പശ്ചിമേഷ്യൻ യുദ്ധം ഇറാന്റെ ജനജീവിതത്തെ സാരമായി ബാധിച്ചു തുടങ്ങിയതിന്റെ വ്യക്തമായ സൂചനകൾ പുറത്തുവരുന്നു. രാജ്യത്തെ പ്രധാന എണ്ണ സംഭരണികൾക്ക് നേരെ കനത്ത വ്യോമാക്രമണങ്ങൾ നടന്നതിന് പിന്നാലെ തലസ്ഥാന നഗരിയായ ടെഹ്റാനിലെ ഗ്യാസ് സ്റ്റേഷനുകളിൽ (പെട്രോൾ പമ്പുകളിൽ) ഇന്ധനത്തിനായി നീണ്ട വരികൾ രൂപപ്പെട്ടിരിക്കുകയാണ്. വാഹനങ്ങളിൽ ഇന്ധനം നിറയ്ക്കാൻ ഡ്രൈവർമാർ മണിക്കൂറുകൾ കാത്തുനിൽക്കേണ്ടി വരുന്നുവെന്നാണ് പുതിയ വിവരങ്ങൾ.
ടെഹ്റാനിൽ നിന്നുള്ള സി.എൻ.എൻ മാധ്യമപ്രവർത്തകൻ ഫ്രെഡറിക് പ്ലെയ്റ്റ്ജെൻ ആണ് എക്സ് പ്ലാറ്റ്ഫോമിലൂടെ ഈ വിവരങ്ങൾ പുറത്തുവിട്ടത്. നഗരത്തിലെ പെട്രോൾ പമ്പുകളിൽ വലിയ തോതിലുള്ള തിരക്കാണ് അനുഭവപ്പെടുന്നത്. ‘ഇന്ധനം ലഭിക്കാൻ പമ്പുകളിൽ 20 മുതൽ 30 മിനിറ്റ് വരെ കാത്തുനിൽക്കേണ്ടി വരുന്നുവെന്നാണ് ഡ്രൈവർമാർ ഞങ്ങളോട് പറഞ്ഞത്,’ ഫ്രെഡറിക് പ്ലെയ്റ്റ്ജെൻ എക്സ് പോസ്റ്റിൽ വ്യക്തമാക്കി.
നിലവിലെ ഇന്ധന വിതരണത്തിൽ ജനങ്ങൾ പൊതുവെ ശാന്തരാണെങ്കിലും, വരും ദിവസങ്ങളെക്കുറിച്ചുള്ള വലിയ ആശങ്ക അവരിലുണ്ട്. തലസ്ഥാനത്തിന് ചുറ്റുമുള്ള ഇന്ധന സംഭരണ കേന്ദ്രങ്ങൾക്ക് നേരെ നടന്ന അതിരൂക്ഷമായ വ്യോമാക്രമണങ്ങളാണ് ഈ ആശങ്ക വർദ്ധിപ്പിക്കുന്നത്. എണ്ണ സംഭരണികൾ തകർന്നതിനാൽ വരും ദിവസങ്ങളിൽ രാജ്യത്ത് ഇന്ധനക്ഷാമം വളരെ രൂക്ഷമാകുമെന്നാണ് ജനങ്ങൾ ഭയപ്പെടുന്നത്. അവശ്യ സേവനങ്ങൾക്കും മറ്റും ഇന്ധനം ലഭിക്കാതെ വരുന്നത് രാജ്യത്തെ വലിയൊരു പ്രതിസന്ധിയിലേക്ക് തള്ളിവിട്ടേക്കാം.
