നൈജീരിയയിലെ കെബ്ബി സ്റ്റേറ്റിലുള്ള ഗവൺമെന്റ് ഗേൾസ് സെക്കൻഡറി സ്കൂളിൽ നിന്ന് നവംബർ 17 ന് തട്ടിക്കൊണ്ടുപോകപ്പെട്ട 24 പെൺകുട്ടികൾ മോചിതരായി. പെൺകുട്ടികളുടെ മോചനത്തെ യുകെ ആസ്ഥാനമായുള്ള മനുഷ്യാവകാശ സംഘടനയായ ക്രിസ്റ്റിൻ സോളിഡാരിറ്റി വേൾഡ്‌വൈഡ് (സി എസ് ഡബ്ലിയു) സ്വാഗതം ചെയ്തു.
പെൺകുട്ടികളുടെ മോചനം ഉറപ്പാക്കുന്നതിൽ സുരക്ഷാ സംവിധാനങ്ങൾ കാണിച്ച കാര്യക്ഷമതയെ സിഎസ്ഡബ്ല്യു സിഇഒ സ്കോട്ട് ബോവർ നവംബർ 26 ന് ബുധനാഴ്ച പുറത്തിറക്കിയ ഒരു റിപ്പോർട്ടിൽ അഭിനന്ദിക്കുകയും കുറ്റവാളികളെ പിടികൂടുന്നതിൽ ഉണ്ടായ പരാജയത്തിൽ ആശങ്ക പ്രകടിപ്പിക്കുകയും ചെയ്തു. “ഈ മാസം ആദ്യം കെബ്ബി സ്റ്റേറ്റിലെ സ്കൂളിൽ നിന്ന് തട്ടിക്കൊണ്ടുപോയ 24 പെൺകുട്ടികളുടെ മോചനത്തെ സിഎസ്ഡബ്ല്യു സ്വാഗതം ചെയ്യുന്നു”- മിസ്റ്റർ ബോവർ റിപ്പോർട്ടിൽ പറയുന്നു, പൊലീസ് തന്ത്രപരമായ യൂണിറ്റുകൾ, സൈനിക ഉദ്യോഗസ്ഥർ, ജാഗ്രതാ ഗ്രൂപ്പുകൾ എന്നിവ ഉൾപ്പെട്ട ഒരു ഓപ്പറേഷനിലൂടെയാണ് പെൺകുട്ടികളുടെ രക്ഷാപ്രവർത്തനം സാധ്യമായത്.
“രക്ഷാപ്രവർത്തനങ്ങളെ ചുറ്റിപ്പറ്റിയുള്ള വിവരങ്ങളുടെ ദൗർലഭ്യം, അതിൽ കുറ്റവാളികൾക്ക് യാതൊരു ശിക്ഷാ നടപടികളും നേരിടേണ്ടി വന്നിട്ടില്ലെന്ന് തെളിയിക്കുന്നു. ഇത് ആശയക്കുഴപ്പമുണ്ടാക്കുന്നതിനൊപ്പം, പൊതുജനവിശ്വാസത്തെയും നിയമവാഴ്ചയെയും കൂടുതൽ ദുർബലപ്പെടുത്തുന്നു”- സിഎസ്ഡബ്ല്യു സിഇഒ വെളിപ്പെടുത്തി.
നവംബർ 17 ന് പുലർച്ചെ നാലുമണിയോടെ സായുധരായ അക്രമികൾ സ്കൂളിന്റെ മതിലുകൾ ചാടിക്കടന്ന് വിദ്യാർഥികളെ തട്ടിക്കൊണ്ടുപോകുകയായിരുന്നു. അസിസ്റ്റന്റ് പ്രിൻസിപ്പൽ കൊല്ലപ്പെടുകയും ഒരു സുരക്ഷാ ജീവനക്കാരന് ഗുരുതരമായി പരിക്കേൽക്കുകയും ചെയ്തു. അദ്ദേഹം പിന്നീട് ആശുപത്രിയിൽ മരിച്ചു. ഒരു സൈനിക സംഘം സ്കൂൾ പരിസരം വിട്ടതിന് തൊട്ടുപിന്നാലെയാണ് തട്ടിക്കൊണ്ടുപോകലുകൾ നടന്നതെന്ന് റിപ്പോർട്ടുണ്ട്.
