ഇലോൺ മസ്കിന്റെ സ്റ്റാർലിങ്കിന് ഇന്ത്യയിൽ 20 ലക്ഷം കണക്ഷനുകൾ മാത്രമേ നൽകാനാകൂ എന്ന് കേന്ദ്ര സഹമന്ത്രി. ബിഎസ്എൻഎല്ലിന്റെ അവലോകന യോഗത്തിനിടെ ടെലികോം സഹമന്ത്രി പെമ്മസാനി ചന്ദ്രശേഖറാണ് ഇക്കാര്യം വ്യക്തമാക്കിയത്. ഇന്ത്യൻ ടെലികോം കമ്പനികൾക്കും പ്രത്യേകിച്ച് ബിഎസ്എൻഎല്ലിനും ഭീഷണിയുണ്ടാക്കുന്ന സാഹചര്യം ഒഴിവാക്കുക എന്നതാണ് നിയന്ത്രണത്തിന്റെ ലക്ഷ്യമെന്ന് മാധ്യമങ്ങൾ റിപ്പോർട്ടുചെയ്തു.
‘സ്റ്റാർലിങ്കിന് ഇന്ത്യയിൽ 20 ലക്ഷം ഉപഭോക്താക്കളെ മാത്രമേ നേടാനാകൂ. അവർക്ക് 200 എംബിപിഎസ് വരെ വേഗത നൽകാം. ഇത് ടെലികോം സേവനങ്ങളെ ബാധിക്കില്ല.’ -കേന്ദ്ര സഹമന്ത്രി പറഞ്ഞു. സാറ്റലൈറ്റ് സേവനങ്ങൾക്ക് ഇന്ത്യയിലുടനീളം കാര്യമായ കണക്റ്റിവിറ്റി നൽകാൻ കഴിയില്ലെന്നും നിലവിലുള്ള ടെലികോം കമ്പനികൾക്ക് ഇതൊരു ഭീഷണിയല്ലെന്നും സ്റ്റാർലിങ്കിന്റെ വരവോടെ രാജ്യത്ത് ഉണ്ടായേക്കാവുന്ന മത്സരം സംബന്ധിച്ച ചോദ്യത്തിന് മറുപടിയായി മന്ത്രി പറഞ്ഞു. ബിഎസ്എൻഎല്ലിന് ശക്തമായ സാന്നിധ്യമുള്ള ഗ്രാമങ്ങളെയും വിദൂര പ്രദേശങ്ങളെയും ആയിരിക്കും സാറ്റ്കോം സേവനങ്ങൾ ലക്ഷ്യമിടുന്നത് എന്ന് കരുതപ്പെടുന്ന സാഹചര്യത്തിലാണിത്.
അതിനിടെ, സ്റ്റാർലിങ്കിന്റെ നിലവിലുള്ള ശേഷി കണക്കിലെടുത്താണ് കണക്ഷനുകൾക്ക് പരിധി ഏർപ്പെടുത്തുന്നതെന്ന് ഒരു സർക്കാർ ഉദ്യോഗസ്ഥൻ മാധ്യമങ്ങളോട് പറഞ്ഞു. സ്റ്റാർലിങ്കിന് ഉയർന്ന നിരക്കുണ്ടെങ്കിലും വിദൂര പ്രദേശങ്ങളിൽ പ്ലാനുകളുടെ നിരക്ക് വർധിപ്പിക്കാൻ ബിഎസ്എൻഎല്ലിന് പദ്ധതിയില്ലെന്നും അദ്ദേഹം പറഞ്ഞു. 4ജി സേവനങ്ങൾ ആരംഭിച്ചതിന് ശേഷം 2025-ന്റെ ആദ്യ പാദത്തിൽ ബിഎസ്എൻഎല്ലിന്റെ വരുമാനത്തിൽ 20 മുതൽ 30 ശതമാനം വരെ വർധനവുണ്ടായതായും അദ്ദേഹം കൂട്ടിച്ചേർത്തു.
ഇലോൺ മസ്കിന്റെ സ്റ്റാർലിങ്കിന് ഇന്ത്യയിൽ വാണിജ്യ സാറ്റലൈറ്റ് ബ്രോഡ്ബാൻഡ് പ്രവർത്തനങ്ങൾ ആരംഭിക്കുന്നതിനുള്ള അന്തിമ റെഗുലേറ്ററി അനുമതി അടുത്തിടെ ലഭിച്ചിരുന്നു. ജൂലായ് ഏഴിന് ഇന്ത്യൻ നാഷണൽ സ്പേസ് പ്രൊമോഷൻ ആൻഡ് ഓതറൈസേഷൻ സെന്റർ (IN-SPACe) കമ്പനിക്ക് അനുമതി നൽകി. ഇതോടെ പ്രവർത്തനം ആരംഭിക്കുന്നതിന് മുൻപുള്ള അവസാനത്തെ പ്രധാന തടസ്സവും നീങ്ങി. IN-SPACe-ന്റെ അനുമതിയോടെ, സ്റ്റാർലിങ്കിന് ഇനി ടെലികമ്മ്യൂണിക്കേഷൻസ് വകുപ്പിൽ (DoT) നിന്ന് സ്പെക്ട്രം നേടുകയും അടിസ്ഥാന സൗകര്യങ്ങൾ വികസിപ്പിക്കുകയും ദശീയ സുരക്ഷാ മാനദണ്ഡങ്ങൾ പാലിക്കുകയും വേണം. സാങ്കേതിക പിന്തുണയ്ക്കായി റിലയൻസ് ജിയോ, ഭാരതി എയർടെൽ എന്നിവരുമായി സ്റ്റാർലിങ്ക് പ്രത്യേക കരാറുകളിലും ഒപ്പുവെച്ചിട്ടുണ്ട്.
ഇന്ത്യയിൽ സ്റ്റാർലിങ്ക് സജ്ജീകരണത്തിന് 33,000 രൂപ മുതൽ 35,000 രൂപ വരെ വിലവരുമെന്ന റിപ്പോർട്ടുകൾ നേരത്തെതന്നെ പുറത്തുവന്നിരുന്നു. അൺലിമിറ്റഡ് ഡാറ്റയ്ക്കായി ഉപയോക്താക്കൾക്ക് പ്രതിമാസം 3000 രൂപ നൽകേണ്ടിവരും. സ്റ്റാർലിങ്ക് ഉപകരണത്തിൽ നൽകുന്ന പരമാവധി വേഗത 200 എംബിപിഎസ് ആയിരിക്കും. എല്ലാ ദിവസവും ഏകദേശം 100 എംബിപിഎസ് സ്ഥിരമായ വേഗത നൽകാൻ കഴിയുമെന്നും റിപ്പോർട്ടുകൾ പുറത്തുവന്നിട്ടുണ്ട്.
