മിർസാപുർ സീരീസ്, സ്ത്രീ, ന്യൂട്ടൺ, ദിൽവാലേ തുടങ്ങി ഒട്ടേറെ ബോളിവുഡ് ചിത്രങ്ങളിലൂടെ സുപരിചിതനായ താരമാണ് പങ്കജ് ത്രിപാഠി. അദ്ദേഹത്തിന്റെ കടുത്ത ആരാധികയാണ് താനെന്ന് വെളിപ്പെടുത്തിയിരിക്കുകയാണ് തൃണമൂൽ കോൺഗ്രസിന്റെ തീപ്പൊരി നേതാവും എംപിയുമായ മഹുവ മൊയ്ത്ര. ആരാധനയ്ക്കപ്പുറം തനിക്ക് പങ്കജിനോട് ‘ക്രഷ്’ ഉണ്ടായിരുന്നുവെന്നും മഹുവ ഇന്ത്യാ ടുഡേയോട് പറഞ്ഞു. ഇഷ്ടപ്പെട്ട ബോളിവുഡ് ചിത്രങ്ങളെ കുറിച്ച് സംസാരിക്കവെയാണ് ഈ രഹസ്യം അവർ പങ്കുവെച്ചത്.

‘ഞാൻ മുന്നാഭായ് സീരീസ് കണ്ടു, അത് ഇനിയും കാണും. വിക്കി ഡോണർ കണ്ടു, എനിക്കത് ഇഷ്ടമായി. പങ്കജ് ത്രിപാഠിയേയും എനിക്ക് വളരെ ഇഷ്ടമായി. ഞാൻ മിർസാപുർ സീരീസ് മുഴുവനും കണ്ടു. പങ്കജ് ത്രിപാഠിക്ക് ഞാൻ കത്തെഴുതുക വരെ ചെയ്തു. എന്നാൽ അതിന് അദ്ദേഹം മറുപടി നൽകിയിട്ടില്ല. അദ്ദേഹം എന്റെ ‘ക്രഷ്’ ആണ്. അദ്ദേഹം ഒരു അടിപൊളി നടനാണ്. അദ്ദേഹം അവതരിപ്പിക്കുന്ന മോശക്കാരായ കഥാപാത്രങ്ങളെ എനിക്ക് വലിയ ഇഷ്ടമാണ്. മിർസാപുരിലെ, എന്തിന്, ഗ്യാങ്സ് ഓഫ് വാസെപുരിലെ അദ്ദേഹത്തെ വരെ എനിക്ക് ഇഷ്ടമാണ്.’ -മഹുവ വാചാലയായി.