ഇന്ത്യൻ ഓഹരി വിപണിയിൽ സമീപകാലത്തുണ്ടായ ചാഞ്ചാട്ടം നിക്ഷേപകരെ ആശങ്കയിലാഴ്ത്തിയിരിക്കുകയാണ്. ഇന്ത്യ-യുഎസ് വ്യാപാര കരാർ, ബജറ്റ് 2026, സ്വർണ്ണത്തിന്റെയും വെള്ളിയുടെയും വിലയിലുണ്ടായ തിരുത്തലുകൾ, ഐടി ഓഹരികളിലെ പെട്ടെന്നുള്ള ഇടിവ് എന്നിവയെല്ലാം ഒരേസമയം വിപണിയെ ബാധിച്ചു.
എന്നാൽ, ഇത്തരം ഹ്രസ്വകാല സംഭവവികാസങ്ങളിൽ പതറാതെ ദീർഘകാല ലക്ഷ്യത്തോടെ മ്യൂച്വൽ ഫണ്ടുകളിൽ നിക്ഷേപം തുടരുന്നതാണ് ബുദ്ധിയെന്ന് സാമ്പത്തിക വിദഗ്ധർ ചൂണ്ടിക്കാട്ടുന്നു.
2026-ന്റെ തുടക്കം ദലാൽ സ്ട്രീറ്റിന് അത്ര ശുഭകരമായിരുന്നില്ല. 2025-ൽ ഇന്ത്യൻ വിപണികൾ 8-10 ശതമാനം നേട്ടമുണ്ടാക്കിയെങ്കിലും ആഗോള വിപണികളുമായി താരതമ്യം ചെയ്യുമ്പോൾ ഇത് കുറവായിരുന്നു. ജപ്പാൻ, ദക്ഷിണ കൊറിയ, മെക്സിക്കോ തുടങ്ങിയ രാജ്യങ്ങൾ 20 ശതമാനത്തിലധികം നേട്ടമാണ് കൈവരിച്ചത്.
ഈ അന്തരം ഇന്ത്യൻ നിക്ഷേപകരെ തിരുത്തലുകളോട് കൂടുതൽ സെൻസിറ്റീവ് ആക്കിയിട്ടുണ്ട്. എന്നാൽ ഗുണനിലവാരമുള്ള ബിസിനസ്സുകളുടെ അടിസ്ഥാന സ്വഭാവം മാറിയിട്ടില്ലെന്ന് സെബി (SEBI) രജിസ്റ്റേർഡ് റിസർച്ച് അനലിസ്റ്റ് അങ്കിത് യാദവ് നിരീക്ഷിക്കുന്നു.
നിക്ഷേപകർ പോർട്ട്ഫോളിയോ മാറ്റണോ?
ഹ്രസ്വകാല വാർത്തകളുടെ അടിസ്ഥാനത്തിൽ മ്യൂച്വൽ ഫണ്ട് തന്ത്രങ്ങളിൽ മാറ്റം വരുത്തേണ്ടതില്ലെന്ന് അങ്കിത് യാദവ് വ്യക്തമാക്കുന്നു. “ഇന്ത്യ-യുഎസ് വ്യാപാര കരാറോ 2026-ലെ ബജറ്റോ അടുത്ത 20 വർഷത്തേക്കുള്ള ഇന്ത്യൻ കമ്പനികളുടെ വളർച്ചാ സാധ്യതകളെ തകർത്തിട്ടില്ല. ആർട്ടിഫിഷ്യൽ ഇന്റലിജൻസ് (AI) ഭീഷണി താൽക്കാലികം മാത്രമാണ്. ഐടി കമ്പനികൾ ഇതിനോടകം തന്നെ എഐ സാങ്കേതികവിദ്യയിൽ നിക്ഷേപം നടത്തുന്നുണ്ട്. അതുകൊണ്ട് പരിഭ്രാന്തരായി നിക്ഷേപം പിൻവലിക്കുന്നത് ഒഴിവാക്കണം,” അദ്ദേഹം പറഞ്ഞു.
നിക്ഷേപ മിശ്രണം എങ്ങനെ വേണം?
നിലവിലെ വിപണി ഘടന അനുസരിച്ച് ലാർജ് ക്യാപ് ഫണ്ടുകൾക്കൊപ്പം മിഡ് ക്യാപ്, സ്മോൾ ക്യാപ് ഫണ്ടുകൾക്കും പ്രാധാന്യം നൽകാവുന്നതാണ്. സൂചികകൾ പിടിച്ചുനിൽക്കുന്നുണ്ടെങ്കിലും മിഡ് ക്യാപ്, സ്മോൾ ക്യാപ് മേഖലകളിൽ വലിയ തിരുത്തലുകൾ നടന്നിട്ടുണ്ട്.
ഇത് പുതിയ നിക്ഷേപകർക്ക് നല്ലൊരു അവസരമാണ് നൽകുന്നത്. 60% ലാർജ് ക്യാപ്, 25% മിഡ് ക്യാപ്, 15% സ്മോൾ ക്യാപ് എന്നിങ്ങനെയുള്ള നിക്ഷേപ മിശ്രണം (Asset Allocation) നിലനിർത്തുന്നതാണ് ഉചിതം.
ശ്രദ്ധിക്കേണ്ട കാര്യങ്ങൾ
- സെക്ടർ ഫണ്ടുകൾ ഒഴിവാക്കുക: പ്രതിരോധം (Defence), സാങ്കേതികവിദ്യ (Technology) തുടങ്ങിയ മേഖലകളിൽ മാത്രമായി നിക്ഷേപിക്കുന്ന സെക്ടർ ഫണ്ടുകൾ ഒഴിവാക്കുന്നതാണ് നല്ലത്. ഇത്തരം ഫണ്ടുകളിൽ റിസ്ക് കൂടുതലാണ്. ഫ്ലെക്സി ക്യാപ്, മൾട്ടി ക്യാപ് ഫണ്ടുകൾ തിരഞ്ഞെടുക്കുന്നതാണ് സുരക്ഷിതം.
- ആഗോള ഫണ്ടുകൾ: നിലവിൽ യുഎസ് വിപണികളിൽ മൂല്യനിർണ്ണയം (Valuation) കൂടുതലായതിനാൽ നാസ്ഡാക് (Nasdaq) പോലുള്ള ഗ്ലോബൽ ഫണ്ടുകളിൽ അധിക നിക്ഷേപം നടത്തുന്നത് ഗുണകരമായേക്കില്ല. 10-15 ശതമാനത്തിൽ കൂടുതൽ വിദേശ നിക്ഷേപം പാടില്ല.
- സ്വർണ്ണവും വെള്ളിയും: വിപണിയിലെ ചാഞ്ചാട്ടം നേരിടാൻ സ്വർണ്ണം, വെള്ളി ഇടിഎഫുകൾ (ETFs) പ്രയോജനപ്പെടുത്താം. പോർട്ട്ഫോളിയോയുടെ 10-15% സ്വർണ്ണത്തിലും 5% വെള്ളിയി ലും നിക്ഷേപിക്കാം.
ഹ്രസ്വകാല ലാഭത്തേക്കാൾ ദീർഘകാലാടിസ്ഥാനത്തിൽ സമ്പത്ത് വളർത്താൻ സിസ്റ്റമാറ്റിക് ഇൻവെസ്റ്റ്മെന്റ് പ്ലാൻ (SIP) തുടരുന്നത് തന്നെയാണ് ഏറ്റവും നല്ല മാർഗ്ഗം. വിപണി താഴുന്ന സമയങ്ങളിൽ എസ്ഐപി തുടരുന്നത് യൂണിറ്റുകൾ കൂടുതൽ ലഭിക്കാൻ സഹായിക്കും.
