ഉയരുന്ന താപനില കാരണം ഏഷ്യയിലെയും പസഫിക്കിലെയും കാർഷികമേഖല സ്ഥിരമായി ‘വലിയ അപകടസാധ്യതയിൽ’ ആണെന്ന് യുണൈറ്റഡ് നേഷൻസിന്റെ പുതിയ റിപ്പോർട്ട് മുന്നറിയിപ്പ് നൽകുന്നു. ‘ഉയർന്ന അപകടസാധ്യത’ നേരിടുന്ന അഞ്ച് രാജ്യങ്ങളിൽ ഇന്ത്യയും ഉൾപ്പെടുന്നു.
യുഎൻ ഇക്കണോമിക് ആൻഡ് സോഷ്യൽ കമ്മീഷൻ ഫോർ ഏഷ്യ ആൻഡ് ദി പസഫിക് (ESCAP) പുറത്തിറക്കിയ 2025 ഏഷ്യ-പസഫിക് ദുരന്തറിപ്പോർട്ടിലാണ് ഈ കണ്ടെത്തലുള്ളത്. അതിന്റെ ഫലമായി വിളവ് കുറയുക, കന്നുകാലികളുടെ ഉൽപാദനക്ഷമത കുറയുക, തൊഴിലാളികളുടെ ജോലി ചെയ്യാനുള്ള കഴിവ് നഷ്ടപ്പെടുക, ഗ്രാമങ്ങളിലെ ദാരിദ്ര്യം വർധിക്കുക തുടങ്ങിയ വലിയ വെല്ലുവിളികൾ ഉണ്ടാകാനുള്ള സാധ്യതയുണ്ട്.
അഫ്ഗാനിസ്ഥാൻ, പാക്കിസ്ഥാൻ, നേപ്പാൾ, ബംഗ്ലാദേശ് എന്നിവയാണ് ഉയർന്ന അപകടസാധ്യതകൾ നേരിടുന്ന മറ്റു രാജ്യങ്ങൾ. ഈ മേഖലയുടെ മൊത്ത ആഭ്യന്തര ഉൽപാദനത്തിന്റെ (GDP) നാലിലൊന്ന് കാർഷികമേഖല സംഭാവന ചെയ്യുന്നു. 2022 ലെ അമിതമായ ചൂട് കാരണം ഇന്ത്യയുടെ പ്രധാന വിളയായ ഗോതമ്പ് ഉണങ്ങിപ്പോയതും റിപ്പോർട്ടിൽ സൂചിപ്പിക്കുന്നു.
ചൂട് കൂടുന്നതിനനുസരിച്ച് കൃഷിക്ക് ആവശ്യമായ ജോലികളിൽ ഏർപ്പെടാൻ കഴിയുന്ന തൊഴിലാളികളുടെ എണ്ണത്തിൽ 27% വരെ കുറവുണ്ടാകാൻ സാധ്യതയുണ്ട്. കടുത്ത ചൂടിൽ ആവശ്യത്തിന് തണലും വെള്ളവും വിശ്രമവുമില്ലാത്തതിനാൽ കർഷകതൊഴിലാളികൾക്ക് ആരോഗ്യപ്രശ്നങ്ങൾ ഉണ്ടാകുന്നു. കാലാവസ്ഥാ അപകടസാധ്യതകൾ മുൻകൂട്ടിക്കണ്ട് കാർഷികരീതികൾ മാറ്റേണ്ടത് ഭക്ഷ്യസുരക്ഷയ്ക്ക് അത്യന്താപേക്ഷിതമാണെന്ന് റിപ്പോർട്ട് അടിവരയിടുന്നു.
