നൈജീരിയയിലെ കെബ്ബിയിലുള്ള ഒരു സ്കൂളിൽ നിന്ന് ആയുധധാരികളായ അക്രമികൾ തട്ടിക്കൊണ്ടുപോയ 24 വിദ്യാർഥിനികളെ രക്ഷപെടുത്തിയതായി നൈജീരിയൻ പ്രസിഡന്റ് ബോല ടിനുബു വെളിപ്പെടുത്തി. വിദ്യാർഥിനികളുടെ മോചനത്തെ നൈജീരിയൻ പ്രസിഡന്റ് സ്വാഗതം ചെയ്യുകയും ഇപ്പോഴും ബന്ദികളായിരിക്കുന്നവരെ മോചിപ്പിക്കാനുള്ള ശ്രമങ്ങൾ ഊർജിതമാക്കാൻ സുരക്ഷാസേനയോട് ആഹ്വാനം ചെയ്യുകയും ചെയ്തു.
“24 വിദ്യാർഥിനികളെയും രക്ഷപെടുത്താൻ നമുക്കു സാധിച്ചു. ഇനി, കൂടുതൽ തട്ടിക്കൊണ്ടുപോകൽ സംഭവങ്ങൾ ഒഴിവാക്കാൻ ദുർബലപ്രദേശങ്ങളിൽ കൂടുതൽ സേനകളെ അടിയന്തരമായി സ്ഥാപിക്കണം” – ടിനുബു പറഞ്ഞതായി പ്രസ്താവനയിൽ പറയുന്നു. അതേസമയം, രക്ഷാദൗത്യത്തെക്കുറിച്ച് കൂടുതൽ വിവരങ്ങൾ പുറത്തുവിട്ടിട്ടില്ല.
നവംബർ 17 ന് കെബ്ബി സംസ്ഥാനത്തെ ഒരു സൈനികവിഭാഗം സ്കൂൾ വിട്ടതിന് തൊട്ടുപിന്നാലെ സായുധരായ അക്രമികൾ സ്കൂളിൽ അതിക്രമിച്ചു കയറുകയും 24 വിദ്യാർഥിനികളെ തട്ടിക്കൊണ്ടു പോവുകയുമായിരുന്നു. നൈജീരിയയിൽ അടുത്തിടെ നടന്ന കൂട്ട തട്ടിക്കൊണ്ടുപോകലുകളുടെ ഒരു പരമ്പരയായിരുന്നു കെബ്ബിയിലുണ്ടായ ആക്രമണം.
