അമേരിക്കയും ഇറാനും തമ്മിലുള്ള സംഘർഷം ആഗോളതലത്തിൽ ചർച്ചയാകുന്നതിനിടെ നിർണായക വെളിപ്പെടുത്തലുമായി യുഎസ് വിദേശകാര്യ സെക്രട്ടറി മാർക്കോ റൂബിയോ രംഗത്തെത്തി. ഇറാൻ പരമാധികാരി ആയത്തുള്ള അലി ഖമേനിയുമായി കൂടിക്കാഴ്ച നടത്താൻ യുഎസ് പ്രസിഡന്റ് ഡൊണാൾഡ് ട്രംപ് തയ്യാറാണെന്ന് റൂബിയോ വ്യക്തമാക്കി. മ്യൂണിക്ക് സുരക്ഷാ സമ്മേളനത്തിൽ ബ്ലൂംബെർഗിന് നൽകിയ അഭിമുഖത്തിലാണ് അദ്ദേഹം ഇക്കാര്യം സൂചിപ്പിച്ചത്.
ലോകത്തെ വലിയ പ്രശ്നങ്ങൾ പരിഹരിക്കാൻ ആരുമായും ചർച്ചയ്ക്ക് തയ്യാറായ നേതാവാണ് ഡൊണാൾഡ് ട്രംപ് എന്ന് റൂബിയോ പറഞ്ഞു. ഇറാൻ പരമാധികാരി ചർച്ചയ്ക്ക് തയ്യാറാണെന്ന് അറിയിച്ചാൽ ട്രംപ് അത് സ്വീകരിക്കുമെന്ന് അദ്ദേഹം ആത്മവിശ്വാസം പ്രകടിപ്പിച്ചു. എന്നാൽ ഇത് ഖമേനിയുടെ നിലപാടുകളോടുള്ള യോജിപ്പല്ല മറിച്ച് സമാധാന ശ്രമങ്ങളുടെ ഭാഗമാണെന്നും അദ്ദേഹം കൂട്ടിച്ചേർത്തു.
ഇറാനുമേൽ സമ്മർദ്ദം ശക്തമാക്കാൻ അമേരിക്ക രണ്ടാമത്തെ വിമാനവാഹിനിക്കപ്പൽ മിഡിൽ ഈസ്റ്റിലേക്ക് അയച്ചതിന് പിന്നാലെയാണ് ഈ പ്രസ്താവന. ആണവായുധം നിർമ്മിക്കാൻ ഇറാനെ ഒരു കാരണവശാലും അനുവദിക്കില്ലെന്ന് റൂബിയോ ആവർത്തിച്ചു വ്യക്തമാക്കിയിട്ടുണ്ട്. മേഖലയിലെ സുരക്ഷ ഉറപ്പാക്കാൻ സൈനിക സന്നാഹം വർദ്ധിപ്പിക്കുന്നത് അനിവാര്യമാണെന്നാണ് അമേരിക്കയുടെ ഔദ്യോഗിക നിലപാട്.സമാധാനപരമായ ഒരു കരാറിലെത്താനാണ് ഡൊണാൾഡ് ട്രംപ് എപ്പോഴും ആഗ്രഹിക്കുന്നതെന്ന് വിദേശകാര്യ സെക്രട്ടറി ഓർമ്മിപ്പിച്ചു. ചർച്ചകളെ ഒരിക്കലും ഒരു വിട്ടുവീഴ്ചയായി ട്രംപ് കാണുന്നില്ലെന്നും റൂബിയോ വെളിപ്പെടുത്തി. ഇറാനിലെ നിലവിലെ ഭരണകൂടവുമായി നേരിട്ടുള്ള ചർച്ചകൾക്ക് വഴിതുറക്കാൻ ഈ നീക്കം കാരണമായേക്കാം.
അതേസമയം ഇറാനിൽ ഭരണമാറ്റം ഉണ്ടാകുന്നത് ലോകത്തിന് നല്ലതാണെന്ന് നേരത്തെ ട്രംപ് അഭിപ്രായപ്പെട്ടിരുന്നു. പതിറ്റാണ്ടുകളായി തുടരുന്ന അനിശ്ചിതത്വം അവസാനിപ്പിക്കാൻ പുതിയ നേതൃത്വം വരണമെന്നാണ് അദ്ദേഹം സൈനിക കേന്ദ്രത്തിൽ സംസാരിക്കവെ പറഞ്ഞത്. ഇത്തരത്തിൽ പരസ്പരവിരുദ്ധമായ റിപ്പോർട്ടുകൾ പുറത്തുവരുന്നത് നയതന്ത്ര വൃത്തങ്ങളിൽ വലിയ ചർച്ചകൾക്ക് വഴിവെച്ചിട്ടുണ്ട്.
ഇറാനുമായുള്ള ആണവ കരാർ ചർച്ചകളുടെ അടുത്ത ഘട്ടം ഉടൻ ജനീവയിൽ നടക്കാനിരിക്കുകയാണ്. മേഖലയിലെ സ്ഥിതിഗതികൾ കൂടുതൽ സങ്കീർണ്ണമാകാതെ നോക്കാൻ അമേരിക്ക ജാഗ്രത പാലിക്കുന്നുണ്ട്. ട്രംപും ഖമേനിയും തമ്മിലുള്ള കൂടിക്കാഴ്ച നടന്നാൽ അത് മിഡിൽ ഈസ്റ്റിലെ രാഷ്ട്രീയ ചരിത്രത്തിലെ തന്നെ ഏറ്റവും വലിയ സംഭവമായി മാറും.
