നീറ്റ് പരീക്ഷാ ക്രമക്കേടുകളും തുടർന്നുണ്ടായ പരീക്ഷ റദ്ദാക്കലും സൃഷ്ടിച്ച കടുത്ത മാനസിക സമ്മർദ്ദത്തെ തുടർന്ന് മധ്യപ്രദേശിൽ വിദ്യാർത്ഥിനി ജീവനൊടുക്കി. മൗഗഞ്ച് ജില്ല സ്വദേശിയായ ആകാൻഷ ചതുർവേദിയാണ് ആത്മഹത്യ ചെയ്തത്. വീണ്ടും പരീക്ഷ എഴുതാൻ തനിക്ക് ധൈര്യമില്ലെന്ന് വ്യക്തമാക്കുന്ന ആത്മഹത്യക്കുറിപ്പ് പോലീസ് കണ്ടെടുത്തു.
കഴിഞ്ഞ മെയ് 3-നാണ് രാജ്യത്തെ ലക്ഷക്കണക്കിന് വിദ്യാർത്ഥികൾക്കൊപ്പം ആകാൻഷയും നീറ്റ് പരീക്ഷ എഴുതിയത്. മികച്ച രീതിയിൽ പരീക്ഷ എഴുതിയ കുട്ടിയായിരുന്നതിനാൽ ഏകദേശം 650 മാർക്ക് വരെ ലഭിക്കുമെന്ന് കുടുംബം പ്രതീക്ഷിച്ചിരുന്നു. എന്നാൽ ചോദ്യപേപ്പർ ചോർച്ചയെ തുടർന്ന് മെയ് 12-ന് നാഷണൽ ടെസ്റ്റിങ് ഏജൻസി (NTA) പരീക്ഷ റദ്ദാക്കുകയും ജൂൺ 21-ന് വീണ്ടും പരീക്ഷ നടത്തുമെന്ന് പ്രഖ്യാപിക്കുകയും ചെയ്തു. പരീക്ഷാ നടത്തിപ്പിലെ അനിശ്ചിതത്വം കുട്ടിയെ കടുത്ത മാനസിക വിഷമത്തിലേക്ക് നയിക്കുകയായിരുന്നു.
മകളെ ഡോക്ടറാക്കുക എന്ന സ്വപ്നത്തിനായി വലിയ സാമ്പത്തിക ബുദ്ധിമുട്ടുകളാണ് ഈ കുടുംബം സഹിച്ചിരുന്നത്. പഠനച്ചെലവുകൾക്കായി കിസാൻ ക്രെഡിറ്റ് കാർഡ് വഴി മൂന്ന് ലക്ഷം രൂപ ഇവർ വായ്പയെടുത്തിരുന്നു. നാഗ്പൂരിലെ കോച്ചിങ് സെന്ററിൽ മകൾ പഠിക്കുമ്പോൾ പഠനച്ചെലവ് കണ്ടെത്താനായി കൂലിപ്പണിക്കാരനായ പിതാവ് കൃഷ്ണ കുമാർ ചതുർവേദി അവിടെ ഒരു പാചകക്കാരനായി ജോലി ചെയ്യുകയായിരുന്നു. തനിക്ക് ഇനിയൊരു പരീക്ഷ എഴുതാൻ ഭയമാണെന്നും, മാതാപിതാക്കളുടെ പ്രതീക്ഷകൾ തകർത്തതിൽ വിഷമമുണ്ടെന്നും ആകാൻഷയുടെ ആത്മഹത്യക്കുറിപ്പിൽ പറയുന്നു. വീണ്ടും പരീക്ഷ എഴുതിയാൽ പഴയതുപോലെ മികച്ച വിജയം നേടാനാകുമെന്ന് ഉറപ്പില്ലെന്നും കുറിപ്പിൽ വ്യക്തമാക്കിയിട്ടുണ്ട്.
ദേശീയതലത്തിൽ നീറ്റ് പരീക്ഷയെച്ചൊല്ലിയുള്ള വിവാദങ്ങളും പരീക്ഷ റദ്ദാക്കലും വിദ്യാർത്ഥികളിൽ വലിയ ആശങ്കയാണ് ഉണ്ടാക്കുന്നത്. കഴിഞ്ഞ ദിവസം ജാർഖണ്ഡിലും സമാനമായ രീതിയിൽ പരീക്ഷ റദ്ദാക്കിയതിലെ വിഷമത്താൽ 16 വയസ്സുകാരിയായ മറ്റൊരു നീറ്റ് വിദ്യാർത്ഥിനിയും ജീവനൊടുക്കിയിരുന്നു. പരീക്ഷാ നടത്തിപ്പിലെ സുതാര്യത ഉറപ്പാക്കുന്നതിൽ നാഷണൽ ടെസ്റ്റിങ് ഏജൻസിക്ക് സംഭവിച്ച വീഴ്ചകൾക്കെതിരെ രാജ്യവ്യാപകമായി വലിയ പ്രതിഷേധങ്ങളാണ് ഉയരുന്നത്.
