അമേരിക്കയിൽ എച്ച്1ബി വിസയുമായി ബന്ധപ്പെട്ട ചർച്ചകൾ കൊഴുക്കുന്നതിനിടെ വ്യാപകമായി വിമർശനത്തിന് ഇരയായി ഇന്ത്യൻ വംശജനായ ഡെമോക്രാറ്റിക് കോൺഗ്രസ് അംഗം രാജാ കൃഷ്ണമൂർത്തി. എച്ച്1ബി വിസകളുടെ എണ്ണം 130000 ആക്കി ഇരട്ടിയാക്കണമെന്ന് അഭിപ്രായപ്പെട്ടതാണ് രാജ കൃഷ്ണമൂർത്തിയെ വിമർശിച്ച് നിരവധിപേർ രംഗത്തെത്താൻ കാരണം.
ഇല്ലിനോയിസിനെ പ്രതിനിധീകരിക്കുന്ന രാജ കൃഷ്ണമൂർത്തി H-1B വിസകളുടെ എണ്ണം ഓരോ വർഷവും ഉയർത്തുന്നതുമായി ബന്ധപ്പെട്ട് മുമ്പ് നിർദ്ദേശിച്ച ഒരു ബിൽ വീണ്ടും അവതരിപ്പിച്ചിരുന്നു. ഇമിഗ്രേഷൻ റിഫോം ഫോർ എംപ്ലോയ്‌മെന്റ് (HIRE) ആക്ട് എന്നറിയപ്പെടുന്ന ഈ പരിഷ്കരണത്തിൽ ഓരോ വർഷവും ലഭ്യമായ H-1B വിസകളുടെ എണ്ണം 65,000 ൽ നിന്ന് 130,000 ആയി ഇരട്ടിയാക്കാൻ നിർദേശിക്കുന്നു. നിർണായകവും ഉയർന്നുവരുന്നതുമായ സാങ്കേതിക മേഖലകളിലുള്ളവർ ഉൾപ്പെടെയുള്ള യുഎസ് തൊഴിലുടമകൾക്ക് നിരന്തരമായ തൊഴിൽ ക്ഷാമം നികത്താൻ ആവശ്യമായ പ്രത്യേക പ്രതിഭകളെ നിയമിക്കാൻ കഴിയുമെന്ന് ഉറപ്പാക്കുമെന്ന് ഈ നിർദ്ദേശം പറയുന്നു. ഇതാണ് വിമർശനത്തിന് പാത്രമായത്. വിമർശനങ്ങളെ മുന്നിൽക്കണ്ടുകൊണ്ട് മറ്റൊരു നീക്കവും കൃഷ്ണമൂർത്തി നടത്തിയിട്ടുണ്ട്. യുഎസ് സ്കൂളുകളിലെ STEM പ്രോഗ്രാമുകൾ ശക്തിപ്പെടുത്തുന്നതിന് പുതിയ ഫണ്ടിംഗ് തൻ്റെ ബില്ലിൽ ചേർത്തിട്ടുണ്ട്.
പ്രസിഡന്റ് ഡോണൾഡ് ട്രംപ് അമേരിക്കയ്ക്ക് ചില കഴിവുകൾ ആവശ്യമാണെന്നും എന്നാൽ മാഗ അനുകൂലികൾ അത് അംഗീകരിക്കുന്നില്ലെന്നും പറഞ്ഞതിനെത്തുടർന്ന് എച്ച് 1 ബി വിവാദം രണ്ടുതട്ടിലാണ് ഇപ്പോൾ. വിമർശനങ്ങൾക്ക് മറുപടിയായി “നാളത്തെ തൊഴിലവസരങ്ങളും വ്യവസായങ്ങളും കെട്ടിപ്പടുക്കുന്നതിന്, ലോകമെമ്പാടുമുള്ള മികച്ച പ്രതിഭകളെ സ്വാഗതം ചെയ്യുന്നതിനൊപ്പം സ്വന്തം തൊഴിൽ ശക്തിയെ ശക്തിപ്പെടുത്തുന്നതിലൂടെ അമേരിക്ക നവീകരണത്തിന്റെ മുൻപന്തിയിൽ നിൽക്കണം,” എന്ന് കൃഷ്ണമൂർത്തി പറഞ്ഞു.
ഇന്ത്യയെ സേവിക്കുകയാണെങ്കിൽ കൃഷ്ണമൂർത്തി കോൺഗ്രസിൽ ഉണ്ടാകരുതെന്ന് അവകാശപ്പെട്ടുകൊണ്ട് സോഷ്യൽ മീഡിയ ഉപയോക്താക്കൾ അദ്ദേഹത്തെ നാടുകടത്തണമെന്ന് ആവശ്യപ്പെട്ടു. അദ്ദേഹത്തെ ‘ന്യൂഡൽഹിയിലെ രാജ കൃഷ്ണമൂർത്തി’ എന്ന് വിളിച്ചു ചിലർ. ഇല്ലിനോയിസിൽ വലിയ ടെക് കമ്പനികളില്ലാത്തതിനാൽ എന്തുകൊണ്ടാണ് അദ്ദേഹം H-1B യിൽ ഇത്രയധികം താൽപ്പര്യം കാണിക്കുന്നതെന്നും ചില സോഷ്യൽ മീഡിയ ഉപയോക്താക്കൾ പ്രതികരിച്ചു.
അതേസമയം, രാജ്യത്തെ ഏറ്റവും വലിയ ഐടി സേവന സ്ഥാപനങ്ങളുടെ സംഘടനയായ ഐടിസെർവ് അലയൻസ് കൃഷ്ണമൂർത്തിയുടെ ബില്ലിനെ പിന്തുണയ്ക്കുന്നു. “നമ്മുടെ ഉയർന്ന വൈദഗ്ധ്യമുള്ള ഇമിഗ്രേഷൻ സംവിധാനം ആധുനികവൽക്കരിക്കുന്നതിനും കഴിവുള്ള പ്രൊഫഷണലുകൾക്ക് അമേരിക്കയുടെ ഇന്നൊവേഷൻ സമ്പദ്‌വ്യവസ്ഥയിലേക്ക് സംഭാവന നൽകാൻ കഴിയുമെന്ന് ഉറപ്പാക്കുന്നതിനുമുള്ള ഒരു പ്രധാന ചുവടുവയ്പ്പാണ് HIRE ആക്റ്റ്,” ഐടിസെർവ് അലയൻസ് ഗവേണിംഗ് ബോർഡ് ചെയർമാൻ രഘു ചിട്ടിമല്ല പറഞ്ഞു.
