കുഞ്ഞുങ്ങളെ ദത്തെടുക്കുന്ന അമ്മമാർക്ക് പ്രസവാവധി (Maternity Leave) അനുവദിക്കുന്നതിൽ നിലനിന്നിരുന്ന കർശന നിയന്ത്രണങ്ങൾ സുപ്രീം കോടതി നീക്കം ചെയ്തു. മൂന്ന് മാസത്തിൽ താഴെ പ്രായമുള്ള കുഞ്ഞുങ്ങളെ ദത്തെടുക്കുന്നവർക്ക് മാത്രമേ 12 ആഴ്ചത്തെ അവധിക്ക് അർഹതയുള്ളൂവെന്ന നിയമ വ്യവസ്ഥ കോടതി അസാധുവാക്കി. കുഞ്ഞിന്റെ പ്രായം എത്രയായാലും ദത്തെടുക്കുന്ന അമ്മയ്ക്ക് പ്രസവാവധിക്ക് അർഹതയുണ്ടെന്ന് ജസ്റ്റിസുമാരായ ജെ.ബി. പർദിവാല, ആർ. മഹാദേവൻ എന്നിവരടങ്ങിയ ബെഞ്ച് വ്യക്തമാക്കി. ഇത് സംബന്ധിച്ച സോഷ്യൽ സെക്യൂരിറ്റി കോഡിലെ 60 (4) വകുപ്പ് ഭരണഘടന ഉറപ്പുനൽകുന്ന തുല്യതയുടെയും ജീവിക്കാനുള്ള അവകാശത്തിന്റെയും ലംഘനമാണെന്ന് കോടതി നിരീക്ഷിച്ചു.
ദത്തെടുക്കൽ എന്നത് പ്രത്യുത്പാദന അവകാശത്തിന്റെ (Reproductive Rights) ഭാഗമാണെന്നും അതിൽ ഇത്തരം വിവേചനപരമായ നിബന്ധനകൾ വെക്കാൻ നിയമത്തിന് കഴിയില്ലെന്നും കോടതി ചൂണ്ടിക്കാട്ടി. അമ്മയും കുഞ്ഞും തമ്മിലുള്ള ബന്ധം ദൃഢമാക്കുന്നതിനും കുഞ്ഞിന് ആവശ്യമായ പരിചരണം ഉറപ്പാക്കുന്നതിനും പ്രായം നോക്കാതെ തന്നെ അവധി നൽകേണ്ടത് അത്യാവശ്യമാണെന്നും വിധിയിൽ പറയുന്നു. മൂന്ന് മാസത്തിൽ താഴെ പ്രായമുള്ള കുഞ്ഞുങ്ങളെ ദത്തെടുക്കുന്നവർക്ക് മാത്രം അവധി നൽകുന്നതിനെതിരെ അഭിഭാഷകയായ ഹംസനന്ദിനിയാണ് കോടതിയെ സമീപിച്ചത്. ഈ ഹർജിയിലാണ് സുപ്രീം കോടതിയുടെ സുപ്രധാന വിധി ഉണ്ടായത്.
മറ്റൊരു സുപ്രധാന നിർദ്ദേശമായി, അച്ഛന്മാർക്ക് നൽകുന്ന പിതൃത്വ അവധി (Paternity Leave) സോഷ്യൽ സെക്യൂരിറ്റി കോഡിന്റെ ഭാഗമാക്കാൻ കേന്ദ്ര സർക്കാരിനോട് കോടതി ആവശ്യപ്പെട്ടു. നിലവിൽ പലയിടങ്ങളിലും അച്ഛന്മാർക്ക് അവധി ലഭിക്കുന്നതിൽ വ്യക്തതയില്ലെന്നും ഇത് നിയമത്തിന്റെ ഭാഗമാക്കേണ്ടതുണ്ടെന്നും കോടതി ഓർമ്മിപ്പിച്ചു. ദത്തെടുക്കുന്ന രക്ഷിതാക്കൾക്കും സ്വാഭാവിക പ്രസവത്തിലൂടെ അമ്മമാരാകുന്നവർക്കും ഇടയിലുള്ള വിവേചനം അവസാനിപ്പിക്കുന്ന ഈ വിധി സ്ത്രീശാക്തീകരണ രംഗത്തെ വലിയൊരു ചുവടുവെപ്പായാണ് വിലയിരുത്തപ്പെടുന്നത്.
