥാനപരമായ അവകാശമാണെന്ന് അഡ്വ. ഡിസൂസ പറഞ്ഞു. എന്നാൽ “നിർബന്ധിത മതപരിവർത്തനം” കുറയ്ക്കുക എന്ന ന്യായം മുൻ നിറുത്തി, ഇതിനോടകം രാജ്യത്തെ 12 സംസ്ഥാനങ്ങൾ “മതസ്വാതന്ത്ര്യം സംബന്ധിച്ച നിയമം” എന്ന മതപരിവർത്തനം നിരോധന നിയമം നടപ്പിലാക്കിക്കഴിഞ്ഞു എന്നും അദ്ദേഹം വിശദീകരിച്ചു.
നാളിതുവരെ ക്രൈസ്തവ മിഷനറിമാർക്കെതിരെ മതപരിവർത്തനവുമായി ബന്ധപ്പെട്ട നിരവധി കുറ്റാരോപണങ്ങൾ ഉണ്ടായെങ്കിലും, അവയുമായി ബന്ധപ്പെട്ട് ശിക്ഷാനിരക്ക് ഏതാണ്ട് പൂജ്യമായാണ് തുടരുന്നതെന്ന് അഡ്വ. ഡിസൂസ പ്രസ്താവിച്ചു. ക്രൈസ്തവ സഭാപ്രസ്ഥാനങ്ങൾ നടത്തിവരുന്ന കാരുണ്യ, വിദ്യാഭ്യാസ പ്രവർത്തനങ്ങളെ തടസ്സപ്പെടുത്താനാണ് ഇത്തരം നിയമങ്ങൾ അന്യായമായി ഉപയോഗിക്കപ്പെടുന്നതെന്ന് ആരോപിച്ച അദ്ദേഹം, അരികുവത്കരിക്കപ്പെട്ടതും അടിച്ചമർത്തപ്പെട്ടതുമായ സമൂഹങ്ങൾക്ക് ലഭിക്കേണ്ട സഹായങ്ങളാണ് ഇതുവഴി തടസ്സപ്പെടുന്നതെന്ന് ഓർമ്മപ്പെടുത്തി.
മഹാരാഷ്ട്രയിൽ നാളിതുവരെ മതേതരസർക്കാരാണ് നിലനിന്നിരുന്നതെന്നും, മതപരിവർത്തനനിയമത്തിനെതിരെ അത് ശക്തിപൂർവ്വം പിടിച്ചുനിന്നിരുന്നുവെന്നും മുഖ്യമന്ത്രിക്ക് എഴുതിയ, പ്രാദേശിക കത്തോലിക്കർ, നിലവിലെ ജനസംഖ്യാകണക്കുകൾ ഇത്തരമൊരു നിയമം ആവശ്യപ്പെടുന്നുണ്ടോയെന്ന് ചോദിച്ചു. മഹാരാഷ്ട്ര സംസ്ഥാനം രൂപം കൊണ്ട സമയത്ത് അവിടുത്തെ ഹൈന്ദവർ 82.24 ശതമാനവും ക്രൈസ്തവർ 1.42 ശതമാനവും ആയിരുന്നെന്നും, നിലവിൽ അവിടെയുള്ള ക്രൈസ്തവർ 0.96 ശതമാനം മാത്രമാണെന്നും ഫീദെസ് എഴുതി.
1961-ൽ ഭാരതത്തിലെ ജനസംഖ്യയുടെ 2.44 ശതമാനമായിരുന്ന ക്രൈസ്തവർ 2011-ലെ കണക്കുകൾ പ്രകാരം 2.30 ശതമാനമായി കുറഞ്ഞിട്ടും, ക്രൈസ്തവർക്കുനേരെയുള്ള അതിക്രമങ്ങൾ വർദ്ധിച്ചിട്ടുണ്ടെന്നും, 2024-ൽ മാത്രം രാജ്യത്ത് 840-ഓളം ഇത്തരം സംഭവങ്ങൾ ഉണ്ടായിട്ടുണ്ടെന്നും പ്രാദേശികാവൃത്തങ്ങളെ അധികരിച്ച് ഫീദെസ് റിപ്പോർട്ട് ചെയ്തു.
