സമ്പന്നമായ ചരിത്രവും അതിമനോഹരമായ പ്രകൃതിദൃശ്യങ്ങളും മുതൽ സ്വാദിഷ്ടമായ വിഭവങ്ങൾ വരെ, ഇന്ത്യ വിനോദസഞ്ചാരികൾക്ക് വൈവിധ്യമാർന്നതും സമ്പന്നവുമായ അനുഭവം നൽകുന്നു. യാത്രക്കാർ പലപ്പോഴും തങ്ങളുടെ യാത്രകളെക്കുറിച്ച് രേഖപ്പെടുത്തുകയും മറ്റുള്ളവർക്ക് മികച്ച അനുഭവങ്ങൾ കണ്ടെത്താൻ സഹായിക്കുന്നതിനായി സോഷ്യൽ മീഡിയ പ്ലാറ്റ്‌ഫോമുകളിൽ വിലയിരുത്തലുകൾ പങ്കുവെക്കുകയും ചെയ്യാറുണ്ട്.

ഇത്തരത്തിൽ ഇന്ത്യയെക്കുറിച്ചുള്ള തന്റെ അഭിപ്രായം പങ്കുവെച്ചിരിക്കുകയാണ് എമ്മ എന്ന് പേരുള്ള ഒരു ബാങ്കോക്ക് വനിത. ആഴ്ചകൾ നീണ്ട യാത്രയ്ക്ക് ശേഷം, രാജ്യത്തുടനീളമുള്ള എട്ട് പ്രദേശങ്ങൾ സന്ദർശിച്ചതിനെക്കുറിച്ചുള്ള സത്യസന്ധമായ അഭിപ്രായം അവർ പങ്കുവെച്ചു.

ഓരോ സ്ഥലത്തും തനിച്ച് യാത്ര ചെയ്യുന്ന ഒരു സ്ത്രീ എന്ന നിലയിൽ തനിക്ക് എത്രത്തോളം സുരക്ഷിതത്വവും സൗകര്യവും അനുഭവപ്പെട്ടു എന്ന് അവർ വിലയിരുത്തി. “ഒരേ സമയം തീവ്രവും മനോഹരവും നിരാശാജനകവും ഹൃദയസ്പർശിയുമാണ് ഇന്ത്യ” എന്ന് വിശേഷിപ്പിച്ച അവർ ഡൽഹി, ഉദയ്പുർ, ഗോവ, പുഷ്കർ, ആഗ്ര, മുംബൈ, കേരളം, ജയ്പുർ എന്നീ സ്ഥലങ്ങൾക്ക് റേറ്റിങ് നൽകി.

ഇന്റർനെറ്റിൽ പ്രചരിക്കുന്ന ഈ വീഡിയോ ആരംഭിക്കുന്നത് ഡൽഹിയെക്കുറിച്ചുള്ള അവരുടെ അവലോകനത്തോടെയാണ്. തലസ്ഥാനത്തിന് പത്തിൽ ഒന്ന് (1/10) എന്ന റേറ്റിങ് നൽകിയ അവർ, തുറിച്ചുനോട്ടങ്ങളും ബഹളങ്ങളും, നിർത്താതെയുള്ള ശബ്ദവും” കൊണ്ട് അവിടം “അസഹനീയമായിരുന്നു” എന്ന് വിശേഷിപ്പിച്ചു. തനിക്ക് അവിടെ തീർത്തും ഭയം തോന്നിയിരുന്നുവെന്നും തനിച്ച് അവിടെ കഴിയാൻ ആഗ്രഹിക്കുന്നില്ലെന്നും അവർ സമ്മതിച്ചു.

ആഗ്രയിലെ സുരക്ഷയ്ക്ക് അവർ 3/10 ആണ് റേറ്റിങ് നൽകിയത്. താജ്മഹലിന്റെ ഭംഗിയെക്കുറിച്ച് പറഞ്ഞ അവർ, സ്വസ്ഥമായിരിക്കാൻ ബുദ്ധിമുട്ടുണ്ടാക്കിയ “ഹോണടികളും തട്ടിപ്പുകളും” എടുത്തുപറഞ്ഞു. “നാട്ടുകാർക്ക് വിനോദസഞ്ചാരികളെ പരിചയമുണ്ടെങ്കിലും എല്ലാവർക്കും എന്നിൽ നിന്ന് എന്തോ വേണം എന്നായിരുന്നു എനിക്ക് തോന്നിയിരുന്നത്,” അവർ കുറിച്ചു.

രാജസ്ഥാനിലെ ജയ്പുരിന് അവർ 5/10 റേറ്റിങ് നൽകി. ഡൽഹിയേയും ആഗ്രയെയും അപേക്ഷിച്ച് പിങ്ക് സിറ്റി മികച്ചതാണെന്ന് അവർ കണ്ടെത്തിയെങ്കിലും അവിടം “ഇപ്പോഴും വളരെ പരമ്പരാഗതമാണ്” എന്ന് പറഞ്ഞു. പകൽ സമയത്ത് ആളുകൾ നിരന്തരം തുറിച്ചുനോക്കിയിരുന്നെങ്കിലും കോട്ടകൾ സന്ദർശിക്കുന്നത് സുരക്ഷിതമായി തോന്നി എന്ന് അവർ പറഞ്ഞു. എന്നാൽ രാത്രിയിൽ തനിച്ച് പുറത്തിറങ്ങുന്നത് സാധ്യമായിരുന്നില്ല.

എന്നാൽ പുഷ്കർ (6.5/10), വലിയ നഗരങ്ങൾക്ക് ശേഷം “ഒരു ആശ്വാസം” നൽകി. ശാന്തവും ആത്മീയവുമായ ഒരു അനുഭവം അവിടെനിന്ന് ലഭിച്ചു. നാട്ടുകാർ കൂടുതലും ശാന്തരായിരുന്നു. അവിടെവെച്ച് ഒരു തട്ടിപ്പിനിരയായ കാര്യം വെളിപ്പെടുത്തിയ എമ്മ, യാത്രക്കാർ ഇരുട്ടിയാൽ ശ്രദ്ധിക്കണമെന്നും വൈകുന്നേരങ്ങൾ മുൻകൂട്ടി ആസൂത്രണം ചെയ്യണമെന്നും മുന്നറിയിപ്പ് നൽകി.

എമ്മയ്ക്ക് അൽപ്പം സുരക്ഷിതത്വം തോന്നിയ സ്ഥലങ്ങൾ

ഉദയ്പുരിൽ എത്തിയപ്പോൾ കാര്യങ്ങൾ മെച്ചപ്പെട്ടു. പത്തിൽ എട്ട് റേറ്റിങ് നൽകി. മര്യാദയുള്ള നാട്ടുകാരും മനോഹരമായ തടാകങ്ങളും കുറഞ്ഞ ബഹളങ്ങളുമുള്ള ആ നഗരം “തികച്ചും വ്യത്യസ്തമായ ഒരനുഭവം” ആയിരുന്നുവെന്ന് അവർ പറഞ്ഞു.

ഉത്തരേന്ത്യയിൽ പകൽ സമയത്ത് തനിച്ച് നടക്കാൻ തനിക്ക് ശരിക്കും സുഖം തോന്നിയ ആദ്യത്തെ സ്ഥലം ഉദയ്പുർ ആണെന്ന് അവർ പറഞ്ഞു. “എല്ലാ നഗരങ്ങളും ഉദയ്പുർ പോലെ തോന്നിയിരുന്നെങ്കിൽ, ഇന്ത്യ സ്വപ്നയാത്രായ്ക്കുള്ള ഒരു സ്ഥലമായേനെ,” അവർ കൂട്ടിച്ചേർത്തു.

മുംബൈ നഗരത്തിന് അവർ 6.5 റേറ്റിങ് നൽകുന്നു. മുംബൈ കൂടുതൽ സുരക്ഷിതമായി അവർക്ക് തോന്നി. സ്ത്രീകൾ തനിച്ച് പുറത്തിറങ്ങുന്നു, ആളുകൾ അവരവരുടെ കാര്യങ്ങൾ നോക്കിപ്പോകുന്നു, ഊബർ എളുപ്പത്തിൽ ലഭ്യമായിരുന്നു, പക്ഷേ ഇപ്പോഴും നഗരം തിരക്കേറിയതും പ്രവചനാതീതവുമാണ്. “മിക്ക സ്ഥലങ്ങളെക്കാളും സുരക്ഷിതമാണ്, പക്ഷേ 100 ശതമാനം സ്വസ്ഥത തോന്നിയില്ല,” അവർ പറഞ്ഞു.

എട്ട് റേറ്റിങ് നൽകിയ ഗോവയിൽ, സ്വാതന്ത്ര്യബോധവും ശാന്തമായ ബീച്ച് സംസ്കാരവും അവർ ആസ്വദിച്ചു. “പകൽ സമയത്ത് ഒരു പറുദീസ” എന്ന് വിശേഷിപ്പിച്ച അവർ, രാത്രി ജീവിതത്തെക്കുറിച്ച് മുന്നറിയിപ്പ് നൽകുകയും, പാനീയങ്ങൾ ശ്രദ്ധിക്കാതെ വെക്കുന്നതും ഇരുട്ടുള്ള ബീച്ചുകളിലൂടെ നടക്കുന്നതും ഒഴിവാക്കാൻ യാത്രക്കാരോട് ആവശ്യപ്പെടുകയും ചെയ്തു.

ഒടുവിൽ, കേരളം 9/10 റേറ്റിങ്ങോടെ അവരുടെ പട്ടികയിൽ ഒന്നാമതെത്തി. വൃത്തി, ശാന്തത, ബഹുമാനമുള്ള നാട്ടുകാർ എന്നിവയെല്ലാം അതിന് കാരണമായി. ഉത്തരേന്ത്യയിൽനിന്ന് തികച്ചും വ്യത്യസ്തമായി അനുഭവപ്പെട്ടുവെന്നും പുതിയ യാത്രക്കാർ കേരളത്തിൽനിന്ന് യാത്ര തുടങ്ങണമെന്നും അവർ നിർദേശിച്ചു.