ബംഗ്ലാദേശിലെ വിദ്യാര്ത്ഥി നേതാവ് ഷരീഫ് ഒസ്മാന് ഹാദിയെ കൊലപ്പെടുത്തിയ കേസിലെ പ്രധാന പ്രതികളില് ഒരാളായ ഫൈസല് കരീം മസൂദ് യുഎഇയില്. ഇന്ത്യയിലേക്ക് കടന്നെന്ന് ബംഗ്ലാദേശ് പൊലീസ് അവകാശപ്പെട്ട പ്രതിയാണ് ഇപ്പോള് യുഎഇയില് ആണെന്ന് വെളിപ്പെടുത്തി വീഡിയോ ഇട്ടിരിക്കുന്നത്.
ദുബായിലാണ് നിലവിള്ളതെന്നാണ് വീഡിയോയില് ഫൈസല് പറയുന്നത്. ഒസ്മാന് ഹാദിയെ താന് കൊലപ്പെടുത്തിയിട്ടില്ലെന്നും തന്നെയും കുടുംബത്തെയും കേസില് കുടുക്കുകയായിരുന്നുവെന്നും ജീവന്രക്ഷാര്ത്ഥമാണ് ദുബായിലേക്ക് വന്നതെന്നും ഫൈസല് വീഡിയോയില് പറയുന്നു. ഹാദിയുടെ കൊലയ്ക്ക് പിന്നില് ജമാഅത്തെ ഇസ്ലാമിയാണ്. ഹാദിയെ വാര്ത്തെടുത്തത് തന്നെ ജമാഅത്തെ ഇസ്ലാമിയാണെന്നും ജമാഅത്തെ പ്രവര്ത്തകരാണ് ഹാദിയെ കൊലപ്പെടുത്തിയതെന്നും ഫൈസല് കരീം പറഞ്ഞു.
നേരത്തേ ഒസ്മാന് ഹാദി വധക്കേസിലെ പ്രധാന പ്രതികളായ ഫൈസല് കരീം മസൂദും ആലംഗീര് ഷെയ്ഖും ഇന്ത്യയിലേക്ക് കടന്നുവെന്ന അവകാശവാദവുമായി ധാക്ക മെട്രോപോളിറ്റന് പൊലീസ് രംഗത്തെത്തിയിരുന്നു. മേഘാലയയിലെ ഹാലുഘട്ട് അതിര്ത്തി വഴി പ്രതികള് കടന്നതായായിരുന്നു പൊലീസിന്റെ വാദം.
