പരിശോധനയെല്ലാം കഴിഞ്ഞ് പൂർണ്ണമായും രോഗമുക്തനായെന്ന് അറിയിക്കാൻ ഫോണിൽ വിളിച്ച മമ്മൂട്ടിയുമായുള്ള സംഭാഷണം പങ്കുവെച്ച് നടൻ വി.കെ. ശ്രീരാമൻ. ഒടുവിൽ നടത്തിയ പരിശോധന കഴിഞ്ഞെന്നും രോഗമുക്തനായെന്നും അറിയിച്ചുള്ള മമ്മൂട്ടിയുടെ സംഭാഷണമാണ് വി.കെ. ശ്രീരാമൻ കുറിപ്പായി പങ്കുവെച്ചത്. ‘അവസാനത്തെ ടെസ്റ്റ് പാസായി’, എന്ന് മമ്മൂട്ടി പറഞ്ഞപ്പോൾ അത് തനിക്കറിയാമായിരുന്നുവെന്ന് വി.കെ. ശ്രീരാമൻ മറുപടി നൽകി. ‘നീ ആര് പടച്ചോനോ’, എന്നായിരുന്നു മമ്മൂട്ടിയുടെ മറുചോദ്യമെന്നും വി.കെ. ശ്രീരാമൻ ഫെയ്സ്ബുക്കിൽ കുറിച്ചു.
വി.കെ. ശ്രീരാമന്റെ ഫെയ്സ്ബുക്ക് പോസ്റ്റിന്റെ പൂർണ്ണരൂപം:
നിന്നെ ഞാൻ കൊറേ നേരായീലോ വിളിക്കണ്? നീ വളരെ ബിസി ആണ് ആണ് ലേ?
‘ബിസി ആയിട്ട് പൊക്കോണ്ടിരിയ്ക്കായിരുന്നു ഓട്ട്രഷേല്. ഇതിന്റെ സൗണ്ട് കാരണം ഫോണടിച്ചത് അറിഞ്ഞില്ല.’
കാറോ ?
‘ഡ്രൈവൻ വീട്ടിപ്പോയി. ഇന്ദുചൂഡൻസ് പ്രദർദശനത്തിന് വന്നതാ. അത് കഴിഞ്ഞ്, അമൃതേം കഴിഞ്ഞേ ചെറുവത്താനിക്ക് പോവാമ്പറ്റു.
അപ്പ അവൻ പോയി..”
ഡാ ഞാൻ വിളിച്ചതെന്തിനാന്ന് ചോദിക്ക്… നീ
‘എന്തിനാ?’
അവസാനത്തെ ടെസ്റ്റും പാസ്സായട
‘ദാപ്പോവല്യേ കാര്യം? ങ്ങള് പാസ്സാവുംന്ന് എനിക്ക് നേരത്തെ അറിയാമായിരുന്നു’
നീയ്യാര് പടച്ചോനോ?
‘ഞാൻ കാലത്തിനു മുമ്പേ നടക്കുന്നവൻ. ഇരുളിലും വെളിച്ചത്തിലും മഴയിലും വെയിലിലും വടിയോ കുടയോ ഇല്ലാതെ സഞ്ചരിക്കുന്നവൻ’
………..
‘എന്താ മിണ്ടാത്ത്. ???’
ഏതു നേരത്താ നിന്നെ വിളിക്കാൻ തോന്നിയത് എന്ന് ചിന്തിക്കുകയായിരുന്നു ഞാൻ.
യാ ഫത്താഹ്
സർവ്വ ശക്തനായ തമ്പുരാനേ
കാത്തു കൊള്ളണേ!
