യുഎസ് സൈനിക പിന്തുണയില്ലാതെ യൂറോപ്പിന് സ്വയം പ്രതിരോധിക്കാൻ കഴിയില്ലെന്ന് നാറ്റോ സെക്രട്ടറി ജനറൽ മാർക്ക് റുട്ടെ. ഇനി, യൂറോപ്പ് അങ്ങനെ ചെയ്യാൻ ആഗ്രഹിക്കുന്നുവെങ്കിൽ, നിലവിൽ സൈനിക ആവശ്യങ്ങൾക്കായി ചെലവഴിക്കുന്നതിന്റെ ഇരട്ടി ചെലവഴിക്കേണ്ടിവരുമെന്ന് അദ്ദേഹം കൂട്ടിച്ചേർത്തു.
‘യൂറോപ്യൻ യൂണിയനോ, അല്ലെങ്കിൽ യൂറോപ്പ് മൊത്തത്തിൽ, യുഎസ് സഹായമില്ലാതെ സ്വയം പ്രതിരോധിക്കാൻ കഴിയുമെന്ന് ആരെങ്കിലും കരുതുന്നുവെങ്കിൽ… അത് സ്വപ്നം മാത്രമാണ് … നിങ്ങൾക്ക് അത് ചെയ്യാൻ കഴിയില്ല,’ ബ്രസ്സൽസിൽ നടന്ന യൂറോപ്യൻ യൂണിയൻ നിയമനിർമ്മാതാക്കളുടെ യോഗത്തിൽ റുട്ടെ പറഞ്ഞു.
ഗ്രീൻലൻഡിനെ അമേരിക്കയോട് കൂട്ടിച്ചേർക്കുമെന്ന യുഎസ് പ്രസിഡന്റ് ഡൊണാൾഡ് ട്രംപിന്റെ ഭീഷണിക്ക് പിന്നാലെ സമീപകാലത്ത് നാറ്റോയ്ക്കുള്ളിൽ കടുത്ത ആശങ്കകളാണ് തലപ്പൊക്കുന്നത്. 32 അംഗരാജ്യങ്ങളുള്ള സൈനിക കൂട്ടായ്മയാണ് നാറ്റോ. കൂട്ടായ്മയിലെ ഏതെങ്കിലുമൊരു രാജ്യത്തിന്റെ പ്രദേശത്തിന് ഭീഷണി ഉയരുന്ന പക്ഷം മറ്റ് രാജ്യങ്ങൾ എല്ലാവരും ആ സഖ്യകക്ഷിയെ പിന്തുണയ്ക്കാൻ ബാധ്യസ്ഥരാണ്.
